ମୁରିବାହାଲ, (୩/୦୮) : ଆପ୍ର : ସମାଜସେବା ସହ ସ୍ୱାସ୍ଥ୍ୟ ସଚେତନତାକୁ ପ୍ରୋତ୍ସାହନ ଦେବା ଲକ୍ଷ୍ୟରେ ଅଖିଳ ଭାରତୀୟ ମାରୱାଡ଼ି ମହିଳା ସମିତି ଏବଂ ସୃଜନ ଶାଖା, ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ପକ୍ଷରୁ ସ୍ଥାନୀୟ ହରିଭବନଠାରେ ଏକ ନିଃଶୁଳ୍କ ସ୍କିନ୍ କେୟାର କ୍ୟାମ୍ପ ସଫଳତାର ସହ ଅନୁଷ୍ଠିତ ହୋଇଛି ।
କ୍ୟାମ୍ପରେ କଣ୍ଟାବାଞ୍ଜି ସମେତ ଆଖପାଖ ଅଞ୍ଚଳରୁ ୧୦୦ରୁ ଅଧିକ ମହିଳା, ପୁରୁଷ ଓ ଯୁବକ-ଯୁବତୀ ଯୋଗଦେଇ ନିଃଶୁଳ୍କ ସ୍ୱାସ୍ଥ୍ୟ ପରାମର୍ଶ ଓ ଚିକିତ୍ସା ସେବାର ସୁବିଧା ପାଇଥିଲେ । କାର୍ଯ୍ୟକ୍ରମରେ ବିଜେପି ଜିଲ୍ଲା ସମ୍ପାଦକ ପୁରନ୍ଦର ବାଗ ମୁଖ୍ୟ ଅତିଥି ଭାବେ ଯୋଗଦେଇ ଏଭଳି ସ୍ୱାସ୍ଥ୍ୟମୂଳକ ପଦକ୍ଷେପକୁ ପ୍ରଶଂସା କରିଥିଲେ । ସମ୍ମାନିତ ଅତିଥି ଭାବେ ଅଗ୍ରୱାଲ ସଭା ଟ୍ରଷ୍ଟର ଅଧ୍ୟକ୍ଷ ଅଶୋକ ଛାପଡିୟା, ସଚିବ ଲଳିତ ଅଗ୍ରୱାଲ, ସାମ୍ବାଦିକ ସଂଘ ସଭାପତି ମୋହନ ସୋନି ଓ ଡ଼ା. ଶ୍ୱେତା ସାହୁ ମଞ୍ଚାସୀନ ଥିଲେ ।
ଡ଼ା. ସୁରଭିଙ୍କ ପରାମର୍ଶ : ଶିବିରରେ ପ୍ରସିଦ୍ଧ ଚର୍ମ ଓ କେଶ ରୋଗ ବିଶେଷଜ୍ଞ ଡ଼ା. ସୁରଭି ଖଣ୍ଡେଲୱାଲ (BAMS, PGDCC) ଉପସ୍ଥିତ ରହି ବ୍ରଣ, ଦାଗ, ପିଗମେଣ୍ଟେସନ୍, ଆଲର୍ଜି, କେଶ ଝଡ଼ିବା ଭଳି ବିଭିନ୍ନ ଚର୍ମ ଓ କେଶ ସମସ୍ୟାର ଯାଞ୍ଚ କରିବା ସହ ନିଃଶୁଳ୍କ ପରାମର୍ଶ ପ୍ରଦାନ କରିଥିଲେ। ସେ “ସୁସ୍ଥ ତ୍ୱଚା, ସୁସ୍ଥ କେଶ, ସୁସ୍ଥ ଜୀବନ” ସ୍ଲୋଗାନକୁ ସାର୍ଥକ କରି ଦୈନ୍ଦିନ ଜୀବନରେ ତ୍ୱଚା ଓ କେଶର ସଠିକ୍ ଯତ୍ନ ନେବାର ଆବଶ୍ୟକତା ସମ୍ପର୍କରେ ସଚେତନତା ସୃଷ୍ଟି କରିଥିଲେ ।
ଏହି ଅବସରରେ କଣ୍ଟାବାଞ୍ଜିର ନୂତନ ଦନ୍ତ ଚିକିତ୍ସକ ଡ଼ା. ପ୍ରିୟା ସୋନିଙ୍କୁ ପୁଷ୍ପଗୁଚ୍ଛ ଓ ଉତ୍ତରୀୟ ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା । ମାରୱାଡ଼ି ମହିଳା ସମିତିର ସଭାପତି ପୂନମ ଖଣ୍ଡେଲୱାଲ, ସମ୍ପାଦିକା ଅନୀତା ଡାଲମିଆ, କୋଷାଧ୍ୟକ୍ଷ ସଙ୍ଗୀତା ଝଞ୍ଜରୱାଲିଆ ଏବଂ ସୃଜନ ଶାଖାର ଅଧ୍ୟକ୍ଷା ନେହା ଅଗ୍ରୱାଲ*ଙ୍କ ସମେତ ସମସ୍ତ ସଦସ୍ୟା ସକ୍ରିୟ ସହଯୋଗ କରିଥିଲେ । ସ୍ୱାସ୍ଥ୍ୟ ସଚେତନତା ଓ ସମାଜସେବାର ଏହି ଅଭିନବ ପଦକ୍ଷେପକୁ ସ୍ଥାନୀୟ ଲୋକେ ବେଶ ପ୍ରଶଂସା କରିଛନ୍ତି ।
