ରାଇକିଆ, (୩୧/୧୦) : ଆପ୍ର : ଭୟଙ୍କର ବନ୍ୟା ଓ ଭୂସ୍ଖଳନ ମଧ୍ୟରେ ଅଗ୍ନିଶମ ବାହିନୀର ଅଦମ୍ୟ ସାହସ । କାଦୁଅରେ ଆଣ୍ଠୁ ପୋତି ହେଉଯାଉଛି ।
କିନ୍ତୁ ଏହାରି ଭିତରେ ମଧ୍ୟ ପଛକୁ ହଟୁ ନାହାଁନ୍ତି ଉଦ୍ଧାକାରୀ ଟିମ୍ । ଆଣ୍ଠୁଏ କାଦୁଅ ଓ ଭରା ପାଣି ଭିତରେ ପଶି ରେସ୍କ୍ୟୁ ଅପରେସନ୍ କରୁଛନ୍ତି କନ୍ଧମାଳ ଜିଲ୍ଲା ରାଇକିଆର ଅଗ୍ନିଶମ ବାହିନୀ । ପ୍ରବଳ ବର୍ଷା ପରେ ଭୂସ୍ଖଳନ ପ୍ରଭାବିତ ଅଞ୍ଚଳରୁ ୬୦ ଜଣଙ୍କୁ ଉଦ୍ଧାର କରାଯାଇଛି । କନ୍ଧମାଳ ଜିଲ୍ଲା ରାଇକିଆ ଅଗ୍ନିଶମ କେନ୍ଦ୍ରର କର୍ମଚାରୀ ରାଇକିଆ ବ୍ଲକ ମାଣିକେଶ୍ୱରୀ ପଞ୍ଚାୟତର କୁରୁପଦା ଗାଁରେ ଭୂସ୍ଖଳନ ପ୍ରଭାବିତ ଅଞ୍ଚଳରୁ ଶିଶୁ ଓ ବୟସ୍କ ବ୍ୟକ୍ତିଙ୍କ ସମେତ ପ୍ରାୟ ୬୦ ଜଣ ଲୋକଙ୍କୁ ଉଦ୍ଧାର କରିଛନ୍ତି । ପ୍ରବଳ ବର୍ଷା ମଧ୍ୟରେ ଏହି ଉଦ୍ଧାର କାର୍ଯ୍ୟ କରାଯାଇଥିଲା । ଭୂସ୍ଖଳନ, ଖସଡ଼ା ଓ କାଦୁଅ ରାସ୍ତା ଏବଂ କଷ୍ଟକର ପାହାଡ଼ିଆ ଅଞ୍ଚଳରେ କଷ୍ଟକର ପରିସ୍ଥିତି ମଧ୍ୟରେ ଉଦ୍ଧାର କରିଛି ଟିମ୍ ।
ସମସ୍ତ ବାଧା ସତ୍ତ୍ୱେ, ଅଗ୍ନିଶମ କର୍ମଚାରୀମାନେ ଫସି ରହିଥିବା ଲୋକମାନଙ୍କ ନିକଟରେ ପହଞ୍ଚିବା ପାଇଁ ପ୍ରାୟ ୫ କି.ମି ଦୁର୍ଗମ ପାହାଡ଼ିଆ ଅଞ୍ଚଳ ଅତିକ୍ରମ କରିଥିଲେ । ପ୍ରଭାବିତ ଅଞ୍ଚଳର ବିପଦପୂର୍ଣ୍ଣ ସ୍ଥାନ ଏବଂ ପାଣିର ସ୍ରୋତକୁ ଅତିକ୍ରମ କରିବା ପାଇଁ ଟିମ୍ ରଶିର ବ୍ୟବହାର କରିଥିଲା । ଅସାଧାରଣ ସାହସ, ନିଷ୍ଠା ଏବଂ ଦୃଢ଼ ସଂକଳ୍ପ ପ୍ରଦର୍ଶନ କରି ଅଗ୍ନିଶମ କର୍ମଚାରୀମାନେ ଶିଶୁ ଓ ବୟସ୍କ ବ୍ୟକ୍ତିଙ୍କ ସମେତ ପ୍ରାୟ ୬୦ ଜଣ ଲୋକଙ୍କୁ ସୁରକ୍ଷିତ ଭାବେ ସ୍ଥାନାନ୍ତର କରିବାରେ ସଫଳ ହୋଇଛନ୍ତି ।
