ସୁବର୍ଣ୍ଣପୁର, (୨୬/୦୯) : ଆପ୍ର : ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକ ଜୁଲୁଣ୍ଡା ପ୍ରାଥମିକ ବିଦ୍ୟାଳୟରେ ଶିଶୁ ବାଟିକାରୁ ନେଇ ପଞ୍ଚମ ଶ୍ରେଣୀ ପର୍ଯ୍ୟନ୍ତ ରହିଛି ।
ବିଦ୍ୟାଳୟରେ ମୋଟ ୯୩ ଜଣ ଛାତ୍ରଛାତ୍ରୀ ପାଠ ପଢ଼ାଇବା ପାଇଁ ଜଣେ ସ୍ଥାୟୀ ଶିକ୍ଷକ ଓ ଜଣେ ଡେପୁଟେସନ ମାତ୍ର ୨ ଜଣ ଶିକ୍ଷକ ରହିଛନ୍ତି । ଶିକ୍ଷକ ଅଭାବ ଥିବାରୁ ଶିକ୍ଷକ ଯୋଗାଇ ଦେବାପାଇଁ ସ୍କୁଲ କମିଟୀ ଓ ଗ୍ରାମବାସୀ ମିଶି ଡିଇଓ, ବିଇଓ ଏବଂ ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିରରେ ଅଭିଯୋଗ କରିଥିଲେ ମଧ୍ୟ ଆଜି ପର୍ଯ୍ୟନ୍ତ କେହି ଶୁଣୁନାହାନ୍ତି । ତେଣୁ ଆଜକୁ ଚାରିଦିନ ହେଲା ଅଭିଭାବକମାନେ ନିଜ ନିଜ ପିଲାଙ୍କୁ ସ୍କୁଲ ଯିବାକୁ ମନା କରିଦେଇଥିଲେ । ସୂଚନା, ଗତ ସେପ୍ଟେମ୍ବର ୫ ତାରିଖରେ ଶିକ୍ଷକମାନଙ୍କ ପଦୋନ୍ନତି ହେବାରୁ ଉକ୍ତ ସ୍କୁଲରୁ ଦୁଇଜଣ ଶିକ୍ଷକ ଅନ୍ୟତ୍ର ବଦଳି ହୋଇ ଯାଇଥିଲେ ।
ସେହିଦିନ ଠାରୁ ଜଣେ ମାତ୍ର ଶିକ୍ଷକ ବିଦ୍ୟାଳୟ ଚଳାଉଥିଲେ । ସେପ୍ଟେମ୍ବର ୧୮ ତାରିଖରେ ଡେପୁଟେସନ ରେ ଜଣେ ଶିକ୍ଷକ ଯୋଗ ଦେଇଛନ୍ତି । ସେହିଦିନରୁ ଆଜିପଯ୍ୟନ୍ତ ଦୁଇଜଣ ଶିକ୍ଷକରେ ସ୍କୁଲ ଚାଲିଛି । ତେଣୁ ଗ୍ରାମବାସୀ ଆଜି ସ୍କୁଲରେ ତାଲାମାରି ଆବଶ୍ୟକ ସ୍ଥାୟୀ ଶିକ୍ଷକ ଯୋଗାଇଦେବା ପାଇଁ ଦାବୀ କରୁଛନ୍ତି । ସେପଟେ ଯେତେଦିନ ପର୍ଯ୍ୟନ୍ତ ଶିକ୍ଷକ ପଦବୀ ପୂରଣ ନ ହୋଇଛି ସେତେଦିନ ପର୍ଯ୍ୟନ୍ତ ବିଦ୍ୟାଳୟରୁ ତାଲା ଖୋଲାଯିବ ନାହିଁ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି ।
