ଗୁଣପୁର, (୨/୮) : ଆପ୍ର : ଗତକାଲି ଗଜପତି ଜିଲ୍ଲାର କାଶୀନଗର ଥାନା ଅନ୍ତର୍ଗତ କେ ସୀତାପୁର ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଥିଲା ।
ଏହି ଦୁର୍ଘଟଣା ରେ ଗଜପତି ଜିଲ୍ଲା ପୁଲିସର ଗୁଇନ୍ଦା ବିଭାଗରେ ଏଏସ୍ଆଇ ଭାବେ କାର୍ଯ୍ୟରତ ମନୋଜ କୁମାର ପାଢ଼ୀ ଙ୍କ ମୃତ୍ୟୁ ଘଟିଛି । ସୂଚନା ମୁତାବକ କାର୍ଯ୍ୟ ସାରି ଏଏସ୍ଆଇ ମନୋଜ କୁମାର ପାଢ଼ୀ ବାଇକ୍ ଯୋଗେ ପାରଳାଖେମୁଣ୍ଡି ରୁ ଗୁଣପୁର ନିଜ ଘର ଅଭିମୁଖେ ଫେରୁଥିବା ସମୟରେ କେ ସୀତାପୁର ନିକଟରେ ସାମ୍ନା ପଟରୁ ଆସୁଥିବା ଏକ ବାଇକ୍ ସହ ମୁହାଁମୁହିଁ ଧକ୍କା ହୋଇଥିଲା । ଧକ୍କା ଏତେ ଯୋରଦାର ଥିଲା ଯେ ମନୋଜ ଗୁରୁତର ଆହତ ହୋଇ ଘଟଣାସ୍ଥଳରେ ପ୍ରାଣ ହରାଇଥିଲେ । ଅନ୍ୟ ଦୁଇ ଆହତଙ୍କୁ ଗୁରୁତର ଅବସ୍ଥାରେ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି ।
ମନୋଜ ଙ୍କ ଅକାଳ ବିୟୋଗ ରେ ଗୁଣପୁର ସମେତ ରାୟଗଡା ଓ ଗଜପତି ଜିଲ୍ଲାରେ ଶୋକର ଛାୟା ଖେଳିଯାଇଛି । ମନୋଜ ଙ୍କ ପତ୍ନୀ ଜଣେ ଶିକ୍ଷୟିତ୍ରୀ ହୋଇଥିବା ବେଳେ ତାଙ୍କ ପୁଅ ଯୁକ୍ତ ଦୁଇ ରେ ଶିକ୍ଷା ଅର୍ଜନ କରୁଥିବା ସୂଚନା ମିଳିଛି । ମନୋଜ ଙ୍କ ମୃତ୍ୟୁ ଖବର ପାଇ ପରିବାରବର୍ଗ ସ୍ତବ୍ଧ ହୋଇଯାଇଥିବା ବେଳେ ସହକର୍ମୀ , ସ୍ଥାନୀୟ ବାସିନ୍ଦା ଓ ବନ୍ଧୁ ବର୍ଗ ଗଭୀର ଶୋକ ପ୍ରକାଶ କରିଛନ୍ତି । କାଶୀନଗର ପୁଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ବେଳେ ଦୂର୍ଘଟଣାର ତଦନ୍ତ କରୁଛି ।
