ରାୟଗଡା, (୨୫/୦୬) : ଆପ୍ର : ବିଶ୍ୱ ଭିଟିଲିଗୋ ଦିବସ ଅବସରରେ ସେଞ୍ଚୁରିଅନ ୟୁନିଭର୍ସିଟି ଅଫ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟ (CUTM), ରାୟଗଡା କ୍ୟାମ୍ପସର ସ୍କୁଲ ଅଫ ନର୍ସିଂ ପକ୍ଷରୁ ଜିଲ୍ଲା ମୁଖ୍ୟ ଚିକିତ୍ସାଳୟ (ଡିଏଚଏଚ), ରାୟଗଡାରେ ଏକ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଥିଲା ।
ଚଳିତ ବର୍ଷର ଥିମ୍ From Stigma to Strength ଉପରେ ଆଧାରିତ ଏହି କାର୍ଯ୍ୟକ୍ରମରେ ଭିଟିଲିଗୋ ରୋଗ ସମ୍ପର୍କରେ ସାଧାରଣ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରାଯାଇଥିଲା । ନର୍ସିଂ ଛାତ୍ରଛାତ୍ରୀ ମାନେ ଅଧ୍ୟାପକମାନଙ୍କ ତତ୍ତ୍ୱାବଧାନରେ ରୋଗୀ ଓ ସେମାନଙ୍କ ସହଯୋଗୀଙ୍କୁ ଭିଟିଲିଗୋର କାରଣ, ଲକ୍ଷଣ, ଚିକିତ୍ସା ଓ ଯତ୍ନ ସମ୍ପର୍କରେ ସଚେତନ କରିଥିଲେ । ଏହା ସହ ରୋଗକୁ ନେଇ ପ୍ରଚଳିତ ବିଭିନ୍ନ ଭ୍ରାନ୍ତ ଧାରଣା ଓ ଅନ୍ଧବିଶ୍ୱାସ ଦୂର କରିବା ଉଦ୍ଦେଶ୍ୟରେ ସ୍ୱାସ୍ଥ୍ୟ ଶିକ୍ଷା ପ୍ରଦାନ କରାଯାଇଥିଲା ।
କାର୍ଯ୍ୟକ୍ରମରେ ପ୍ରାୟ ୩୦ରୁ ୩୫ ଜଣ ରୋଗୀ ଓ ସେମାନଙ୍କ ସହଯୋଗୀ ଅଂଶଗ୍ରହଣ କରିଥିଲେ । ଭିଟିଲିଗୋ ସଂକ୍ରାମକ ନୁହେଁ ଏବଂ ଏହି ରୋଗରେ ପୀଡ଼ିତ ବ୍ୟକ୍ତିମାନଙ୍କ ପ୍ରତି ସାମାଜିକ ସମର୍ଥନ ଓ ସହାନୁଭୂତି ଆବଶ୍ୟକ ବୋଲି ଉପସ୍ଥିତ ଲୋକଙ୍କୁ ବୁଝାଯାଇଥିଲା । ପୋଷ୍ଟର ଓ ଶିକ୍ଷାମୂଳକ ସାମଗ୍ରୀ ମାଧ୍ୟମରେ ସଚେତନତା ବାର୍ତ୍ତା ପ୍ରଚାର କରାଯାଇଥିଲା । ଏହି କାର୍ଯ୍ୟକ୍ରମ ମାଧ୍ୟମରେ ଭିଟିଲିଗୋ ସମ୍ପର୍କରେ ଲୋକଙ୍କ ଜ୍ଞାନ ବୃଦ୍ଧି ପାଇବା ସହ ରୋଗକୁ ନେଇ ଥିବା କଳଙ୍କ ଓ ଭ୍ରମ ଦୂର କରିବାରେ ସହାୟକ ହୋଇଥିଲା । ସେଥିସହ ନର୍ସିଂ ଛାତ୍ରଛାତ୍ରୀ ମାନଙ୍କର ସ୍ୱାସ୍ଥ୍ୟ ଶିକ୍ଷା ଓ ସାମୁଦାୟିକ ସେବା କ୍ଷେତ୍ରରେ ବ୍ୟବହାରିକ ଦକ୍ଷତା ମଧ୍ୟ ବୃଦ୍ଧି ପାଇଥିଲା ।
