ମହାକାଳପଡ଼ା, (୨୦/୧୧) : ଆପ୍ର : ବାତ୍ୟା ‘ଅକଭାନ’ ପ୍ରଭାବରେ ଜାରି ରହିଛି ପ୍ରବଳ ବର୍ଷା । ବାସ ଠାରୁ ଚାଷ ଯାଏଁ ସବୁ କିଛି ବିପଦରେ । ବ୍ୟାପକ ଭାବେ ଚାଷ କ୍ଷତିଗ୍ରସ୍ତ ହେବା ଆଶଂକ ।
ଧାନ ଏବେ ଅମଳ ସମୟ । ବର୍ଷା ସହ ପବନ ହେଲେ ପାଣିରେ ଶୋଇଯିବ ପାଚିଲା ଧାନ । ଉଜୁଡ଼ି ଯିବ ବର୍ଷକର ଫସଲ। ଯାହାକୁ ନେଇ ଚିନ୍ତାରେ ଚାଷୀ । ଲଗାଣ ବର୍ଷା ସାଙ୍ଗକୁ ପବନର ବେଗ ବଢ଼ିଲେ ଜମିରେ ଥିବା ପାଚିଲା ଧାନ ଗଛ ଭାଙ୍ଗି ପାଣିରେ ଶୋଇପଡ଼ିବାର ଆଶଙ୍କା ରହିଛି । ଫଳରେ ଧାନ ଅମଳ କରିବା କଷ୍ଟକର ହେବା ସହ ଶସ୍ୟର ଗୁଣବତ୍ତା ମଧ୍ୟ ନଷ୍ଟ ହୋଇପାରେ । ଜମିରେ ପାଣି ଜମି ରହିଲେ ଧାନ ଫସଲ ପଚିଯିବା, ଗଜା ହେବା ଏବଂ ଅମଳରେ ବ୍ୟାପକ କ୍ଷତି ହେବାର ଭୟ ରହିଛି । ଏହାଦ୍ୱାରା ଚାଷୀଙ୍କ ବର୍ଷକର ପରିଶ୍ରମ ବ୍ୟର୍ଥ ହେବା ସହ ଆର୍ଥିକ କ୍ଷତିର ଆଶଙ୍କା ମଧ୍ୟ ବଢ଼ିପାରେ ।
କେବଳ ଧାନ ନୁହେଁ, ପନିପରିବା ଓ ଅନ୍ୟାନ୍ୟ ଫସଲ ମଧ୍ୟ ବାତ୍ୟାର ପ୍ରଭାବରେ କ୍ଷତିଗ୍ରସ୍ତ ହୋଇପାରେ । ଅତ୍ୟଧିକ ବର୍ଷା ଯୋଗୁଁ ଚାଷ ଜମିରେ ଜଳ ନିଷ୍କାସନ ସମସ୍ୟା ଦେଖାଦେଇପାରେ। ଅନ୍ୟପଟେ ଖୋଲା ସ୍ଥାନରେ ରଖାଯାଇଥିବା ଅମଳ ଧାନ ମଧ୍ୟ ଓଦା ହୋଇ ନଷ୍ଟ ହେବାର ଆଶଙ୍କା ରହିଛି । ଏଭଳି ସ୍ଥିତିରେ ଚାଷୀଙ୍କ ଚିନ୍ତା ଦୂର କରିବା ପାଇଁ କୃଷି ବିଭାଗର ପରାମର୍ଶ ଓ ସହାୟତା ଜରୁରୀ ହୋଇପଡ଼ିଛି । ଚାଷୀମାନେ ଅମଳ ହୋଇଥିବା ଧାନକୁ ସୁରକ୍ଷିତ ଓ ଶୁଖିଲା ସ୍ଥାନରେ ରଖିବା ସହ ଖୋଲାରେ ଥିବା ଫସଲକୁ ଘୋଡ଼ାଇ ରଖିବା ଆବଶ୍ୟକ । ଜମିରୁ ବର୍ଷାଜଳ ନିଷ୍କାସନ ପାଇଁ ମଧ୍ୟ ବ୍ୟବସ୍ଥା କରିବା ଦରକାର ।

