ଭୁବନେଶ୍ୱର, (୧୬/୦୬) : ଆପ୍ର : ରାଜଧାନୀର ପ୍ରେସ ଛକ ନିକଟରେ ସିରିଜ ଦୁର୍ଘଟଣା, ୨ ମୃତ । ଏକ ଦ୍ରୁତ ଗତିରେ ଆସୁଥିବା ଏକ କାର ନିୟନ୍ତ୍ରଣ ହରାଇ ପ୍ରଥମେ ଏକ ଅଟୋକୁ ଧକ୍କା ଦେଇଥିଲା ।
ପରେ କାରଟି ଲଗାତାର ଭାବେ ତିନୋଟି ବାଇକ୍ ଓ ଗୋଟିଏ ସ୍କୁଟିକୁ ଧକ୍କା ଦେଇ ଫିଲ୍ମ ଷ୍ଟାଇଲରେ ରାସ୍ତା କଡ଼ ଆମ୍ୱ ଗଛକୁ ଧକ୍କା ଦେଇଥିଲା । ଦୁର୍ଘଟଣା ଘଟାଇ କାର ଡ୍ରାଇଭର ଘଟଣା ସ୍ଥଳରୁ ଫେରାର । ଦୁର୍ଘଟଣାରେ ୭ ଜଣରୁ ଅଧିକ ଲୋକ ଆହତ ହୋଇଥିବା ବେଳେ ୨ଜଣଙ୍କ ମୃତ୍ୟୁ ହୋଇଛି । ଘଟଣା ପରେ କିଛି ସମୟ ପାଇଁ ପ୍ରେସ ଛକ ଅଞ୍ଚଳରେ ଯାତାୟାତ ବ୍ୟାହତ ହୋଇଥିଲା । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି କ୍ଷତିଗ୍ରସ୍ତ ଗାଡ଼ିଗୁଡ଼ିକୁ ହଟାଇବା ସହ ଯାତାୟାତ ସ୍ୱାଭାବିକ କରିଥିଲା । କାରଟି କିପରି ନିୟନ୍ତ୍ରଣ ହରାଇଲା ଓ ଦୁର୍ଘଟଣାର ପ୍ରକୃତ କାରଣ କଣ, ସେନେଇ ପୁଲିସ ତଦନ୍ତ ଆରମ୍ଭ କରିଛି । ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, କାରଟି ଅତ୍ୟଧିକ ବେଗରେ ଆସୁଥିଲା ଏବଂ ହଠାତ୍ ଭାରସାମ୍ୟ ହରାଇ ଏକାଧିକ ଗାଡ଼ିକୁ ଧକ୍କା ଦେଇଥିଲା ।
