ବୋରିଗୁମ୍ମା, (୧୮/୬) : ଆପ୍ର : ବୋରିଗୁମ୍ମା ବ୍ଲକ ବିଜାପୁର ଗ୍ରାମରେ ଆଜି ଶୀତଳ ଷଷ୍ଠୀ ମହୋତ୍ସବ ଅବସରରେ ଶିବ ପାର୍ବତୀଙ୍କ ବିବାହ ଭକ୍ତି ଓ ଉତ୍ସାହର ସହ ଆଡ଼ମ୍ବର ପୂର୍ଣ୍ଣ ଭାବେ ପାଳିତ ହୋଇଛି ।
ବିଜାପୁର ଶିବ ମନ୍ଦିର ପରିଚାଳନା କମିଟି ତଥା ଗ୍ରାମବାସୀଙ୍କ ମିଳିତ ସହଯୋଗରେ ଆଡମ୍ବର ପୂର୍ଣ୍ଣ ଶୋଭାଯାତ୍ରା ସହ ବିବାହ କାର୍ଯ୍ୟ ସମ୍ପନ୍ନ ହୋଇ ଯାଇଛି । ଏହି ଅବସରରେ ବିଶେଷ ପୂଜାର୍ଚ୍ଚନା, ହୋମଯଜ୍ଞ, ଭଜନ-କୀର୍ତ୍ତନ ଏବଂ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଦିନସାରା ଭକ୍ତମାନଙ୍କର ଭିଡ଼ ମନ୍ଦିର ପରିସରରେ ଦେଖିବାକୁ ମିଳିଥିଲା।
ପରମ୍ପରା ଅନୁଯାୟୀ ଭଗବାନ ଶିବ ଓ ମାତା ପାର୍ବତୀଙ୍କ ଦିବ୍ୟ ବିବାହ ଉତ୍ସବ ବୈଦିକ ରୀତିନୀତିରେ ବ୍ରାହ୍ମଣ ପୁରୋହିତଙ୍କ ଦ୍ୱାରା ସମ୍ପନ୍ନ ହୋଇଥିଲା ।ସନ୍ଧ୍ୟା ସମୟରେ ସୁସଜ୍ଜିତ ଶୋଭାଯାତ୍ରା ବାହାରିଥିଲା, ଯେଉଁଥିରେ ବହୁ ସଂଖ୍ୟକ ଶ୍ରଦ୍ଧାଳୁ, ଯୁବକ ଓ ମହିଳାମାନେ ଯୋଗଦେଇଥିଲେ। ଭକ୍ତିଗୀତ, ବାଦ୍ୟବାଦନ ଓ ହର ହର ମହାଦେବ ଧ୍ୱନିରେ ସମଗ୍ର ଅଞ୍ଚଳ ପ୍ରକମ୍ପିତ ହୋଇଉଠିଥିଲା। ଉତ୍ସବ ଉପଲକ୍ଷେ ମନ୍ଦିର ଏବଂ ପ୍ରମୁଖ ରାସ୍ତାଗୁଡ଼ିକୁ ରଙ୍ଗୀନ ଆଲୋକମାଳା, ଫୁଲ ଓ ତୋରଣ ଦ୍ୱାରା ସଜାଯାଇଥିଲା। ସ୍ଥାନୀୟ ସାଂସ୍କୃତିକ ସଂଗଠନମାନଙ୍କ ପକ୍ଷରୁ ଭଜନ, ନୃତ୍ୟ ଓ ସଙ୍ଗୀତ କାର୍ଯ୍ୟକ୍ରମ ଆୟୋଜନ କରାଯାଇଥିଲା, ଯାହା ଦର୍ଶକମାନଙ୍କୁ ବିଶେଷ ଭାବେ ଆକର୍ଷିତ କରିଥିଲା।
ଶାନ୍ତିଶୃଙ୍ଖଳା ରକ୍ଷା ଏବଂ ଯାତାୟାତ ସୁବ୍ୟବସ୍ଥିତ କରିବା ପାଇଁ ସ୍ଥାନୀୟ ପ୍ରଶାସନ ଓ ପୁଲିସ ପକ୍ଷରୁ ଆବଶ୍ୟକ ବ୍ୟବସ୍ଥା କରାଯାଇଥିଲା । ସ୍ୱେଚ୍ଛାସେବୀମାନେ ମଧ୍ୟ ଭକ୍ତମାନଙ୍କୁ ସହଯୋଗ କରି ଉତ୍ସବକୁ ସୁଚାରୁ ରୂପେ ପରିଚାଳନା କରିଥିଲେ। ଶୀତଳ ଷଷ୍ଠୀ ଓଡ଼ିଶାର ଏକ ପ୍ରମୁଖ ଧାର୍ମିକ ଓ ସାଂସ୍କୃତିକ ପର୍ବ ହୋଇଥିବାବେଳେ ବୋରିଗୁମ୍ମାରେ ଏହାର ପାଳନ ସାମାଜିକ ଏକତା, ଭାଇଚାରା ଓ ଆଧ୍ୟାତ୍ମିକ ଚେତନାକୁ ଆହୁରି ସୁଦୃଢ଼ କରିଛି । ଉତ୍ସବର ସଫଳ ଆୟୋଜନକୁ ନେଇ ସ୍ଥାନୀୟ ଜନସାଧାରଣଙ୍କ ମଧ୍ୟରେ ସନ୍ତୋଷ ପ୍ରକାଶ ପାଇଛି ।
