ବାଲିଗୁଡା, (୨୧/୦୯) : ଆପ୍ର : ନିଜକୁ ଆରଟିଓ ବିଭାଗର ମୋଟର ଭେହିକିଲ୍ ଇନ୍ସପେକ୍ଟର (ଏମଭିଆଇ) ପରିଚୟ ଦେଇ ଠକେଇ କରୁଥିବା ଅଭିଯୋଗରେ ଧର୍ମେନ୍ଦ୍ର କୁମାର ବେହେରା (୩୦)ଙ୍କୁ କନ୍ଧମାଳ ପୁଲିସ ଗିରଫ କରିଛି ।
ଚକାପାଦ ଥାନା ଅନ୍ତର୍ଗତ ଟୋଟାସାହିର ଧର୍ମେନ୍ଦ୍ର ଓରଫ ନିଖିଳ କୁମାର ପଟ୍ଟନାୟକ ନାମରେ ନିଜକୁ ପରିଚୟ ଦେଉଥୁବା ପୋଲିସ କହିଛି । ସାରଙ୍ଗଡ଼ ଥାନାରେ ରୁଜୁ ମାମଲା ଅନୁଯାୟୀ, ଜଣେ ମହିଳାଙ୍କୁ ସରକାରୀ ଚାକିରି କରାଇଦେବା ଓ ବିବାହର ପ୍ରତିଶ୍ରୁତି ଦେଇ ଅଭିଯୁକ୍ତ ବିଭିନ୍ନ କିସ୍ତିରେ ଫୋନ ପେ ମାଧ୍ଯମରେ ୭ ଲକ୍ଷ ୧୮ ହଜାର ୮୫୧ ଟଙ୍କା ନେଇଥିବା ଅଭିଯୋଗ ହୋଇଛି । ବିଶ୍ବସ୍ତ ସୂତ୍ର ରୁ ଖବର ପାଇ ପାବୁରିଆ ଛକରେ ଗାଡ଼ି ଯାଞ୍ଚ କରୁଥିବା ବେଳେ ତାଙ୍କୁ ଧରା ଯାଇଥିଲା । ସେ ସମୟରେ ସେ ଓଏମଭିଡି ୟୁନିଫର୍ମ ପିନ୍ଧିଥିବା ସହ ଗାଡ଼ିରେ କମଳା ଲାଇଟ୍ ଲଗାଇଥିଲେ ।
ତାଙ୍କଠାରୁ ୟୁନିଫର୍ମ, ନେମପ୍ଲେଟ୍, ଦୁଇଟି କାର୍, ମୋବାଇଲ୍ ଫୋନ୍, ବ୍ୟାଙ୍କ ପାସ୍ବୁକ୍ ଓ ଅନ୍ୟାନ୍ୟ କାଗଜପତ୍ର ଜବତ ହୋଇଛି।ପୋଲିସ ର ପ୍ରାଥମିକ ତଦନ୍ତ ଅନୁସାରେ ଅଭିଯୁକ୍ତ କନ୍ଧମାଳ ଓ ଗଞ୍ଜାମର ବିଭିନ୍ନ ସ୍ଥାନରେ ନକଲି ଏମଭିଆଇ ପରିଚୟରେ ଗାଡ଼ି ଯାଞ୍ଚ କରୁଥିବା ଜଣାପଡ଼ିଛି। ଏକାଧିକ ମହିଳାଙ୍କୁ ବିବାହ ପ୍ରତିଶ୍ରୁତି ଦେଇ ଠକେଇ କରିଥିବା ଅଭିଯୋଗ ମଧ୍ଯ ରହିଛି । ଏନେଇ ଆୟୋଜିତ ପ୍ରେସମିଟ୍ରେ କନ୍ଧମାଳ ଏସ୍ପି ରମେନ୍ଦ୍ର ପ୍ରସାଦ ସୂଚନା ଦେଇଛନ୍ତି । ଘଟଣାରେ ଆଉ କେହି କେହି ସମ୍ପୃକ୍ତି ଅଛନ୍ତି କି ନାହିଁ ଏବଂ ଅନ୍ୟ କେତେଜଣ ଠକେଇ ର ଶିକାର ହୋଇଛନ୍ତି । ସେ ସମ୍ପର୍କ ରେ ମଧ୍ଯ ତଦନ୍ତ ଜାରି ରହିଛି । ଗିରଫ ଅଭିଯୁକ୍ତଙ୍କୁ ବାଲିଗୁଡ଼ା କୋର୍ଟରେ ହାଜର କରାଯିବ ବୋଲି ଜଣାପଡ଼ିଛି ।
