ଗଜପତି, (୨୧/୦୬) : ଆପ୍ର : ମହିଳାଙ୍କ ଠାରୁ ଏକକୋଟି ୩୮ଲକ୍ଷ ଠକାମୀ କରିଥିବା ମହିଳା ଗିରଫ । ପ୍ରାୟ ଦେଢ ବର୍ଷ ଧରି ଫେରାର ରହିବା ପରେ ଧୂର୍ତ୍ତ ମହିଳାଙ୍କୁ ଗିରଫ କଲା ପାରଳାଖେମୁଣ୍ଡି ଥାନା ପୋଲିସ ।
ବିଭିନ୍ନ ମହିଳାଙ୍କୁ ଅଧିକ ଲାଭ ଓ ଟଙ୍କା ଫେରସ୍ତର ମିଥ୍ୟା ପ୍ରତିଶ୍ରୁତି ଦେଇ ଅଭିଯୁକ୍ତ ଝିଲି ସାହୁ ଫେରାର ହୋଇଥିଲେ । ଠକେଇର ଶିକାର ହୋଇଥିବା ଜାଣିବା ପରେ ମହିଳାମାନେ ଥାନାରେ ଅଭିଯୋଗ କରିଥିଲେ । ପ୍ରାୟ ୨୫ଜଣ ମହିଳାଙ୍କ ଲିଖିତ ଅଭିଯୋଗ ପରେ ପୋଲିସ ମାମଲା ରୁଜୁ କରି ତଦନ୍ତ କରିଥିଲା । ସାକ୍ଷୀଙ୍କ ବୟାନ ରେକର୍ଡ ଏବଂ ସେମାନଙ୍କ ବ୍ୟାଙ୍କ କାରବାର ତଥ୍ୟ ସଂଗ୍ରହ କରିଥିଲା ପୋଲିସ ।
ବ୍ୟାଙ୍କ ଖାତା ଯାଞ୍ଚ ପରେ ଅଭିଯୁକ୍ତଏବଂ ତାଙ୍କ ପରିବାର ସଦସ୍ୟଙ୍କ ଖାତାରେ ବିପୁଳ ପରିମାଣର ଅର୍ଥ କାରବାର ହୋଇଥିବା ଏବଂ ପୀଡ଼ିତଙ୍କଠାରୁ ଆସିଥିବା ଅର୍ଥ ବିଭିନ୍ନ ଖାତାକୁ ସ୍ଥାନାନ୍ତରିତ ହୋଇଥିବା ଜଣାପଡ଼ିଥିବା ପୋଲିସ କହିଛି । ଅଭିଯୁକ୍ତ ଝିଲି ଓ ତାଙ୍କ ମାଆଙ୍କ ନାମରେ ଥିବା କିଛି ଅସ୍ଥାବର ସମ୍ପତ୍ତିର ତଥ୍ୟ ମଧ୍ୟ ଠାବ କରିଛି ପୋଲିସ । ଅଭିଯୁକ୍ତଙ୍କ ବିରୋଧରେ ଥାନାରେ ଆଉ ଦୁଇଟି ସମାନ ଢଙ୍ଗରେ ଠକେଇ ମାମଲା ରହିଛି । ଆଜି ତାକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା କହିଛନ୍ତି ପାରଳାଖେମୁଣ୍ଡି ଥାନା ଅଧିକାରୀ ।
