ଭୁବନେଶ୍ୱର, (୧୩/୧୧) : ଆପ୍ର : ନଭେମ୍ବର ୧୬ ତାରିଖ ସୋମବାର ଦିନିକିଆ ଓଡ଼ିଶା ଗସ୍ତରେ ଆସୁଛନ୍ତି ଭାରତର ଉପରାଷ୍ଟ୍ରପତି । ଏହି ଗସ୍ତ ଅବସରରେ ଭୁବନେଶ୍ୱର ଓ କଟକରେ ଆୟୋଜିତ ଦୁଇଟି ଗୁରୁତ୍ୱପୂର୍ଣ୍ଣ ସମାରୋହରେ ସେ ଯୋଗଦେବେ ।
ଏଥିପାଇଁ ଉପରାଷ୍ଟ୍ରପତି ସଚିବାଳୟ ପକ୍ଷରୁ ଗସ୍ତର ସମ୍ପୂର୍ଣ୍ଣ କାର୍ଯ୍ୟସୂଚୀ ପ୍ରକାଶ ପାଇଛି । ପ୍ରକାଶିତ ସୂଚନା ଅନୁଯାୟୀ, ସୋମବାର ସକାଳ ୬ଟା ୫୦ରେ ନୂଆଦିଲ୍ଲୀସ୍ଥିତ ଉପରାଷ୍ଟ୍ରପତି ଭବନରୁ ବାହାରିବେ । ସକାଳ ୭ଟା ୫ରେ ଦିଲ୍ଲୀ ବିମାନବନ୍ଦରରେ ପହଞ୍ଚିବା ପରେ ୭ଟା ୧୦ରେ ବାୟୁସେନାର ସ୍ୱତନ୍ତ୍ର ବିମାନରେ ଓଡ଼ିଶା ଅଭିମୁଖେ ଯାତ୍ରା କରିବେ । ସକାଳ ୯ଟା ୧୫ରେ ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ତାଙ୍କର ଆଗମନ ହେବ । ସେଠାରେ ସ୍ୱାଗତ ସମ୍ବର୍ଦ୍ଧନା ଓ ପରିଚୟ କାର୍ଯ୍ୟକ୍ରମ ପାଇଁ ୧୦ ମିନିଟ୍ ସମୟ ନିର୍ଦ୍ଧାରିତ ହୋଇଛି ।
ଏହାପରେ ସକାଳ ୯ଟା ୨୫ରେ ସଡ଼କପଥରେ ବାହାରି ୯ଟା ୪୫ରେ ମେଫେୟାର ସାଙ୍କ୍ଚୁଆରୀ କନଭେନସନ୍ ହଲ୍ରେ ପହଞ୍ଚିବେ । ସେଠାରେ ସକାଳ ୧୦ଟାରୁ ୧୧ଟା ୧୫ ପର୍ଯ୍ୟନ୍ତ ଆୟୋଜିତ ୧୭ତମ ଓଡ଼ିଶା ବିଧାନସଭାର ନବନିର୍ବାଚିତ ସଦସ୍ୟଙ୍କ ପ୍ରଶିକ୍ଷଣ କାର୍ଯ୍ୟକ୍ରମକୁ ଉଦ୍ଘାଟନ କରିବେ । ଭୁବନେଶ୍ୱରରେ ପ୍ରଥମ କାର୍ଯ୍ୟକ୍ରମ ଶେଷ କରି ସକାଳ ୧୧ଟା ୨୫ରେ କଟକ ଅଭିମୁଖେ ଯାତ୍ରା କରିବେ ଉପରାଷ୍ଟ୍ରପତି । ୧୧ଟା ୫୦ରେ ବିଦ୍ୟାଧରପୁର ଅରିଲୋସ୍ଥିତ ଶ୍ରୀଶ୍ରୀ ବିଶ୍ୱବିଦ୍ୟାଳୟ ପରିସରରେ ପହଞ୍ଚିବାର କାର୍ଯ୍ୟସୂଚୀ ରହିଛି । ମଧ୍ୟାହ୍ନ ୧୨ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ବିଶ୍ୱବିଦ୍ୟାଳୟର ନୂତନ ଆଇକନିକ୍ ଟାୱାର ବା ଏକାଡେମିକ୍ ବିଲ୍ଡିଂର ଉଦ୍ଘାଟନ କରିବେ ।
କଟକରେ କାର୍ଯ୍ୟକ୍ରମ ସରିବା ପରେ ଅପରାହ୍ନ ୧ଟା ୧୦ରେ ଭୁବନେଶ୍ୱର ବିମାନବନ୍ଦର ଅଭିମୁଖେ ସଡ଼କପଥରେ ବାହାରିବେ । ଅପରାହ୍ନ ୧ଟା ୫୫ରେ ବିମାନବନ୍ଦରରେ ପହଞ୍ଚିବା ପରେ ୧୦ ମିନିଟ୍ ଧରି ବିଦାୟ ସମ୍ବର୍ଦ୍ଧନା କାର୍ଯ୍ୟକ୍ରମ ରହିଛି । ଅପରାହ୍ନ ୨ଟା ୫ରେ ସ୍ୱତନ୍ତ୍ର ବିମାନ ଯୋଗେ ଦିଲ୍ଲୀ ଫେରିବେ । ସନ୍ଧ୍ୟା ୪ଟା ୩୦ରେ ଦିଲ୍ଲୀରେ ଅବତରଣ କରିବା ପରେ ୪ଟା ୫୦ରେ ଉପରାଷ୍ଟ୍ରପତି ଭବନରେ ପହଞ୍ଚିବେ ।
ସୁରକ୍ଷା ଓ ଟ୍ରାଫିକ୍ ପରିଚାଳନା ଉପରେ ରହିବ ଫୋକସ୍
ଉପରାଷ୍ଟ୍ରପତିଙ୍କ ଏହି ଗସ୍ତକୁ ଦୃଷ୍ଟିରେ ରଖି ଉଭୟ ଭୁବନେଶ୍ୱର ଓ କଟକରେ ପ୍ରଶାସନିକ ସ୍ତରରେ ପ୍ରସ୍ତୁତି ଜୋରଦାର ହେବା ଆଶା କରାଯାଉଛି । ବିଶେଷକରି ରାସ୍ତାଘାଟରେ ଯାତାୟାତ ନିୟନ୍ତ୍ରଣ, ସୁରକ୍ଷା ବ୍ୟବସ୍ଥା ଓ କାର୍ଯ୍ୟକ୍ରମସ୍ଥଳର ପ୍ରସ୍ତୁତିକୁ ଗୁରୁତ୍ୱ ଦିଆଯିବ ।
ଏହି ଗସ୍ତରେ ଗୋଟିଏ ପଟେ ଓଡ଼ିଶା ବିଧାନସଭାର ସଦସ୍ୟମାନଙ୍କ ପାଇଁ ତାଲିମ କାର୍ଯ୍ୟକ୍ରମର ଶୁଭାରମ୍ଭ ହେବାକୁ ଥିବାବେଳେ ଅନ୍ୟପଟେ ଶ୍ରୀଶ୍ରୀ ବିଶ୍ୱବିଦ୍ୟାଳୟର ନୂତନ ଏକାଡେମିକ୍ ଭିତ୍ତିଭୂମି ମଧ୍ୟ ଲୋକାର୍ପିତ ହେବ । ଏହି ଦୁଇଟି କାର୍ଯ୍ୟକ୍ରମ ଓଡ଼ିଶାର ବିଧାନସଭା ଓ ଉଚ୍ଚଶିକ୍ଷା କ୍ଷେତ୍ର ପାଇଁ ଗୁରୁତ୍ୱ ବହନ କରୁଛି ।
