ସମ୍ବଲପୁର, (୧୧/୦୬) : ଆପ୍ର : ଅଟୋକୁ ଧକ୍କା ଦେଲା ସଫାରୀ । ଚାଲିଗଲା ବାପ-ଝିଅଙ୍କ ଜୀବନ । ସମ୍ବଲପୁର ଧନୁପାଲି ଥାନା ଶଙ୍କର ମଠ ନିକଟରେ ମର୍ମନ୍ତୁଦ ଦୁର୍ଘଟଣା ଘଟିଛି ।
ଅଟୋରେ ବାପ-ଝିଅ ଘରକୁ ଫେରୁଥିବାବେଳେ ଏକ ସଫାରୀ ଗାଡି ଧକ୍କା ଦେଇଥିଲା । ପରେ ସଫାରୀ ଗାଡ଼ିଟି ଏକ ପୋଖରୀକୁ ଖସି ପଡିଥିଲା । ଅଟୋରେ ଥିବା ବାପା ରାସ୍ତା ଉପରେ ଛିଟିକି ପଡ଼ିଥିବା ବେଳେ ଝିଅ ଅଟୋରେ ଚାପି ହୋଇଯାଇଥିଲେ । ଉଭୟଙ୍କୁ ତୁରନ୍ତ ମେଡିକାଲ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ବିଳମ୍ବିତ ରାତିରେ ଏହି ଭୟଙ୍କର ଦୁର୍ଘଟଣା ଘଟିଛି ।
ମୃତକ ମାନେ ହେଲେ ସମ୍ବଲପୁର ଧନୁପାଲିର ୩୫ ବର୍ଷୀୟ ସୁରେନ୍ଦ୍ର ବେହେରା ଓ ତାଙ୍କ ୫ ବର୍ଷୀୟ ଝିଅ ଶୁଭଶ୍ରୀ ବେହେରା । ସୁରେନ୍ଦ୍ର ନିଜ ଅଟୋରେ ଝିଅକୁ ନେଇ ଘରକୁ ଫେରଥିଲେ। ଏହି ସମୟରେ ଶଙ୍କର ମଠ ପାଖରେ ଥିବା ରାସ୍ତା କଡ଼ ଏକ ଦୋକାନ ସାମ୍ନାରେ ଅଟୋ ଛିଡା କରିଥିଲେ । ତେବେ ପଛ ପଟୁ ଏକ ସଫାରୀ ଗାଡି ଦ୍ରୁତ ଗତିରେ ଆସି ଧକ୍କା ଦେବାରୁ ଅଟୋଟି ଚୁରମାର ହେବା ସହ ବାପ ଝିଅଙ୍କ ମୃତ୍ୟୁ ହୋଇଛି । ଅଟୋକୁ ଧକ୍କା ଦେବା ପରେ ସଫାରୀ ଗାଡି ପୋଖରୀ ଭିତରକୁ ପଶି ଯାଇଛି । ଏହା ସହ ସଫାରୀ ଡ୍ରାଇଭର ଘଟଣା ସ୍ଥଳରୁ ଫେରାର ହୋଇ ଯାଇଛି ।
