ଭୁବନେଶ୍ୱର, (୧୫/୦୬) : ଆପ୍ର : ଇନଷ୍ଟାଗ୍ରାମରୁ ଫଟୋ ଚୋରି କରି ଚଳାଉଥିଲେ ସେକ୍ସ ରାକେଟ । ସୁନ୍ଦରୀ ଯୁବତୀଙ୍କ ଫଟୋ ଦେଖାଇ ଗ୍ରାହକଙ୍କୁ କରୁଥିଲେ ଟାର୍ଗେଟ ।
ବୁକିଂ ଚାର୍ଜ, କ୍ୟାବ୍ ଚାର୍ଜ ଓ ସର୍ଭିସ ଚାର୍ଜ ନାଁରେ ଆଦାୟ କରୁଥିଲେ ଟଙ୍କା । ରାଜଧାନୀରେ ସକ୍ରିୟ ଥିବା ଏଭଳି ଏକ ହାଇଟେକ୍ ଏସ୍କର୍ଟ ରାକେଟର ପର୍ଦ୍ଦାଫାସ କରିଛି ତମାଣ୍ଡୋ ଥାନା ପୋଲିସ । ଘଟଣାରେ ୪ ଜଣଙ୍କୁ ଗିରଫ କରିଛି ପୋଲିସ । ଅଭିଯୋଗକାରିଣୀ ଜଣେ ଯୁବତୀଙ୍କ ଫଟୋ ସହ ଅନ୍ୟାନ୍ୟ ଯୁବତୀଙ୍କ ଫଟୋକୁ ବିନା ଅନୁମତିରେ ସୋସିଆଲ ମିଡିଆ ଓ ମେସେଜିଂ ପ୍ଲାଟଫର୍ମରେ ବ୍ୟବହାର କରାଯାଉଥିଲା । ଏହି ଫଟୋଗୁଡ଼ିକୁ ଏସ୍କର୍ଟ ସର୍ଭିସ ବିଜ୍ଞାପନରେ ବ୍ୟବହାର କରି ଗ୍ରାହକଙ୍କୁ ପ୍ରଲୋଭିତ କରୁଥିଲେ ଅଭିଯୁକ୍ତ ।
ପରେ ଅନଲାଇନ ପେମେଣ୍ଟ ମାଧ୍ୟମରେ ଅଗ୍ରିମ ଟଙ୍କା ଆଦାୟ କରି ଠକୁଥିଲେ । ଡିଜିଟାଲ ତଦନ୍ତ ବେଳେ ପୋଲିସ ସ୍କ୍ରିନସଟ, ଚାଟ୍ ରେକର୍ଡ, ମୋବାଇଲ ନମ୍ବର ଓ ୟୁପିଆଇ କାରବାର ଯାଞ୍ଚ କରି ଗ୍ୟାଙ୍ଗରେ ସମ୍ପୃକ୍ତ ଉମାକାନ୍ତ ଦଳେଇ, ଚିତ୍ତରଞ୍ଜନ ମହାନ୍ତି, ତୋଫାନ ପ୍ରଧାନ ଓ କୁମାରୀ ମିଞ୍ଜିଙ୍କୁ ଗିରଫ କରିଛି । ସେମାନଙ୍କ ନିକଟରୁ ୯ଟି ମୋବାଇଲ ଫୋନ, ଗୋଟିଏ କାର, ସିମ୍ କାର୍ଡ, ବ୍ୟାଙ୍କ ଖାତା ତଥ୍ୟ ଓ ୟୁପିଆଇ ଟ୍ରାଞ୍ଜାକ୍ସନ ରେକର୍ଡ ଜବତ କରାଯାଇଛି । ବର୍ତ୍ତମାନ ଏହି ରାକେଟର ଅଧିକ ଲିଙ୍କ ଖୋଜୁଛି ପୋଲିସ ।
