ଆଳି, (୧୧/୦୬) : ଆପ୍ର : ନାବାଳିକା ଝିଅ ଖୋଲିଦେଲା ବାପାଙ୍କ ହତ୍ୟାର ଗୁମର। ବାପାଙ୍କୁ ମାରି ଦେଇଥିଲେ ମାମୁ । କେମିତି ମାରିଥିଲେ କହିଦେଲା ଝିଅ ।
କେନ୍ଦ୍ରାପଡ଼ା ଆଳିରେ ଶ୍ବଶୁର ଘରେ ଜ୍ବାଇଁର ସନ୍ଦେହ ଜନକ ମୃତ୍ୟୁ ଘଟଣାରେ ଚାଞ୍ଚଲ୍ୟକର ଖୁଲାସା । ସାମ୍ନାକୁ ଆସିଲା ମୃତକଙ୍କ ନାବାଳିକା ଝିଅର ସାଂଘାତିକ ବୟାନ । କାନ୍ଦି କାନ୍ଦି କହିଛି ଝିଅ । ବାପାଙ୍କ ହାତକୁ ପଛପଟୁ ବାନ୍ଧି ଦେଲେ ମାମୁ । ତଣ୍ଟିଚିପି ବିଷ ପିଆଇ ଦେଲେ। ତା ପରେ ଘୋଷାରି ଘୋଷାରି ନେଇ ବିଲରେ ପକାଇଦେଲେ । କେନ୍ଦ୍ରାପଡା ଜିଲ୍ଲା ଆଳି ଥାନା ଅନ୍ତର୍ଗତ ମାନପୁର ସେଠୀସାହିରେ ଶ୍ବଶୁର ଘରେ ଜ୍ବାଇଁ ବାବନ ସେଠୀଙ୍କ ମୃତ୍ୟୁ ଘଟିଥିଲା ।
ଗତ ୨ ତାରିଖ ରାତିରେ ଶ୍ୱଶୁର ଘର ଠାରୁ କିଛି ଦୂରରେ ବାବନ ସେଠୀଙ୍କ ମୃତଦେହ ଉଦ୍ଧାର କରାଯାଇଥିଲା । ଏରଡ଼ଙ୍ଗ ଗାଁ’ର ବାବନ ସେଠୀ ପ୍ରାୟ ୨ବର୍ଷ ହେବ ମାନପୁର-ସେଠୀସାହିରେ ନିଜ ପରିବାର ସହ ଶ୍ବଶୁର ଘରେ ରହିଆସୁଥିଲେ । ଶଶୁରଘର ଲୋକେ ତାଙ୍କ ପୁଅକୁ ମାରିଦେଇଥିବା ବାବନ ସେଠୀଙ୍କ ମାଆ ଆଳି ଥାନାରେ ଏତଲା ଦେଇଥିଲେ । ଆଳି ଥାନା ଅଧିକାରୀ ଙ୍କୁ ଭେଟି କାର୍ଯ୍ୟାନୁଷ୍ଠାନ ଦାବି କରିଛନ୍ତି । ପୂର୍ବରୁ ଅଭିଯୋଗକୁ ଖଣ୍ଡନ କରିଥିଲେ ମୃତ ବାବନ ସେଠୀଙ୍କ ଶାଳା ପ୍ରଶାନ୍ତ ସେଠୀ ଓ ପତ୍ନୀ ପ୍ରତିମା । ଅନ୍ୟପଟେ ପୋଷ୍ଟମଟମ ରିପୋର୍ଟ ଆସିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ସୂଚନା ଦେଇଛି ।
