ବ୍ରହ୍ମଗିରି, (୧୭/୦୬) : ଆପ୍ର : ମଦ ପିଆଇ ପିଆଇ ମାରିଦେଲେ । ବ୍ରହ୍ମଗିରି ଥାନା ବେଣ୍ଟପୁର ହରିଜନ ସାହିରେ ମୃତଦେହ ଉଦ୍ଧାର । ମୃତକ ହେଲେ ଛଇଲ ଗୋଛାୟତ ।
ବ୍ରହ୍ମଗିରି ଥାନାରେ ହତ୍ୟା ଅଭିଯୋଗ ଆଣିଲେ ପରିବାର ଲୋକ । ମୃତକଙ୍କ ପୁଅ ଚନ୍ଦନ ଗୋଛାୟତ ବ୍ରହ୍ମଗିରି ଥାନାରେ ଏନେଇ ଅଭିଯୋଗ ଦାଖଲ କରିଛନ୍ତି । ତାଙ୍କ ଅଭିଯୋଗ ଅନୁସାରେ, ଗତକାଲି ରାତିରେ ଉକ୍ତ ଗାଁ’ର ଦୁଇଜଣ ବ୍ୟକ୍ତି ଛଇଲ ଗୋଛାୟତଙ୍କୁ ଘରୁ ଡାକି ନେଇଥିଲେ। ପରେ ତାଙ୍କୁ ଅତ୍ୟଧିକ ମଦ୍ୟପାନ କରାଇ ରାତିରେ ଘର ନିକଟରେ ଆଣି ଛାଡ଼ି ପଳାଇଥିଲେ । ସକାଳୁ ପଡ଼ୋଶୀଙ୍କ ବାରଣ୍ଡାରେ ଛଇଲଙ୍କ ମୃତଦେହ ପଡିଥିବା ଦେଖିବାକୁ ପାଇଥିଲେ ମୃତକଙ୍କ ପୁଅ ।
ଏହାପରେ ପରିବାର ଲୋକେ ଏହାକୁ ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ଦାବି କରିଛନ୍ତି । ଘଟଣାର ଖବର ପାଇ ବ୍ରହ୍ମଗିରି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଥିବା ବେଳେ, ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ପୋଲିସ୍ ସବୁ ଦିଗରୁ ତଦନ୍ତ କରୁଛି । ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ରହସ୍ୟ ଉପରୁ ପରଦା ହଟିବ ବୋଲି ଅନୁମାନ କରାଯାଉଛି ।
