ଗଜପତି, (12/06) : ଆପ୍ର : ଋଣ ଯୋଗାଇ ଦେବା ନାଁରେ ସାଧାରଣ ଓ ନିରୀହ ଲୋକଙ୍କୁ ଠକୁଥିବା ଏକ ରାକେଟର ପର୍ଦ୍ଦାଫାସ କରିଛି ଗଜପତି ଜିଲ୍ଲା ଅଡ଼ବା ଥାନା ପୋଲିସ । ଠକେଇ କରି ବାଇକ ଏବଂ ଜମିବାଡ଼ି କାଗଜପତ୍ର ହଡ଼ପ କରୁଥିଲା ଅଭିଯୁକ୍ତ ।
ଏହି ମାମଲାରେ ସଂପୃକ୍ତ ଥିବା ମୁଖ୍ୟ ମାଷ୍ଟର ମାଇଣ୍ଡ କେ. ରବୀନ୍ଦ୍ର ରେଡ୍ଡୀକୁ ପୋଲିସ ଗିରଫ କରି କୋର୍ଟଚାଲାଣ କରିଛି । ଆର. ଉଦୟଗିରି ଏସଡିପିଓ ତଥା IPS ଅଧିକାରୀ ରାକେଶ ସାହୁଙ୍କ ନେତୃତ୍ବରେ ଅଭିଯୁକ୍ତଙ୍କ ବାସଭବନରେ କରାଯାଇଥିଲା ମାରାଥନ ଚଢ଼ାଉ । ଏକାସଙ୍ଗେ ୧୩୭ଟି ବାଇକ୍, ୧୨୮ଟି ମୋବାଇଲ୍ ଫୋନ୍ ଏବଂ ନଗଦ ୩ ଲକ୍ଷ ୬୧ ହଜାରରୁ ଊର୍ଦ୍ଧ୍ୱ ଟଙ୍କା ଜବତ କରାଯାଇଛି ।
ପୋଲିସର ପ୍ରାଥମିକ ତଦନ୍ତ ଅନୁଯାୟୀ, ଅଭିଯୁକ୍ତ ରବୀନ୍ଦ୍ର ସ୍ଥାନୀୟ ଅଞ୍ଚଳର ଆର୍ଥିକ ଅନଗ୍ରସର ଲୋକଙ୍କୁ ନିଜ ଶିକାର ବନାଉଥିଲା । ଲୋକମାନଙ୍କର ଟଙ୍କାର ଜରୁରୀ ଆବଶ୍ୟକତା ପଡ଼ିଲେ, ସେ ସାହାଯ୍ୟ କରିବା ବାହାନାରେ ସେମାନଙ୍କୁ ନିଜ ପାଖକୁ ଡାକୁଥିଲା । ସେମାନଙ୍କୁ କିଛି ପରିମାଣର ଋଣ ଦେଇ ବଦଳରେ ସେମାନଙ୍କ ମୋଟରସାଇକେଲ୍ ବନ୍ଧକ ରଖୁଥିଲା । ଏହା ସହିତ ଗାଡ଼ିର ମୂଳ କାଗଜପତ୍ର, ପ୍ରପର୍ଟି ଡକ୍ୟୁମେଣ୍ଟସ ଏବଂ ଖାଲି ଷ୍ଟାମ୍ପ ପେପରରେ ଲୋକଙ୍କ ସ୍ୱାକ୍ଷର ନେଇ ନେଉଥିଲା । ପରେ ତାର ଅସଲ ଖେଳ ଦେଖାଉଥିଲା ଅଭିଯୁକ୍ତ ।
