ରାୟଗଡ଼ା, (୧୨/୧୧) : ଆପ୍ର : ବିଶ୍ୱ ନିମୋନିଆ ଦିବସ ଅବସରରେ ସେଞ୍ଚୁରିଅନ୍ ୟୁନିଭର୍ସିଟି ଅଫ୍ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟ (CUTM), ରାୟଗଡ଼ାର ସ୍କୁଲ୍ ଅଫ୍ ନର୍ସିଂ ପକ୍ଷରୁ ଆଜି ଏକ ନିମୋନିଆ ସଚେତନତା କାର୍ଯ୍ୟକ୍ରମ ସଫଳତାର ସହ ଆୟୋଜିତ ହୋଇଯାଇଛି ।
ଚଳିତ ବର୍ଷର ବିଷୟବସ୍ତୁ ଥିଲା “ନିମୋନିଆ ନିୟନ୍ତ୍ରଣର ଏକ ନୂତନ ଯୁଗ”। ଏହି କାର୍ଯ୍ୟକ୍ରମଟି ପ୍ରଥମ ସେମିଷ୍ଟର ବି.ଏସ୍.ସି. ନର୍ସିଂ ଏବଂ ପ୍ରଥମ ବର୍ଷ ଜି.ଏନ୍.ଏମ୍. ଛାତ୍ରଛାତ୍ରୀଙ୍କ ଦ୍ୱାରା ଅଧ୍ୟାପକ ଓ ଅଧ୍ୟାପିକାଙ୍କ ମାର୍ଗଦର୍ଶନରେ ଆୟୋଜନ କରାଯାଇଥିଲା । ନିମୋନିଆ ଏକ ପ୍ରତିରୋଧଯୋଗ୍ୟ ଏବଂ ଚିକିତ୍ସାଯୋଗ୍ୟ ରୋଗ ବୋଲି ସାଧାରଣ ଲୋକଙ୍କୁ ସଚେତନ କରିବା ଏହାର ମୁଖ୍ୟ ଉଦ୍ଦେଶ୍ୟ ଥିଲା । କାର୍ଯ୍ୟକ୍ରମରେ ଛାତ୍ରଛାତ୍ରୀମାନେ ଆକର୍ଷଣୀୟ ଚିତ୍ର ଓ ପୋଷ୍ଟର ମାଧ୍ୟମରେ ନିମୋନିଆର କାରଣ, ଲକ୍ଷଣ, ପ୍ରାଥମିକ ଯତ୍ନ ଏବଂ ପ୍ରତିରୋଧ ବିଷୟରେ ସଚେତନତା ସୃଷ୍ଟି କରିଥିଲେ ।
ଏହି ଅବସରରେ କାଶ, ଜ୍ୱର, ଛାତିରେ ଯନ୍ତ୍ରଣା, ଦ୍ରୁତ ଶ୍ୱାସକ୍ରିୟା ଏବଂ ଶ୍ୱାସ ନେବାରେ କଷ୍ଟ ଭଳି ନିମୋନିଆର ପ୍ରମୁଖ ଲକ୍ଷଣ ସମ୍ପର୍କରେ ଆଲୋକପାତ କରାଯାଇଥିଲା। ଏଥିସହ ତମାଖୁ ଧୂଆଁ, ଚୁଲିର ଧୂଆଁ ଏବଂ ଘର ଭିତରର ବାୟୁ ପ୍ରଦୂଷଣ ଭଳି ବିପଦଜନକ କାରକରୁ ଦୂରେଇ ରହିବାକୁ ପରାମର୍ଶ ଦିଆଯାଇଥିଲା । ନିମୋନିଆ ପ୍ରତିରୋଧ ପାଇଁ ଟିକାକରଣ, ଶିଶୁଙ୍କୁ ପ୍ରଥମ ଛଅ ମାସ ପର୍ଯ୍ୟନ୍ତ କେବଳ ମା’ କ୍ଷୀର ଖୁଆଇବା, ପୁଷ୍ଟିକର ଖାଦ୍ୟ ଗ୍ରହଣ, ହାତ ସଫା ରଖିବା ଏବଂ ରୋଗର ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରୀ ପରାମର୍ଶ ନେବା ଉପରେ ବିଶେଷ ଗୁରୁତ୍ୱ ଦିଆଯାଇଥିଲା ।
ଏହି ସଚେତନତା କାର୍ଯ୍ୟକ୍ରମ ଦ୍ୱାରା ନିମୋନିଆର ବିପଦଜନକ ଲକ୍ଷଣ ଓ ପ୍ରତିରୋଧ ଉପାୟ ସମ୍ପର୍କରେ ଲୋକଙ୍କ ଜ୍ଞାନ ବୃଦ୍ଧି ପାଇବା ସହ ଛାତ୍ରଛାତ୍ରୀମାନେ ନିଜ ପରିବାର ଓ ସ୍ଥାନୀୟ ଅଞ୍ଚଳରେ ସ୍ୱାସ୍ଥ୍ୟ ସଚେତନତା ବାର୍ତ୍ତା ପହଞ୍ଚାଇବାକୁ ଉତ୍ସାହିତ ହୋଇଥିଲେ । ଏଥିସହ ପ୍ରଥମ ବର୍ଷର ନର୍ସିଂ ଛାତ୍ରଛାତ୍ରୀଙ୍କ ମଧ୍ୟରେ ଯୋଗାଯୋଗ ଦକ୍ଷତା, ନେତୃତ୍ୱ ଗୁଣ ଏବଂ ଜନସ୍ୱାସ୍ଥ୍ୟ ସେବା ପ୍ରତି ଆଗ୍ରହ ବୃଦ୍ଧି ପାଇଥିଲା । କାର୍ଯ୍ୟକ୍ରମକୁ ସଫଳ କରିଥିବା ବି.ଏସ୍.ସି. ନର୍ସିଂ ଓ ଜି.ଏନ୍.ଏମ୍. ଛାତ୍ରଛାତ୍ରୀଙ୍କ ସହ ମାର୍ଗଦର୍ଶନ କରିଥିବା ଅଧ୍ୟାପକ ଓ ଅଧ୍ୟାପିକାମାନଙ୍କୁ ସଂସ୍ଥା ପକ୍ଷରୁ ଧନ୍ୟବାଦ ଜଣାଯାଇଛି ।
