ରାୟଗଡ଼ା, (୩/୦୯) : ଆପ୍ର : ସେନ୍ଚୁରିଅନ୍ ବିଶ୍ୱବିଦ୍ୟାଳୟ (CUTM) ରାୟଗଡ଼ା କ୍ୟାମ୍ପସର ନର୍ସିଂ ବିଭାଗ ତରଫରୁ ପ୍ରଥମ ବର୍ଷର ନୂତନ ଛାତ୍ରଛାତ୍ରୀଙ୍କୁ ସ୍ୱାଗତ ଜଣାଇବା ପାଇଁ ଏକ ଭବ୍ୟ ‘ଫ୍ରେସର୍ସ ଡେ’ (ସମ୍ବର୍ଦ୍ଧନା ସଭା) ଅନୁଷ୍ଠିତ ହୋଇଯାଇଛି ।
ପିଠାମହସ୍ଥିତ ବିଶ୍ୱବିଦ୍ୟାଳୟ ଅଡିଟୋରିୟମଠାରେ ତୃତୀୟ ସେମିଷ୍ଟାର ଛାତ୍ରଛାତ୍ରୀଙ୍କ ଆୟୋଜନରେ ଆୟୋଜିତ ଏହି କାର୍ଯ୍ୟକ୍ରମରେ ଗୁରୁଜନ, ଅଧ୍ୟାପକ, ଅଧ୍ୟାପିକା ଓ ଛାତ୍ରଛାତ୍ରୀଙ୍କ ବହୁଳ ସମାଗମ ଦେଖିବାକୁ ମିଳିଥିଲା । ପ୍ରଦୀପ ପ୍ରଜ୍ୱଳନ ପୂର୍ବକ କାର୍ଯ୍ୟକ୍ରମର ଶୁଭାରମ୍ଭ କରାଯାଇଥିଲା । ଏହି ଉତ୍ସବରେ ବିଶ୍ୱବିଦ୍ୟାଳୟର ଆଞ୍ଚଳିକ ନିର୍ଦ୍ଦେଶକ ଡ. ରାଜେଶ କୁମାର ପାଢ଼ୀ ମୁଖ୍ୟ ଅତିଥି ଭାବେ ଯୋଗଦେଇ ନୂତନ ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇବା ସହ ଶୃଙ୍ଖଳା, ସେବା ମନୋଭାବ ଓ ନିଷ୍ଠାର ସହ ଏହି ମହାନ ନର୍ସିଂ ପେଷାକୁ ଆପଣେଇବାକୁ ଆହ୍ୱାନ ଦେଇଥିଲେ ।
ସେହିପରି ନର୍ସିଂ ବିଭାଗର ପ୍ରିନ୍ସିପାଲ ଡ. ଉର୍ମିଳା କାଟ୍ରୁ ସମ୍ମାନିତ ଅତିଥି ଭାବେ ଯୋଗଦେଇ ନର୍ସିଂ କ୍ଷେତ୍ରରେ ପାଠପଢ଼ାର ଗୁରୁତ୍ୱ ଓ ସ୍ୱାସ୍ଥ୍ୟସେବାରେ ନର୍ସମାନଙ୍କର ଅତୁଳନୀୟ ଯୋଗଦାନ ବିଷୟରେ ବୁଝାଇଥିଲେ। ଫାର୍ମାସୀ ବିଭାଗର ପ୍ରିନ୍ସିପାଲ ଡ. ଚନ୍ଦ୍ରଶେଖର ପାତ୍ର ମଧ୍ୟ ସମ୍ମାନିତ ଅତିଥି ଭାବେ ଯୋଗଦେଇ ନୂତନ ପାଠ୍ୟକ୍ରମର ଶୁଭେଚ୍ଛା ଜଣାଇବା ସହ ଆନ୍ତଃ-ବିଭାଗୀୟ ସହଯୋଗର ମହତ୍ତ୍ୱ ଉପରେ ଆଲୋକପାତ କରିଥିଲେ ।
ଏହି ଅବସରରେ ବରିଷ୍ଠ ଛାତ୍ରଛାତ୍ରୀଙ୍କ ଦ୍ୱାରା ମନୋରଞ୍ଜନଧର୍ମୀ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ସଂଗୀତ, ସାମ୍ପ୍ରତିକ ଓ ପାରମ୍ପରିକ ନୃତ୍ୟ ଏବଂ ନାଟକ ପ୍ରଦର୍ଶନ କରାଯାଇଥିଲା । ପ୍ରଥମ ଓ ତୃତୀୟ ସେମିଷ୍ଟାରର ଛାତ୍ରଛାତ୍ରୀଙ୍କ ମଧ୍ୟରେ ସମ୍ପର୍କ ସୁଦୃଢ଼ କରିବା ପାଇଁ ବିଭିନ୍ନ ପ୍ରତିଯୋଗିତା ଓ ରୋଚକ ଖେଳର ଆୟୋଜନ କରାଯାଇଥିଲା । ଶେଷରେ ଧନ୍ୟବାଦ ଅର୍ପଣ, ସାମୂହିକ ଭୋଜନ ଓ ସମୂହ ଆଲେଖ୍ୟ (ଗ୍ରୁପ ଫଟୋ) ପରେ କାର୍ଯ୍ୟକ୍ରମର ସାଙ୍ଗ ହୋଇଥିଲା ।
