ରାୟଗଡା, (୨୮/୦୬) : ଆପ୍ର : ଜାତୀୟ ପୋଲିଓ ଟିକାକରଣ ଦିବସ-୨୦୨୬ ଅବସରରେ ଇଣ୍ଟେନ୍ସିଫାଇଡ୍ ପଲ୍ସ ପୋଲିଓ ଇମ୍ୟୁନାଇଜେସନ୍ (ଆଇପିପିଆଇ) କାର୍ଯ୍ୟକ୍ରମର ଜିଲ୍ଲାସ୍ତରୀୟ ଉଦ୍ଘାଟନୀ ସମାରୋହ ଆଜି ରାୟଗଡା ମୁଖ୍ୟ ଚିକିତ୍ସାଳୟ ଠାରେ ଅନୁଷ୍ଠିତ ହୋଇଯାଇଛି ।
ଅତିରିକ୍ତ ଜିଲ୍ଲାପାଳ (ସାଧାରଣ) ଶ୍ରୀ ନବୀନ ଚନ୍ଦ୍ର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଶିଶୁମାନଙ୍କୁ ମୌଖିକ ପୋଲିଓ ଟିକା ପ୍ରଦାନ କରି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଏହି ଅବସରରେ ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଡା. ନାଗେନ୍ଦ୍ରନାଥ ମହାପାତ୍ର, ଅତିରିକ୍ତ ଜିଲ୍ଲା ଚିକିତ୍ସା ଅଧିକାରୀ ଡା. ପ୍ରଶାନ୍ତ କୁମାର ମିଶ୍ର, ପରିବାର କଲ୍ୟାଣ ଅତିରିକ୍ତ ଜିଲ୍ଲା ଚିକିତ୍ସା ଅଧିକାରୀ ଡା. କିଶୋର ଚନ୍ଦ୍ର ବାରାଇ, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ (ଭାରପ୍ରାପ୍ତ) ଶ୍ରୀ ଦେବରାଜ ଟାକ୍ରୀ ଏବଂ ଅନ୍ୟାନ୍ୟ ଚିକିତ୍ସକ, ନର୍ସ, ଅଙ୍ଗନୱାଡ଼ି କର୍ମୀ ଓ ଆଇପି କର୍ମଚାରୀମାନେ ଉପସ୍ଥିତ ଥିଲେ ।
ମୁଖ୍ୟ ଅତିଥି ଶ୍ରୀ ନାୟକ ତାଙ୍କ ବକ୍ତବ୍ୟରେ ପୋଲିଓ ମୁକ୍ତ ଭାରତ ଗଠନ ଦିଗରେ ସରକାରଙ୍କ ଉଦ୍ୟମକୁ ସଫଳ କରିବା ପାଇଁ ସମସ୍ତଙ୍କ ସହଯୋଗ ଆହ୍ୱାନ କରିଥିଲେ। ସେ କହିଥିଲେ ଯେ, କୌଣସି ଶିଶୁ ଯେପରି ପୋଲିଓ ଟିକାକରଣରୁ ବଞ୍ଚିତ ନ ରୁହନ୍ତି, ସେଥିପ୍ରତି ବିଶେଷ ଯତ୍ନ ନେବା ଆବଶ୍ୟକ । ସିଡିଏମ୍ ଓ ପିଏଚଓ ଡା. ନାଗେନ୍ଦ୍ରନାଥ ମହାପାତ୍ର ସୂଚନା ଦେଇଥିଲେ ଯେ, ରାୟଗଡ଼ ଜିଲ୍ଲାରେ ପ୍ରାୟ ୫ ବର୍ଷରୁ କମ୍ ବୟସର ୧ ଲକ୍ଷ ୧୧ ହଜାର ୧୭୧ ଜଣ ଶିଶୁଙ୍କୁ ମୌଖିକ ପୋଲିଓ ଟିକା ପ୍ରଦାନ କରିବା ଲକ୍ଷ୍ୟ ରଖାଯାଇଛି ।
ଏଥିପାଇଁ ଜିଲ୍ଲାରେ ୧୦୩୨ଟି ବୁଥ୍, ୩୪ଟି ଟ୍ରାନ୍ଜିଟ୍ ଟିମ୍ ଏବଂ ୨୩ଟି ମୋବାଇଲ୍ ଟିମ୍ ଗଠନ କରାଯାଇଛି । କାର୍ଯ୍ୟକ୍ରମର ସଫଳ ପରିଚାଳନା ପାଇଁ ୨୦୬୪ ଜଣ କର୍ମଚାରୀ, ୧୨୬ ଜଣ ସୁପରଭାଇଜର ଓ ୫୧ଟି ଅତିରିକ୍ତ ଯାନବାହନ ନିୟୋଜିତ କରାଯାଇଛି। କାର୍ଯ୍ୟକ୍ରମର ପ୍ରଥମ ଦିନ ଅର୍ଥାତ୍ ଆଜି ସମସ୍ତ ବୁଥ୍ରେ ୫ ବର୍ଷରୁ କମ୍ ବୟସର ଶିଶୁମାନଙ୍କୁ ମୌଖିକ ପୋଲିଓ ଟିକା ପ୍ରଦାନ କରାଯାଉଛି । ଦ୍ୱିତୀୟ ଓ ତୃତୀୟ ଦିନରେ ସ୍ୱାସ୍ଥ୍ୟ କର୍ମୀ ଓ ମୋବାଇଲ୍ ଟିମ୍ ମାନଙ୍କ ଦ୍ୱାରା ଘରକୁ ଘର ଯାଇ ଶିଶୁମାନଙ୍କୁ ମୌଖିକ ପୋଲିଓ ଟିକା ପ୍ରଦାନ କରାଯିବ। କାର୍ଯ୍ୟକ୍ରମରେ ଉପସ୍ଥିତ ସମସ୍ତ ଅଭିଭାବକଙ୍କୁ ନିଜ ଶିଶୁମାନଙ୍କୁ ପୋଲିଓ ଟିକା ଦେବା ସହ ଅନ୍ୟମାନଙ୍କୁ ମଧ୍ୟ ସଚେତନ କରିବା ପାଇଁ ଆହ୍ୱାନ କରାଯାଇଥିଲା । ଜିଲ୍ଲାର ସମସ୍ତ ଚିକିତ୍ସକ, ନର୍ସ, ଅଙ୍ଗନୱାଡ଼ି କର୍ମୀ ଓ ଆଇପି କର୍ମଚାରୀମାନେ କାର୍ଯ୍ୟକ୍ରମର ସଫଳ ରୂପାୟନ ନିମନ୍ତେ ସକ୍ରିୟ ଭାବେ ଅଂଶଗ୍ରହଣ କରିଛନ୍ତି ।
