ପୁରୀ, (୨୫/୦୮) : ଆପ୍ର : ପୁରୀ ଜିଲ୍ଲାପାଳଙ୍କ ଅଫିସ୍ ଘେରିଲା ଜିଲ୍ଲା ପାଚିକା ସଂଘ । ତିନି ମାସର ବକେୟା ଦରମା ପ୍ରଦାନ ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳର ଘେରିଛନ୍ତି ପାଚିକା ।
ଗତ ମେ ମାସରୁ ଚଳିତ ଅଗଷ୍ଟ ମାସ ପର୍ଯ୍ୟନ୍ତ ପାରିଶ୍ରମିକ ମିଳିନାହିଁ । ସ୍କୁଲ ଛୁଟି ଥିବା ଆଳ ଦେଖାଇ ବିଭାଗ ଏମାନଙ୍କ ଦରମା ଦେଇ ନାହିଁ । ରଜ ପରେ ଜୁନ୍ ୧୮ରୁ ସ୍କୁଲ ଖୋଲିଥିଲେ ମଧ୍ୟ ଜୁନ ମାସର ପାରିଶ୍ରମିକ ଏ ପର୍ଯ୍ୟନ୍ତ ପ୍ରଦାନ କରାଯାଇ ନ ଥିବା ଅଭିଯୋଗ ହୋଇଛି । ରାଜ୍ୟର ନୟାଗଡ଼ ଖୋର୍ଦ୍ଧା, ଭଦ୍ରକ ଓ ମୟୂରଭଂଜ ସମେତ ଆହୁରି ଅନେକ ଜିଲ୍ଲାରେ ପାଚିକା ସେମାନଙ୍କ ପ୍ରାପ୍ୟ ପାଇ ସାରିଛନ୍ତି। କିନ୍ତୁ ପୁରୀ ଜିଲ୍ଲାର ପାଚିକାଙ୍କୁ ଏ ପର୍ଯ୍ୟନ୍ତ ସେମାନଙ୍କ ପାରିଶ୍ରମିକ ଦିଆଯାଇ ନ ଥିବାରୁ ଅସନ୍ତୋଷ ପ୍ରକାଶ ପାଇଛି । ପିଏମ୍ ପୋଷଣ ଯୋଜନାରେ ନିଯୁକ୍ତ ପାଇଥିବା ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ହଜାର ହଜାର ପାଚିକା ସେମାନଙ୍କ ମାସିକ ୩ ହଜାର ଟଙ୍କା ପାରିଶ୍ରମିକ ପାଇନାହାନ୍ତି। ତୁରନ୍ତ ବକେୟା ଦରମା ପ୍ରଦାନ କରା ନ ଗଲେ ଆସନ୍ତା ୧ରୁ ବିଭିନ୍ନ ସ୍କୁଲ୍ ରେ ମଧ୍ୟାହ୍ନ ଭୋଜନ ବନ୍ଦ କରିବାକୁ ଚେତାବନୀ ଦେଇଛନ୍ତି ପାଚିକା। ଏହାସହ ମଣ୍ଡଳ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଧାରଣା ଦେବାକୁ ଚେତେଇ ଦେଇଛି ଜିଲ୍ଲା ପାଚିକା ସଂଘ।
