କଣ୍ଟାବାଞ୍ଜି, (୨୦/୦୬) : ଆପ୍ର : ଜମିର ମରାମତି କରୁଥିବାବେଳେ ଚାରି ଜଣ ଡ୍ରାଇଭରଙ୍କୁ ନିସ୍ତୁକ ମାଡ ମାରି ତିନୋଟି ଟ୍ରାକ୍ଟର ଓ ଗୋଟିଏ ଜେସିବିକୁ ନିଆଁ ଲଗାଇଲେ ଚାଳିଶ ଜଣ ଦୁର୍ବୃତ୍ତ ।
ଏଭଳି ଘଟଣା ଘଟିଛି ବଙ୍ଗୋମୁଣ୍ଡା ଥାନା ଛତ୍ରଙ୍ଗ ଗାଁ’ରେ । ନୂଆପଡା ଜିଲ୍ଲା ତୁକଲା ଗାଁର ଫକୀରମୋହନ ଜଗତଙ୍କର ଚାଷ ଜମି ରହିଛି ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ଛତ୍ରଙ୍ଗ ଗାଁରେ । ଜମି ମରାମତି କରୁଥିବା ବେଳେ ଜମି ବିବାଦକୁ କେନ୍ଦ୍ରକରି ନିଆଁ ଲଗାଇଥିବା ଜଣାପଡିଛି । ଘଟଣାସ୍ଥଳରେ ଉତ୍ତେଜନା ଦେଖିବାକୁ ମିଳିଛି । ଜମି ହଡପ କରିବାକୁ ସେହି ଗାଁର କିଛି ଜଣ ଜାଲିଆତି କରିଥିଲେ । ଏନେଇ ଜମି ମାଲିକ କୋର୍ଟର ଆଶ୍ରୟ ନେଇଥିଲେ ।
ଏବେ ମାମଲା କୋର୍ଟରେ ସିଭିଲ କେଶ ଚାଲୁଅଛି । ଆଗକୁ ଚାଷ କରିବାକୁ ଜମି ମାଲିକ ଜଣକ ଭଡା ସୂତ୍ରରେ ତିନୋଟି ଟ୍ରାକ୍ଟର ଓ ଗୋଟିଏ ଜେସିବିରେ ଜମିରେ କାମ କରୁଥିବା ବେଳେ ହଠାତ ଗାଁର ଚାଳିଶ ଜଣ ଅସ୍ତ୍ରଶସ୍ତ୍ର ଧରି ମାଡ଼ ମାରିବା ସହ ଆକ୍ରମଣ କରିଥିଲେ ଏବଂ ଗାଡିକୁ ନିଆଁ ଲଗାଇଦେଇଥିବା ନେଇ ବଙ୍ଗୋମୁଣ୍ଡା ଥାନାରେ ଲିଖିତ ଅଭିଯୋଗ କରିଛନ୍ତି । ଘଟଣାସ୍ଥଳରେ ବଙ୍ଗୋମୁଣ୍ଡା ପୋଲିସ ଓ ଅଗ୍ନିଶମ ବିଭାଗ ପକ୍ଷରୁ ନିଆଁ ଲିଭାଇବା ପାଇଁ ଉଦ୍ୟମ ଚାଲିଥିବା ଦେଖିବାକୁ ମିଳିଛି ।
