ସମ୍ବଲପୁର, (୦୬/୦୬) : ଆପ୍ର : ସମ୍ବଲପୁରର ମୁଦିପଡା ପାଣିଟାଙ୍କି ପଡାରେ ଥିବା ମୁଖ୍ୟ କଲଭର୍ଟ ନିର୍ମାଣର ୨ ଦିନ ମଧ୍ୟରେ ଦବି ଯାଇଛି ।
ଅତ୍ୟନ୍ତ ନିମ୍ନମାନର ନିର୍ମାଣ ଯୋଗୁଁଁ ଏହି ପ୍ରମୁଖ କଲଭର୍ଟ (ସ୍ପର୍ଶ ନର୍ସିଂହୋମ ସମ୍ମୁଖ)ଟି ଗତ ମଙ୍ଗଳବାର ନିର୍ମାଣ ହୋଇଥିବା ବେଳେ ଗୁରୁବାର ରାତ୍ରିରେ ଏହା ଦବି ଯାଇଛି । ଫଳରେ ଅଞ୍ଚଳରୁ ଆବର୍ଜନା ଜଳ ନିଷ୍କାସିତ ହୋଇ ପାରୁ ନ ଥିବା ବେଳେ ଉକ୍ତ କଲଭର୍ଟ ତଳ ଦେଇ ଯାଇଥିବା ପାନୀୟ ଜଳ ପାଇପ ମଧ୍ୟ ଭାଙ୍ଗି ଯାଇ ପାନୀୟ ଜଳ ଯୋଗାଣ ମଧ୍ୟ ବାଧିତ ହୋଇଛି । ଆଜି ସକାଳୁ ଅବସ୍ଥା ଏଭଳି ହୋଇଥିଲା ଯେ, କିଛି ଅଞ୍ଚଳବାସୀ ବାଧ୍ୟ ହୋଇ ଜଳ ନିଷ୍କାସନ ପାଇଁ ଉକ୍ତ କଲର୍ଭଟ ନିକଟସ୍ଥ ଅଞ୍ଚଳକୁ ନିଜେ ସଫେଇ କରିଛନ୍ତି । ପୁର୍ବରୁ ବର୍ଷା ଜଳ ଯିବାରେ ବାଧିତ ହେଉଥିବା ବେଳେ ଏବେ ନିମ୍ନମାନ ଏବଂ ତ୍ରୁଟିପୁର୍ଣ୍ଣ ନିର୍ମାଣ ଯୋଗୁଁଁ ନାଳ ଜଳ ମଧ୍ୟ ନିଷ୍କାସନରେ ଅସୁବିଧା ହେଉଛି ।
ଅପରପକ୍ଷରେ ଏହି ଘଟଣା ସମ୍ପର୍କରେ ନିଗମ କମିଶନର ରେହାନ ଖତ୍ରୀଙ୍କୁ ପଚରାଯିବାରୁ ଏ ସଂକ୍ରାନ୍ତରେ ବୁଝିକି କହିବେ ବୋଲି କହିଥିଲେ। ତେବେ ଏହି ନିର୍ମାଣରେ କେତେ ଟଙ୍କା ଖର୍ଚ୍ଚ ହୋଇଛି, ପୁନଃ ନିର୍ମାଣ ଠିକାଦାର ଦ୍ୱାରା କରାଯିବ କି ନିଗମ ପୁଣି ଥରେ ଖର୍ଚ୍ଚ କରିବ ଆଦି ବିଭିନ୍ନ ପ୍ରଶ୍ନକୁ ନିଗମ କମିଶନର ଏଡାଇ ଯାଇଛନ୍ତି । ଅପରପକ୍ଷରେ ଅନଭିଜ୍ଞ ଠିକାଦାର, ଦାୟିତ୍ୱହୀନ କାର୍ଯ୍ୟ ପାଇଁ ବିଗତ ବର୍ଷ ଭଲ ଭାବରେ ନିର୍ମିତ ଏହି ରାସ୍ତାଟି ଏବେ ଖାଲଖମାରେ ଭର୍ତ୍ତି ହୋଇଯାଇଛି । ଭୁଲ ନିର୍ମାଣ ଯୋଗୁଁଁ ଏବେ ପାଣିଟାଙ୍କିପଡାର ଶହ ଶହ ପରିବାର ବର୍ଷା ଋତୁରେ କଣ ଅବସ୍ଥା ହେବ ବୋଲି ଚିନ୍ତିତ ରହିଛନ୍ତି । ଯଦି ତୁରନ୍ତ ଏହାକୁ ଠିକ କରା ନ ଯାଏ, ତାହା ହେଲେ ଆଗାମୀ ଦିନରେ ଆନ୍ଦୋଳନ କରିବାକୁ ବାଧ୍ୟ ହେବେ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି ।
