Advertisements
Wednesday, July 8, 2020
Home Children Issue ଦୁଆ ନାଁ କାମ ଆୟା ନାଁ ଦବା-ଆଖି ବୁଜିଲେ ସାଲେପୁର ଦୁଷ୍କର୍ମ ପିଡ଼ୀତା

ଦୁଆ ନାଁ କାମ ଆୟା ନାଁ ଦବା-ଆଖି ବୁଜିଲେ ସାଲେପୁର ଦୁଷ୍କର୍ମ ପିଡ଼ୀତା

ଭୁବନେଶ୍ୱର(ଦେବଦତ୍ତ ରଥ):ଦୁଆ ନାଁ କାମ ଆୟା ନାଁ ଦବା।ପ୍ରାର୍ଥନା କାମ ଦେଲାନି କି ଔଷଧ କାମ ଦେଲାନି।୮ ଦିନ କାଳ ମୃତ୍ୟୁ ସହ ସଂଗ୍ରାମ କରି କରି ଶେଷରେ ଆଖି ବୁଜିଲା ୬ ବର୍ଷର ଦୁଷ୍କର୍ମ ପିଡ଼ୀତା ସାଲେପୁର ନାବାଳିକା।ଡାକ୍ତର ତାକୁ ବଞ୍ଚାଇ ପାରିଲେନି କି ଦୀପଦାନ ତା’ ପାଇଁ କିଛି କାମ କରିଲାନି।ଠିକ୍ ଯେପରି ଦିଲ୍ଲୀରେ ଘଟିଥିଲା ନିର୍ଭୟା କାଣ୍ଡ ଘଟଣାରେ।ଡାକ୍ତରଙ୍କ ଶକ୍ତ ଚେଷ୍ଟା କିମ୍ବା କ୍ୟାଣ୍ଡେଲ ଜାଳିବା ନିର୍ଭୟାଙ୍କୁ ବଞ୍ଚାଇ ପାରି ନଥିଲା।

ଗୋଟାଏ ପରେ ଗୋଟାଏ ଦୁଷ୍କର୍ମ ଘଟଣା ଘଟି ଚାଲିଛି।ଏହାକୁ ନେଇ ଆନ୍ଦୋଳନ,ବିକ୍ଷୋଭ,କ୍ୟାଣ୍ଡେଲ ଯାତ୍ରା,ଦୀପଦାନ ସବୁ କିଛି କରାଯାଉଛି।ଆରୋପ ପ୍ରତ୍ୟାରୋପ ହେଉଛି କିଛି ଦିନ ପରେ ଘଟଣା ଚପି ଯାଉଛି ଏବଂ ସତେ ଯେପରି ପୁଣି ଅପେକ୍ଷା ରହୁଛି ଆଉ ଏକ ଦୁଷ୍କର୍ମ ଘଟଣାକୁ।

କୁନ୍ଦୁଲି ଦୁଷ୍କର୍ମ ଘଟଣାକୁ ନେଇ ବହୁ ହୋ ହାଲା ହେଲା।କିନ୍ତୁ ନ୍ୟାୟ ନପାଇ ପିଡ଼ୀତା ଆତ୍ମହତ୍ୟା କଲା।ଏହାପରେ କୋକେଇ ଶୋଭାଯାତ୍ରା ଠାରୁ ଦୀପଦାନ ସବୁ ହେଲା।କିନ୍ତୁ ଫଳାଫଳ କ’ଣ ମିଳିଲା?ବିଜେପି କୁନ୍ଦୁଲି ଘଟଣାକୁ ନେଇ ବେଶୀ ଆନ୍ଦୋଳନ କରୁଥିଲା।ସିବିଆଇ ତଦନ୍ତ ଦାବି କରୁଥିଲା।ପରେ ସେ ଘଟଣା ପୁରୁଣା ହୋଇଗଲା।ପୁଣି ଆଉ ଏକ ନୂଆ ଇସୁ ଆବଶ୍ୟକ ପଡ଼ିଲା।ଏବଂ ପୁଣି ସାଲେପୁର ନାବାଳିକା ଦୁଷ୍କର୍ମ ଘଟଣା ଘଟିଲା ଏବଂ ଏ ନେଇ ପୁଣି ଦୀପ ଜାଳିଲା,କିନ୍ତୁ କାମ ଦେଲାନି ପ୍ରାର୍ଥନା।ଜୀବନ ସହ ସଂଘର୍ଷ କରି କରି ଜୀବନଟା କ’ଣ ବୁଝିବା ପୂର୍ବରୁ ପିଡ଼ୀତା ଜୀବନ ହାରିଲା।
ବଢ଼ି ଚାଲିଥିବା ଏପରି ଦୁଷ୍କର୍ମ ଘଟଣା ଭିତରେ ଏ ଆନ୍ଦୋଳନ, କ୍ୟାଣ୍ଡେଲ ଯାତ୍ରା,ଦୀପଦାନ,କୋକେଇ ଯାତ୍ରାକୁ ଦେଖିଲେ ଏହା କେବଳ ଯେ ଯାତ୍ରା ପରି ହିଁ ଲାଗେ।ସାଲେପୁର ଘଟଣାରେ ଦୀପ ଜାଳୁଥିବା,କୁନ୍ଦୁଲି ଘଟଣାରେ ସିବିଆଇ ତଦନ୍ତ ଦାବି କରୁଥିବା ବିଜେପି ଇତିଶ୍ରୀ କଥାରେ କ’ଣ କହିବ?ଇତିଶ୍ରୀ ଘଟଣା ତ’ ସିବିଆଇ ହାତକୁ ଗଲା,ଏବଂ ସିବିଆଇ କୁଆଡେ କେସ ବନ୍ଦ କରିଦେଲା?ଅଞ୍ଜନା ଘଟଣା କ’ଣ ହେଲା?ଛବିରାଣୀ ହତ୍ୟାକାଣ୍ଡ ଘଟଣା କ’ଣ ହେଇଥିଲା?ଶେଷରେ “ଛବିରାଣୀ ହତ୍ୟାକାଣ୍ଡ” ନାମରେ ଏକ ଯାତ୍ରା ପ୍ରସ୍ତୁତ ହୋଇ ମନୋରଂଜନ ଏବଂ ବ୍ୟବସାୟର ମାଧ୍ୟମ ହୋଇ ରହିଗଲା।
ଓଡ଼ିଶାରେ ଗୋଟାଏ ପରେ ଗୋଟାଏ ଦୁଷ୍କର୍ମ ଘଟଣା ଘଟି ଚାଲିଥିବା ବେଳେ ଏନେଇ ମୌନ ପ୍ରାୟ ରହୁଥିବା ବେଳେ ଉତ୍ତରପ୍ରଦେଶ ଉନାଉ ଘଟଣାରେ କଂଗ୍ରେସ କ୍ୟାଣ୍ଡେଲ ଶୋଭାଯାତ୍ରା କଲା।ଜାମ୍ମୁକାଶ୍ମୀର ଆସିଫା ଘଟଣାରେ ବିଜେଡି କ୍ୟାଣ୍ଡେଲ ଶୋଭାଯାତ୍ରା କଲା।କୁନ୍ଦୁଲି,ସାଲେପୁର ଘଟଣାରେ ବିଜେପି ଦୀପ ଜାଳିଲା।ଯେଉଁ ସ୍ଥାନରେ ଯେଉଁ ଦଳ ସରକାରରେ ନାହିଁ ସେ ହିଁ ଆନ୍ଦୋଳନ କଲା।ଅର୍ଥାତ୍ ଏ ଆନ୍ଦୋଳନ ପିଡ଼ୀତା ପାଇଁ ନୁହେଁ।ଏ ଆନ୍ଦୋଳନ ଅପରାଧ ବିରୋଧରେ ନୁହଁ।ଏ ବିରୋଧ କେବଳ ବିରୋଧୀ ଦଳ ବିରୋଧରେ ଏବଂ ନିଜ ରାଜନୈତିକ ଉଦ୍ଦେଶ୍ୟ ପାଇଁ।
ଜଣେ ନାରୀ ପ୍ରତି ଦୁଷ୍କର୍ମ ହେଉଛି।ଏବଂ ରାଜନୈତିକ ଦଳର ମହିଳା ବିଭାଗ ଏ ନେଇ ଆନ୍ଦୋଳନ କରୁଛି।କିନ୍ତୁ କାହା ପାଇଁ?ନାରୀ ପାଇଁ ନାଁ ଦଳ ପାଇଁ?
ଏହିପରି ଏକ ଘଟଣା ଯାହା ସାରା ଦେଶରେ ଆଲୋଡନ ସୃଷ୍ଟି କରିଥିଲା ତାହା ହେଲା ଦିଲ୍ଲୀର ନିର୍ଭୟା କାଣ୍ଡ।ଖୁବ୍ ବଡ଼ ଆନ୍ଦୋଳନ ହେଲା।ଏବଂ ଶେଷରେ ଏହାର ପରିଣାମ ବାହାରିଲା କେଜରିବାଲ।କେଜରିବାଲ ସେ ଆନ୍ଦୋଳନର ନେତୃତ୍ୱ ନେଲେ,ଚର୍ଚ୍ଚିତ ହେଲେ ଏବଂ ମୁଖ୍ୟମନ୍ତ୍ରୀ ହେଲେ।ତା’ ପରେ କ’ଣ ଦିଲ୍ଲୀରେ ଦୁଷ୍କର୍ମ ଥମିଗଲା?ବରଂ ଦିଲ୍ଲୀ ମୁଖ୍ୟମନ୍ତ୍ରୀ ହୋଇ କେଜରିବାଲଙ୍କୁ ”ନିର୍ଭୟା ଚେତନା ଦିବସ” ନାମରେ ଆନିଭରସେରି(ବର୍ଷ ପୁରାଣୀ) ପାଳନ କରିବାର ଦେଖାଗଲା।ଯେପରି ଅଞ୍ଜନା ଘଟଣାରେ କେବଳ ସିନା ଓଡ଼ିଶାରେ କେବଳ ସରକାର ପରିବର୍ତ୍ତନ ହେଲା।ବ୍ୟବସ୍ଥା ଯେସାକୁ ତେସା ରହିଲା।ତେଣୁ ଏହି ରାଜନୈତିକ ଦଳ ମାନଙ୍କ ଠାରୁ ଏପରି ବୋଧେ ଆଶା କରିବା ବୃଥା।
କୁହାଯାଏ,ଏମିତିରେ ତ’ ଜଣଙ୍କର ଦିନେ ନାଁ ଦିନେ ମୃତ୍ୟୁ ହୁଏ,କିନ୍ତୁ ଦୁଷ୍କର୍ମ ପିଡ଼ୀତା ପ୍ରତ୍ୟକ ଦିନ ତିଳ ତିଳ ହୋଇ ମରେ।ସମାଜରେ ଚଳିବା ତା’ପାଇଁ ଅସମ୍ଭବ ପ୍ରାୟ ହୋଇପଡେ।ସତେ ଯେପରି ସେ ନିଜେ କିଛି ଅପରାଧ କରିଥିଲା।ବିନା ଦୋଷରେ ପିଡ଼ୀତାର ପରିବାରକୁ ମଧ୍ୟ ସମାଜର ଲାଞ୍ଚନା ଭିତରେ ବଞ୍ଚିବାକୁ ପଡ଼େ।
ଦୁଷ୍କର୍ମ କରୁଥିବା ବ୍ୟକ୍ତି ଯେ ଅସାମାଜିକ ନିଶ୍ଚିତ।କିନ୍ତୁ ସାମୁହିକ ଦୁଷ୍କର୍ମ,ଦୁଷ୍କର୍ମ ପରେ ହତ୍ୟା ଏବଂ ସବୁଠାରୁ ବଡ଼ କଥା ଏ ବିଷୟରେ କିଛି ଜାଣି ନଥିବା କୋମଳମତି ଶିଶୁ ମାନଙ୍କ ପ୍ରତି ଦୁଷ୍କର୍ମ କରୁଥିବା ବ୍ୟକ୍ତି ଯେ ଜଣେ ରାକ୍ଷସ।ଏବଂ ଏପରି ରାକ୍ଷସ ମାନଙ୍କ କବଳରୁ ଅନେକ ସମୟରେ ଦିବ୍ୟାଙ୍ଗ ମାନେ ମଧ୍ୟ ବାଦ ପଡୁନଥିବା ନଜିର ରହିଛି।ଦୁଷ୍କର୍ମ କାହିଁକି ହେଉଛି ଏହାକୁ କିପରି ରୋକାଯାଇ ପାରିବ,ବୋଧେ ସେଥିପାଇଁ ସେପରି କିଛି କରାଯାଉ ନାହିଁ।ଏବେ ନାବାଳିକା ଶିଶୁଙ୍କୁ ଦୁଷ୍କର୍ମ ପାଇଁ ମୃତ୍ୟଦଣ୍ଡ,କିଛି କ୍ଷେତ୍ରରେ ଜେଲ ଦଣ୍ଡ ବୃଦ୍ଧି ଆଦି ପରି ଶକ୍ତ ଆଇନ ଆସିଛି।କିନ୍ତୁ ସିଆଡେ ଏ ଶକ୍ତ ଆଇନ ଲାଗୁ ହେଲା ବେଳେ ଏଣେ ଦୁଷ୍କର୍ମ ମଧ୍ୟ ଚାଲିଛି।
ଆମ ଚଳଚିତ୍ର ଗୁଡିକରେ ପାଶ୍ଚାତ ସଂସ୍କୃତି ପ୍ରଭାବରେ ଦିନକୁ ଦିନ କାମଉଦ୍ଦିପକ ଦୃଶ୍ୟ ଭରି ହେବାରେ ଲାଗିଛି।ଟିଭିରେ ଦେଉଥିବା କ୍ରାଇମ ପେଟ୍ରୋଲ ପରି ଷ୍ଟୋରୀରେ ସିନା ଉପସ୍ଥାପକ ଏପରି ଘଟଣାରୁ ସତର୍କ ରହିବାକୁ ପିଲାଙ୍କୁ ତଥା ପରିବାରକୁ ପରାମର୍ଶ ଦେଉଛି।କିନ୍ତୁ ଅନେକ ସମୟରେ ଏହି କ୍ରାଇମ ଷ୍ଟୋରୀ ସିରିଏଲରୁ କ୍ରାଇମ କରିବାର କୌଶଳ ଅପରାଧୀ ଶିଖିବାକୁ ପାଉଛି।ମଦ୍ୟପାନ ସ୍ୱାସ୍ଥ୍ୟ ପାଇଁ ହାନିକାରକ ବୈଧାନିକ ଚେତାବନୀ ଦେଇ ସରକାର ମଦ ବିକ୍ରି କରିଲା ପରି କ୍ରାଇମ ପେଟ୍ରୋଲ ପରି ସିରିଏଲ କ୍ରାଇମ ରୋକିବା ପାଇଁ ସିନା ସତର୍କ କରାଉଛି,କିନ୍ତୁ କାହାକୁ ଯେ ଏହା କ୍ରାଇମ କରିବାର ବାଟ ବତାଉଛି।ଯେପରି ଏବେ ପାଟଣାଗଡ଼ ପାର୍ଶଲ ବୋମା ଘଟଣାର ଅଭିଯୁକ୍ତ କହିଛନ୍ତି ଯେ ଏକ ନିର୍ଦିଷ୍ଟ ଫିଲ୍ମରୁ ହିଁ ସେ ପ୍ରମାଣ ନଷ୍ଟ କରିବା କୌଶଳ ଶିଖିଥିଲେ, ଏବଂ ୟ-ୁଟିଉଭରୁ ବୋମା ତିଆରି କରିବାର କୌଶଳ।ନାବାଳିକାର ବିବାହ କରିବା ଦଣ୍ଡନୀୟ ଅପରାଧ କିନ୍ତୁ “ନବମ ଶ୍ରେଣୀ ଝିଅଟି ଛାତିକୁ ମୋ ହଟ କରୁଛି” ଭଳି ଗୀତକୁ ସେନ୍ସର ବୋର୍ଡ ସ୍ୱୀକୃତି ଦେଉଛି।ଏବଂ ଅର୍ଧ ନଗ୍ନ ପୋଷାକରେ ଟିଭି ପରଦାରେ ସବୁବେଳେ ଦେଖା ଯାଉଥିବା କରିନା,ସୋନମ କାପୁର ପରି ଅଭିନେତ୍ରୀ ଦୁଷ୍କର୍ମ ଘଟଣା ପ୍ରତିବାଦରେ ପୋଷ୍ଟ କରି ସେୟାର କରୁଛନ୍ତି।ଯାହାର ମାନେ କିଛି ଥିଲା ପରି ମନେ ହେଉନି।ଏଥିପାଇଁ ସେମାନେ ସମାଲୋଚିତ ମଧ୍ୟ ହେଉଛନ୍ତି। ଟିଭିରେ ଦେଉଥିବା ଚଳଚିତ୍ର,ଧାରାବାହିକ କଥା ଛାଡ଼ନ୍ତୁ ନିଉଜ ଚ୍ୟାନେଲ ଗୁଡିକରେ ନିଉଜ ମଧ୍ୟରେ ବ୍ରେକ ସମୟରେ ମଧ୍ୟ ସେହିପରି କିଛି ବିଜ୍ଞାପନ ପ୍ରସାରିତ ହେଉଛି।ଏପରି ବେଳେବେଳେ ହେଉଛି ଏନେଇ କିଛି ଜାଣି ନଥିବା ଶିଶୁ ଏହା କ’ଣ ବୋଲି ପରିବାର ଭିତରେ ପ୍ରଶ୍ନ ପଚାରି ବସୁଛି।ଟିଭି ତ’ ଟିଭି ସେଥିରେ ଏବେ ପୁଣି ମୋବାଇଲ,ହାଇସ୍ପୀଡ଼ ଇଣ୍ଟରନେଟ ସହିତ।ଟିଭିରେ ସିନା ଚ୍ୟାନେଲ ଚେଞ୍ଜ କଲେ କିଏ ଜାଣିବେ,କିନ୍ତୁ ମୋବାଇଲରେ ଯାହା ପାରିଲା ତାହା ଦେଖି ପାରିଲା।କେହି ଜାଣିବାର ନାହିଁ।
ସରକାରୀ ହିସାବରେ ପୁଲିସ ଫାଇଲରେ ହେଉ ବା ଗଣମାଧ୍ୟମରେ ପ୍ରକାଶିତ/ପ୍ରସାରିତ ହେଉ ଦୁଷ୍କର୍ମ ଘଟଣା ନେଇ ଯେତେ ଘଟଣା ଜଣା ପଡ଼ୁଛି ବାସ୍ତବରେ ତା’ଠାରୁ ଯଥେଷ୍ଟ ଅଧିକ ଏହିପରି ଘଟଣା ମାନ ଘଟୁଛି।ଦୁଷ୍କର୍ମ ପରେ ହତ୍ୟା କିମ୍ବା ଅତି ଜଘନ୍ୟ କାଣ୍ଡ ସିନା ଲୋକ ଲୋଚନକୁ ଆସୁଛି, କିନ୍ତୁ ଅନେକ ସମୟରେ ପିଡ଼ୀତା ଭୟରେ କିମ୍ବା ଲୋକ ଲଜ୍ଜାରେ ଏପରି ଘଟଣାକୁ ପ୍ରକାଶ କରି ପାରୁନି।ଯଦି ବି ପ୍ରକାଶ କରୁଛି ଅନେକ ସମୟରେ ପରିବାର ପକ୍ଷରୁ ନିରବ ରହୁଛନ୍ତି।ଯଦି ବି ପିଡ଼ୀତା/ପରିବାର ପକ୍ଷରୁ ଅଭିଯୋଗ କରିବାକୁ ଚେଷ୍ଟା କରାଯାଉଛି ତେବେ ଅନେକ ସମୟରେ ଗାଁ କୁଜି ନେତା,ଜନ ପ୍ରତିନିଧି,ପୁଲିସ ଏହାର ଆପୋଷ ବୁଝାବଣା କରାଉଛନ୍ତି।ପିଡ଼ୀତା ପରିବାରକୁ ଧମକ ଚମକ ଦିଆ ଯାଉଛି କିମ୍ବା କ୍ଷତି ପୂରଣ ଦିଆ ଯାଉଛି।ଏବଂ ଆଶ୍ଚର୍ଯ୍ୟର କଥା ଅନେକ ସମୟରେ ପରିବାର ଲୋକ ଏପରି କ୍ଷତି ପୂରଣ ଗ୍ରହଣ କରି ଚୁପ ରହୁଛନ୍ତି।ଦୁଷ୍କର୍ମ ଘଟଣାର ଆପୋଷ ବୁଝାବଣା କେହି କରି ପାରିବେ ନାହିଁ ବୋଲି ସୁପ୍ରିମକୋର୍ଟ କହିଥିଲେ ମଧ୍ୟ ତାର ଉଲଘଂନ ହେଉଛି।
ଦୁଷ୍କର୍ମ ପରି ଘଟଣା ସଭ୍ୟ ସମାଜ ପ୍ରତି ଏକ କଳଙ୍କ।ଦୁଷ୍କର୍ମ କୌଣସି ଦଳର ଲୋକ,କୌଣସି ଜାତିର ଲୋକ କରି ନଥାଏ।ଦୁଷ୍କର୍ମ ପରି ଘଟଣା କରିଥାଏ କେବଳ ଜଣେ ବିକୃତ ମାନସିକ ଧାରୀ।ତଥ୍ୟ ଅନୁଯାୟୀ ଅନେକ ଦୁଷ୍କର୍ମ ଘଟଣା ପରିବାର,ସଂପର୍କୀୟ,ପରିଚିତ ଲୋକଙ୍କ ଦ୍ୱାରା ହୋଇଥାଏ।ଏବଂ ସେ କେବଳ ଜଣେ ବିକୃତ ମାନସିକ ଧାରୀ ରାକ୍ଷସ।ସମାଜର ଶତୃ।କଡ଼ା ଆଇନ ସହିତ ତୁରନ୍ତ ଦଣ୍ଡ ବିଧାନ ଏଥିପାଇଁ ତ’ ନିହାତି ଜରୁରୀ।କିନ୍ତୁ ପ୍ରଥମେ ଦଳ,ମତ,ପନ୍ଥ,ଜାତି ନିର୍ବିଶେଷରେ ସାମୁହିକ ଭାବରେ ଏପରି ଆସୁରିକ ଆଚରଣର ବିରୋଧ କରିବା ଉଚିତ।ପ୍ରତିକାର ନୁହେଁ ପ୍ରତିଷେଧକ ବ୍ୟବସ୍ଥା ଗ୍ରହଣ କରିବାର ଅଛି।

Advertisements

Odisha News24 Bureauhttp://www.odishanews24.in
A WEB TV Channel Network in Western Odisha

Most Popular

କନ୍ଧମାଳ ଜିଲ୍ଲାରେ ପୁଲିସ ଏବଂ ମାଓବାଦୀ ମୁହାଁମୁହିଁ

କନ୍ଧମାଳ/ଘୁ.ଉଦୟଗିରି (୦୮/୦୭): କନ୍ଧମାଳ ଜିଲ୍ଲାରେ ଆଜି ପୁଣି ପୁଲିସ ଏବଂ ମାଓବାଦୀ ମୁହାଁମୁହିଁ ହୋଇଛନ୍ତି । ଏଥି ସହିତ ପୁଲିସ ଏବଂ...

ସରକାରୀ ଚାକିରିଆ ଗଣମାଧ୍ୟମ ଆଗରେ ମୁହଁ ଖୋଲି ପାରିବେନି

ଭୁବନେଶ୍ୱର (୦୮/୦୭): ରାଜ୍ୟରେ ଏବେଠୁ କୌଣସି ସରକାରୀ ଚାକିରି ଗଣମାଧ୍ୟମ ଆଗରେ ମୁହଁ ଖୋଲିପାରିବେନି ବୋଲି ଜଣାପଡିଛି । ସରକାରୀ ଚାକିରି...

ଧର୍ମପ୍ରାଣ ମହିଳା ଙ୍କ ପରଲୋକ , ଯାଜପୁର

ରିପୋର୍ଟ: ସତ୍ୟଜିତ ବାରିକ //ବରୀ,ଯାଜପୁର (୦୭/୦୭): ଯାଜପୁର ଜିଲ୍ଲା ବରୀ ବ୍ଲକ ରଂପା ଗ୍ରାମ ପଞ୍ଚାୟତ ର ଉପର ରମ୍ପା ର ସ୍ବର୍ଗତ କିଶୋର ଚନ୍ଦ୍ର ମହାନ୍ତି ଙ୍କ...

ସାଂସଦଙ୍କ ବନ୍ଧୁଗାଁର ଆଦର୍ଶ ପଞ୍ଚାୟତକୁ ସମୀକ୍ଷା ଗସ୍ତ

ରିପୋର୍ଟ: ମିନା ବେହେରା //ବନ୍ଧୁଗାଁ (ତା ୭/୬/୨୦): କୋରାପୁଟ ଜିଲ୍ଲା ସାଂସଦ ମାନ୍ୟବର ସପ୍ତଗିରି ଶଙ୍କର ହୁଲୁକା ଗାରିଡି ଆଦର୍ଶ ଗ୍ରାମ ପଞ୍ଚାୟତ ପରିଦର୍ଶନ କରିବା ସହିତ ଉପସ୍ଥିତ...

Recent Comments

%d bloggers like this: