ଭୁବନେଶ୍ୱର, (୦୬/୦୧) : ଆପ୍ର : ଆସନ୍ତାକାଲିଠୁ ନୂଆ ତେଲ ନିୟମ । ଜୁନ୍ ୧ ତାରିଖଠାରୁ ପେଟ୍ରୋଲ, ଡିଜେଲ ଏବଂ ଆଭିଏସନ ଟରବାଇନ ଫୁଏଲ ବା ବିମାନ ଇନ୍ଧନ ଉପରୁ ରପ୍ତାନି ଶୁଳ୍କ ହ୍ରାସ କରିବାକୁ ଘୋଷଣା କରିଛନ୍ତି କେନ୍ଦ୍ର ସରକାର ।
ଆନ୍ତର୍ଜାତୀୟ ବଜାରରେ ଇନ୍ଧନ ଦର ହ୍ରାସ ପାଇବା ପରେ ସରକାର ଏହି ପଦକ୍ଷେପ ନେଇଛନ୍ତି । ପ୍ରତି ୧୫ ଦିନରେ ହେଉଥିବା ସମୀକ୍ଷା ଆଧାରରେ ଅର୍ଥ ମନ୍ତ୍ରାଳୟ ପକ୍ଷରୁ ଏହି ନୂଆ ନିର୍ଦ୍ଦେଶନାମା ଜାରି କରାଯାଇଛି । ଦେଶ ଭିତରେ ବିକ୍ରି ହେଉଥିବା ପେଟ୍ରୋଲ ଓ ଡିଜେଲର ଉତ୍ପାଦ ଶୁଳ୍କରେ କୌଣସି ପରିବର୍ତ୍ତନ କରାଯାଇ ନାହିଁ । ରିଲାଏନ୍ସ, IOCL, BPCL ଭଳି ପ୍ରମୁଖ ତେଲ କମ୍ପାନୀଗୁଡ଼ିକର ରପ୍ତାନି ଲାଭ ବୃଦ୍ଧି ପାଇବ । ଏହାଦ୍ୱାରା ଆଗାମୀ ଦିନରେ ଭାରତରୁ ଅଧିକ ପରିମାଣର ଡିଜେଲ ଓ ବିମାନ ଇନ୍ଧନ ବାହାର ଦେଶକୁ ରପ୍ତାନି ହୋଇପାରେ ।
ଏହା କେବଳ ରପ୍ତାନି ଶୁଳ୍କ ହୋଇଥିବାରୁ, ଦେଶର ସାଧାରଣ ପେଟ୍ରୋଲ ପମ୍ପରେ ମିଳୁଥିବା ତେଲ ଦର ଉପରେ ଏହାର କୌଣସି ସିଧାସଳଖ ପ୍ରଭାବ ପଡ଼ିବ ନାହିଁ । ଦେଶରେ ପେଟ୍ରୋଲ-ଡିଜେଲ ଦର ସ୍ଥିର ରହିବ । ଶୁଳ୍କ କମିବା ଦ୍ୱାରା ସରକାରଙ୍କ ୱିଣ୍ଡଫଲ୍ ଟ୍ୟାକ୍ସ ସଂଗ୍ରହ କିଛି ମାତ୍ରାରେ କମିପାରେ, କିନ୍ତୁ ଏହା ରପ୍ତାନି ହେଉଥିବା ତେଲର ପରିମାଣ ଉପରେ ନିର୍ଭର କରେ । ଆନ୍ତର୍ଜାତୀୟ ବଜାରର ସ୍ଥିତିକୁ ଦେଖି ସରକାର ଜୁନ୍ ମଧ୍ୟଭାଗରେ ପୁଣିଥରେ ଏହି ଦରର ସମୀକ୍ଷା କରିବେ । ଘରୋଇ ଆବଶ୍ୟକତା ଏବଂ ବିଶ୍ୱ ବଜାର ମଧ୍ୟରେ ସନ୍ତୁଳନ ରକ୍ଷା କରିବା ପାଇଁ ସରକାର ଏହି ନୀତି ଆପଣେଇଛନ୍ତି ।
