ସୁବର୍ଣ୍ଣପୁର, (୨୯/୦୭) : ଆପ୍ର : ସୁବର୍ଣ୍ଣପୁର ଜିଲ୍ଲା ବିନିକା ଏନଏସି ଅନ୍ତର୍ଗତ ୧୦ ନମ୍ବର ୱାର୍ଡ କାଇରାପାଲି ରେ ଚୌକିଜୋର ର ବନ୍ୟା ପାଣି ମାଡି ଯିବାରୁ ଚାରୋଟି ପରିବାର ଜଳ ବନ୍ଦୀ ହୋଇ ରହିଥିବା ବେଳେ ବିନିକା ଅଞ୍ଚଳରୁ ବିଛିନ୍ନ ହୋଇଯାଇଛି ।
ସୂଚନା ଅନୁଯାଇ ବିନିକା ଅଞ୍ଚଳରେ ପ୍ରବଳ ବର୍ଷା ଯୋଗୁଁ ଗତକାଲି ରାତିରୁ ଚୌକିଜୋରରେ ଜଳସ୍ତର ବଢ଼ିବାରେ ଲାଗିଥିଲା l ବିଳମ୍ବିତ ରାତିରେ ବନ୍ୟା ଜଳ କାଇରାପାଲି ଗ୍ରାମରେ ପଶିଥିଲା l ସକାଳ ପାଇବା ବେଳକୁ ସବୁଆଡେ ଜଳ ମଗ୍ନ ହୋଇଯାଇଥିଲା । ଫଳରେ ଗାଁ’ର ଈଶ୍ୱର ବିଶ୍ୱାଳ ଓ ଜେମାମନୀ ବିଶ୍ୱାଳ, ଭାସ୍କର ସେଠ୍ ଓ ଗହଲ ସେଠ୍, ଜୟରାମ ସେଠ୍ ଓ ଅଙ୍କିତା ସେଠ୍ ଏବଂ ସନ୍ତୋଷିନୀ ସେଠ୍ ଆଦି ଚାରୋଟି ପରିବାର ଜଳବନ୍ଦୀରେ ରହିଥିଲେ l ଖବର ପାଇ ଜିଲ୍ଲାପାଳ ଡ. ନୃପରାଜ ସାହୁ, ବିନିକା ଏନଏସି କାର୍ଯ୍ୟନିର୍ବାହୀ ଅଧିକାରୀ ମାନସ ରଞ୍ଜନ ଭୋଇ, ଏନଏସି ଅଧକ୍ଷ ସୁବାଷ ଚନ୍ଦ୍ର ଭୁଏ,ସିଡିପିଓ, ସୁପରଭାଇଜର,ତଥା ଏନଏସି କର୍ମଚାରୀ ଓ ପୁଲିସ କର୍ମଚାରୀ ଘଟଣା ସ୍ଥଳକୁ ପହଞ୍ଚି ଉକ୍ତ ପରିବାରମାନଙ୍କୁ ଉଦ୍ଧାର କରି ଗାଁ’ର ମିଶନ ଶକ୍ତି ଗୃହ ଏବଂ କମ୍ୟୁନିଟି ଗୃହରେ ରଖିଛନ୍ତି l ପ୍ରଶାସନ ପକ୍ଷରୁ ସେମାନଙ୍କୁ ଶୁଖିଲା ଖାଦ୍ୟ ଓ ରନ୍ଧା ଖାଦ୍ୟ ଯୋଗେଇ ଦିଆଯାଇଛି ।
ସେହିପରି ବିନିକା ଏନଏସି ପ୍ରଶାସନ ପକ୍ଷରୁ ୨୪ ଘଣ୍ଟିଆ ସହାୟତା କେନ୍ଦ୍ର ଖୋଲି ସହରର ତଳିଆ ଅଞ୍ଚଳ ଯଥା ଗୁଲାପଡା, ପାତିକାରପଡା, ମନହରୀପଡା ବାସିନ୍ଦାମାନଙ୍କୁ ବନ୍ୟା ଆଶ୍ରୟ ସ୍ଥଳୀରେ ନିରାପଦରେ ରଖି ଶୁଖିଲା ଖାଦ୍ୟ ଓ ରନ୍ଧା ଖାଦ୍ୟ ଯୋଗେଇ ଦିଆଯାଇଛି । ଉକ୍ତ କାର୍ଯ୍ୟରେ ଏନଏସି କର୍ମଚାରୀ ମାନେ ସହଯୋଗ କରୁଛନ୍ତି । ସେହିପରି ଅଙ୍ଗନଦୀ ରେ ବନ୍ୟା ପାଣି ଆସିବାରୁ ୭ ଜଣ ଙ୍କୁ ଅଗ୍ନିଶମ ବାହିନୀ କର୍ମଚାରୀ ମାନେ ପହଞ୍ଚି ଉଦ୍ଧାର କରିଛନ୍ତି । ବିନିକା ବ୍ଲକ କଇଁନ୍ତିରା ଗ୍ରାମ ପଞ୍ଚାୟତ ଘଣ୍ଟପାଲି ଅଙ୍ଗନଦୀ ନିକଟରେ ଆନ୍ଧ୍ରପ୍ରଦେଶ ର ଜଣେ ପାମ୍ ଚାଷ କରିଛନ୍ତି । ସେଠାରେ ରଞ୍ଜନ ପାଣ୍ଡେ, ମୀନା ପାଣ୍ଡେ, ନମିତା ପାଣ୍ଡେ, କଳ୍କୀ କର୍ମୀ, ବାଳକୃଷ୍ଣ ପରିହା ଙ୍କ ସମେତ ୨ ଶିଶୁ ଘର ଭିତରେ ଶୋଇଥିଲେ ।
ରାତିରେ ପ୍ରବଳ ବର୍ଷା ହେବାରୁ ଅଙ୍ଗନଦୀ ରେ ବନ୍ୟା ପାଣି ମାଡି ଆସିବାରୁ ଘର ଚାରି ପାଖରେ ପାଣି ଘେରି ରହିଥିଲା l ସେମାନେ ଗ୍ରାମବାସୀ ଙ୍କୁ ଜଣାଇବାରୁ ଗ୍ରାମବାସୀ ୧୧୨ କୁ କଲ୍ କରିଥିଲେ l ଘଟଣା ସ୍ଥଳରେ ଅଗ୍ନିଶମ ବିଭାଗ ଓଆଇସି ତେଜରାଜ ସାହୁ, ମିଥୁନ ଅମାତ, ଲକ୍ଷ୍ମଣ ମେହେର, ପ୍ରଭାତ ଚାନ୍ଦ ପ୍ରମୁଖ ପହଞ୍ଚି ବନ୍ୟା ପାଣି ରେ ଫସି ରହିଥିବା ୭ ଜଣଙ୍କୁ ଉଦ୍ଧାର କରିଥିଲେ ।
