ରେଢ଼ାଖୋଲ, (୨୬/୦୬) : ଆପ୍ର : ସଞ୍ଜ ନଇଁଲେ ଗାଁମୁହାଁ ମାଳମାଳ ହାତୀ । ଜଙ୍ଗଲରୁ ଆସି ଆତଙ୍କ ମଚାଇଛନ୍ତି । ଭୟଭୀତ ଅବସ୍ଥାରେ ଗାଁଲୋକେ ।
ଘରୁ ବାହାରି ପାରୁନାହାଁନ୍ତି । ନାକେଦମ ହେଲାଣି ବନବିଭାଗ । ସମ୍ବଲପୁର ଜିଲ୍ଲା ରେଢ଼ାଖୋଲ ବନଖଣ୍ଡ ବଡବାହାଳ ରେଞ୍ଜ କଦଳୀଗଡ ସେକ୍ସନରେ ବଣୁଆ ହାତୀପଲଙ୍କ ଉପଦ୍ରବ । ସଞ୍ଜ ନଇଁଲେ ଜଙ୍ଗଲରୁ ମାଳମାଳ ହାତୀ ଆସି ଗାଁରେ ଆମ୍ବ,ପଣସ,କଦଳୀ ଖାଇଦେବା ସହ ଗଛ ଭାଙ୍ଗି ନଷ୍ଟ କରୁଛନ୍ତି । ରାସ୍ତାରେ ଲୋକଙ୍କୁ ମାରିବାକୁ ଗୋଡାଉଛନ୍ତି । ହାତୀକୁ ନେଇ ସମଗ୍ର ଅଞ୍ଚଳରେ ଏକ ପ୍ରକାର କୋକୁଆ ଭୟ ସୃଷ୍ଟି ହୋଇଛି । ଲୋକେ ଘରୁ ପଦାକୁ ବାହାରିବା ପାଇଁ ଭୟ କରୁଛନ୍ତି । ସେପଟେ ବନବିଭାଗ ହାତୀ ଘଉଡାଇବାକୁ ଯାଇ ନାକେଦମ ହେଲାଣି । ବିଭିନ୍ନ ସମୟରେ ବନବିଭାଗ କର୍ମଚାରି ଗାଁରେ ଡାକବାଜି ଯନ୍ତ୍ର ମାଧ୍ୟମରେ ଲୋକଙ୍କୁ ସଚେତନ କରୁଛି ହେଲେ ହାତୀ ଉପଦ୍ରବରେ ଲୋକଙ୍କ କ୍ଷୟକ୍ଷତି କମୁନଥିବା ଅଭିଯୋଗ ହୋଇଛି ।
