Friday, October 23, 2020
Home District News ୮୩ତମ ବଳିଦାନ ଦିବସରେ ଆନ୍ତର୍ଜାତିକ ୱେବିନାର, ରାଜ୍ୟ ଓ ଜାତୀୟ ସ୍ତରରେ ବାଜି ରାଉତଙ୍କର ସ୍ମୃତି...

୮୩ତମ ବଳିଦାନ ଦିବସରେ ଆନ୍ତର୍ଜାତିକ ୱେବିନାର, ରାଜ୍ୟ ଓ ଜାତୀୟ ସ୍ତରରେ ବାଜି ରାଉତଙ୍କର ସ୍ମୃତି ରକ୍ଷା ଦାବୀ

ରିପୋର୍ଟ: ସତ୍ୟଜିତ ବାରିକ //
ଭୁବନେଶ୍ୱର (୧୨/୧୦): ଦେଶର ସର୍ବ କନିଷ୍ଠ ସ୍ୱାଧୀନତା ସଂଗ୍ରାମୀ ସହୀଦ ବାଜି ରାଉତଙ୍କର ରାଜ୍ୟ ଓ ଜାତୀୟ ସ୍ତରରେ ଉପଯୁକ୍ତ ସ୍ମୃତି ରକ୍ଷା କରାଯିବା ପାଇଁ ଦୃଢ ଦାବୀ ଉପସ୍ଥାପନା କରାଯାଇଛି | ବାଜିରାଉତଙ୍କର ୮୩ତମ ବଳିଦାନ ଦିବସ ପାଳନ ଅବସରରେ ଆୟୋଜିତ ଆନ୍ତର୍ଜାତିକ ୱେବିନାର ରେ ଭାଗ ନେଇ ବିଶିଷ୍ଟ ବକ୍ତା ମାନେ ଉଭୟ ରାଜ୍ୟ ରାଜଧାନୀ ଭୁବନେଶ୍ୱର ଏବଂ ଜାତୀୟ ରାଜଧାନୀ ଦିଲ୍ଲୀ ଠାରେ ସ୍ବର୍ଗତଃ ସହୀଦଙ୍କ ନାମରେ ଭବ୍ୟ ସ୍ମାରକୀ ନିର୍ମାଣ କରାଯିବାର ଆବଶ୍ୟକତା ଉପରେ ଜୋର ଦେଇଥିଲେ |

ଦିଲ୍ଲୀରୁ ପ୍ରକାଶିତ ଇଂରାଜୀ ମାସିକ ପତ୍ରିକା ଉତ୍କଳ ଭାରତୀ ଅନୁକୁଲ୍ୟରେ ଅନୁଷ୍ଠିତ ଏହି ଅନଲାଇନ ସମ୍ମିଳନୀକୁ ଉଦଘାଟନ କରି ରାଜ୍ୟ ବିଧାନ ସଭାର ବାଚ୍ଚସ୍ପତି ଡ଼.ସୂର୍ଯ୍ୟ ନାରାୟଣ ପାତ୍ର , ବାଳୁତ ବାଜି ରାଉତ ଙ୍କର ଦେଶ ମାତ୍ତୃକା ପାଇଁ ସର୍ବୋଚ୍ଚ ତ୍ୟାଗ ତଥା ଦୁର୍ଦ୍ଦାନ୍ତ ଫିରିଙ୍ଗି ବାହିନୀ ବିରୁଦ୍ଧରେ ଲଢ଼ିବା ପାଇଁ ଅଦମ୍ୟ ସାହସ କୁ ଉଦ୍ଧାର କରି , ଏହି ଗୌରବ ଗାଥା ଦ୍ୱାରା ଆମର ବର୍ତ୍ତମାନ ଓ ଭବିଷ୍ୟତ ପୀଢ଼ୀ ଅନୁପ୍ରାଣିତ ହେବାକୁ ଆହ୍ୱାନ ଜଣାଇଥିଲେ | ବାଜି ଏବଂ ତାଙ୍କର ସାଥି ମାନଙ୍କ ଦ୍ୱାରା ପ୍ରାରମ୍ଭ, ପ୍ରଜାମଣ୍ଡଳୀ ଆନ୍ଦୋଳନ ସର୍ଦାର ବଲ୍ଲଭ ଭାଇ ପଟେଲ ଙ୍କୁ ବେଶ ପ୍ରଭାବିତ କରିଥିଲା, ଯାହା ଫଳରେ ପ୍ରଥମେ ବ୍ରିଟିଶ ଶାସନର ବିନାଶ ଏବଂ ତା ପରେ ରାଜା ରାଜୁଡାଙ୍କର ଜମିଦାରୀ ଉଛେଦ ଘଟିଥିବା ଡ଼. ପାତ୍ର ଦର୍ଶାଇଥିଲେ |

ୱେବ ସମାବେଶରେ ମୁଖ୍ୟବକ୍ତା ଭାବେ ଯୋଗଦେଇ ବାଜି ରାଉତଙ୍କର ବୀରଭୂମି ର ସନ୍ତାନ ତଥା ରାଜ୍ୟ ଖଣି , ଇସ୍ପାତ ,ଓ ପୁର୍ତ୍ତୀ ବିଭାଗ ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ , ଆଜିର ଯୁବ ସମ୍ପ୍ରଦାୟ ସ୍ୱାଧୀନତା ସେନାନୀ ମାନଙ୍କର ଜୀବନୀ , ଦର୍ଶନ ଓ ଆଦର୍ଶ ଦ୍ୱାରା ଉଦବୁଦ୍ଧ ହେବାକୁ ପରାମର୍ଶ ଦେଇଥିଲେ | ଯୁବକମାନଙ୍କୁ ଲଗାତାର ଭାବେ ଦେଶ ପ୍ରତି ସେମାନଙ୍କର ଦାୟିତ୍ୱବୋଧତା ସମ୍ପର୍କରେ ସଚେତନ କରାଯିବାର ଆବଶ୍ୟକତା ରହିଥିବା ମନ୍ତ୍ରୀ ଦର୍ଶାଇଥିଲେ | ସମ୍ମାନୀତ ବକ୍ତା କଂଗ୍ରେସ ନେତା ରାମଚନ୍ଦ୍ର ଖୁଣ୍ଟିଆ ବାନର ସୈନିକ ବାଜି ରାଉତ ଙ୍କର ଅନନ୍ୟ ଦେଶ ପ୍ରେମ , ରାଷ୍ଟ୍ର ପ୍ରତି ସମର୍ପିତ ଭାବନା ଏବଂ ନିର୍ଭୀକ ସାହସ ର ଭୁରି ଭୁରି ପ୍ରସଂଶା କରିଥିଲେ | ତେବେ ଏହି ଶିଶୁ ସହୀଦ ପ୍ରତି ଯଥୋଚିତ ମର୍ଯ୍ୟାଦା ରାଜ୍ୟ ଓ କେନ୍ଦ୍ର ସରକାର ଙ୍କ ତରଫରୁ ଦିଆଯାଇନଥିବା ନେଇ ଡ଼. ଖୁଣ୍ଟିଆ କ୍ଷୋଭ ପ୍ରକାଶ କରିଥିଲେ | ଭାରଚୁଆଲ ବୈଠକରେ ଉଦବୋଧନ ଦେଇ ଓଡିଶା ଫୋରମ ର ସଭାପତି ଗୋକୁଳ ପଟ୍ଟନାୟକ , ବାଜି ରାଉତ ଙ୍କର ବୀରତ୍ୱ ର ଆମର କଥା କୁ ଦେଶର ପାଠ୍ୟ ପୁସ୍ତକରେ ସ୍ଥାନ ଦେବା ପାଇଁ ପରାମର୍ଶ ଦେଇଥିଲେ | ୨୦୩୬ ମସିହାରେ ଓଡିଶା ରାଜ୍ୟ ଗଠନର ୧୦୦ ବର୍ଷ ପୂର୍ତ୍ତି ନେଇ ଏବେଠୁ ଭବିଷ୍ୟତ ଖସଡ଼ା ପ୍ରସ୍ତୁତ କରାଯିବାର ଆବଶ୍ୟକତା ରହିଥିବା ଉପରେ ଶ୍ରୀ ପଟ୍ଟନାୟକ ଗୁରୁତ୍ୱ ଆରୋପ କରିଥିଲେ | ଶୋଭନୀୟ ଆନ୍ଦୋଳନର ମୁଖ୍ୟ ଗୁରୁମା ଡ଼. ଅରୁନ୍ଧତୀ ଦେବୀ , ଓଡ଼ିଶାର ସାମଗ୍ରିକ ବିକାଶ ଅଭିପ୍ରାୟ ରେ ସାରା ବିଶ୍ୱରେ ଓଡ଼ିଆ ଅଧିବାସୀ ମାନେ ଏକଜୁଟ ହେବାକୁ ନିବେଦନ ଜଣାଇଥିଲେ |

ବରିଷ୍ଠ ପ୍ରଶାସକ ସଂଜୀବ ପାଟ୍ଟଯୋଶୀ ଦିଲ୍ଲୀର ତ୍ୟାଗରାଜ ନଗର ସ୍ଥିତ ଜଗନ୍ନାଥ ମନ୍ଦିର ପରିସରରେ ବାଜିରାଉତଙ୍କର ପ୍ରତିମୂର୍ତ୍ତୀ ସ୍ଥାପନା ପାଇଁ ପ୍ରସ୍ତାବ ରଖିଥିଲେ | ଅଷ୍ଟ୍ରେଲିଆ ଓଡ଼ିଆ ସମାଜର ସଭାପତି ଡ଼ଃ ନଳିନୀ ପତି, ଆଜିର ଆଲୋଚନା ଚକ୍ର, ଓଡ଼ିଶା ସହିତ ଯୋଡ଼ି ହେବାର ଏବଂ ନିଜ ଭିଟ୍ଟାମାଟି ପାଇଁ କିଛି ଯୋଗଦାନ ଦେବାର ସୁଯୋଗ ଯୁଟାଇଛି ବୋଲି କହିଥିଲେ | କିୟୋଟୋ ସ୍ଥିତ ଭାରତ ଜାପାନ ମୈତ୍ରୀ କେନ୍ଦ୍ର ର ସଭାପତି କୁନା ଦାଶ, ଯୁବ ସମାଜ ଇତିହାସ ର ସ୍ବର୍ଣ୍ଣାଭ ଅଧ୍ୟାୟ କୁ ସ୍ମରଣ କରିବାକୁ ଉପଦେଶ ଦେଇଥିଲେ | ଅସୀମ ଓଡ଼ିଶା ର ସଭାପତି କ୍ଷୀରୋଦ ଜେନା, ରାଜ୍ୟର ଭବିଷ୍ୟତ କୁ ଯାଜ୍ଜ୍ୱଲ୍ୟମାନ କରିବା ଦିଗରେ ସମସ୍ତ ପ୍ରକାର ସାହାଯ୍ୟ ସହଯୋଗ ର ପ୍ରତିଶୃତି ଦେଇଥିଲେ | ଟରୋଣ୍ଟୋ ଠାରେ ଅବସ୍ଥାପିତ ଓଡ଼ିଆ ସାହିତ୍ୟ ଟୁଙ୍ଗୀର ପ୍ରତିଷ୍ଠାତା ଡ଼ଃ ତନ୍ମୟ ପଣ୍ଡା, ବିଶ୍ୱ ଭରି ଓଡ଼ିଆ ଭାଷା ର ପ୍ରଚାର, ପ୍ରସାର ତଥା ଜଗନ୍ନାଥ ଦର୍ଶନ ଏବଂ ତତ୍ୱ କୁ ବିଦେଶୀ ବିଶ୍ୱବିଦ୍ୟାଳୟ ମାନଙ୍କର ପାଠ୍ୟକ୍ରମ ରେ ସାମିଲ କରାଯିବା ନେଇ ପ୍ରାଧାନ୍ୟ ଦିଆଯିବାକୁ କହିଥିଲେ | ଦୁବାଇ ସ୍ଥିତ ଓଡ଼ିଶା ସମାଜ ୟୁ.ଏ.ଇ. ର ସାଧରଣ ସଂପାଦକ ପ୍ରୀତିଶ ଦାଶ, ଓଡ଼ିଶା ଓ ଓଡ଼ିଆଙ୍କର ସେବା ପାଇଁ ତାଙ୍କର ସଂସ୍ଥା ସଦାସର୍ବଦା ପ୍ରସ୍ତୁତ ଥିବା ପ୍ରକାଶ କରିଥିଲେ | ଓଡ଼ିଶା ସମାଜ ୟୁ.କେ. ର ସାଧରଣ ସଂପାଦକ ଶିବରଞ୍ଜନ ବିଶ୍ୱାଳ ଦେଶପ୍ରେମ ଓ ରାଷ୍ଟ୍ର ଭକ୍ତି ପାଇଁ ବୟସ ବା ଭୌଗଳିକ ସୀମାରେଖା କେବେ ବାଧକ ସାଜି ପାରେନା ବୋଲି ଉଲ୍ଲେଖ କରିଥିଲେ |ଆମ୍ବେଦକର ଫାଉଣ୍ଡେସନ ନିର୍ଦେଶକ ଡ଼ଃ ଦେବେନ୍ଦ୍ର ମାଝି, ବାଜିଙ୍କର ଶିଶୁ ସାହାସିକତାର ଉପାଖ୍ୟାନ, ଏନ.ସି.ଇ.ଆର .ଟି ଓ ଏନ.ବି.ଟି ଦ୍ୱାରା ପ୍ରସାରିତ ହେବା ଆବଶ୍ୟକ ବୋଲି କହିଥିଲେ | ଏନ.ଜି.ଓ. ଫେଡେରେସନ ର ସାଧାରଣ ସଂପାଦକ ଡ଼ଃ ଆର.ଏନ ବେହେରା ଉଇକ୍ଲିପିଡିଆ ରେ ବାଜି ରାଉତ ସ୍ଥାନ ପାଇବା ଜରୁରୀ ବୋଲି ସୂଚାଇଥିଲେ | ବାଜି ରାଉତ ସ୍ମୃତି ପରିଷଦ ର ସଭାପତି କୃଷ୍ଣ ଆଇଚ ଭୁବନେଶ୍ୱର ଓ ଦିଲ୍ଲୀ ଠାରେ ବାଜି ରାଉତଙ୍କ ନାମ ରେ ରାସ୍ତା ଓ ଭବନ କୁ ନାମିତ କରିବାକୁ ପ୍ରସ୍ତାବ ଦେଇଥିଲେ | ଅନ୍ୟମାନଙ୍କ ମଧ୍ୟରେ ଯୁବନେତା ଲଗ୍ନଦୀପା ମିଶ୍ର, ପ୍ରସିଦ୍ଧ ବାଲୁକା ଶିଳ୍ପୀ ସୁଦାମ ପ୍ରଧାନ, ସମାଜସେବୀ ରତନ ବେହେରା, ପ୍ରାଧ୍ୟାପକ ଅଲ୍ପନା ପଟ୍ଟନାୟକ, ଜୁହାର ପରିବାରର ଗଜେନ୍ଦ୍ର ସାହୁ ଓ କୃଷି ବୈଜ୍ଞାନିକ ନବକିଶୋର ପରିଡ଼ା ପ୍ରମୁଖ ସହୀଦଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଥିଲେ |

ଡିଜିଟାଲ ସଭାରେ ସ୍ୱାଗତ ଭାଷଣ ପ୍ରଦାନ କରି ମୁଖ୍ୟ ଆବାହକ ତଥା ଉତ୍କଳ ଭାରତୀ ର ସଂପାଦକ ଡ଼ଃ ନିର୍ମଳ ପଟ୍ଟନାୟକ ବାଜି ରାଉତଙ୍କ ଭଳି ଇତିହାସ ପୃଷ୍ଠା ରୁ ହଜି ଯାଇଥିବା ସ୍ୱାଧୀନତା ସଂଗ୍ରାମୀ ମାନଙ୍କର ସ୍ମୃତିରକ୍ଷା ନିହାତି ସ୍ପୃହଣୀୟ ବୋଲି କହିଥିଲେ |ବାଜି ରାଉତଙ୍କର ପ୍ରତିମୂର୍ତ୍ତୀ ଏବଂ ସଂଗ୍ରହାଳୟ ପ୍ରତିଷ୍ଠା ପାଇଁ ଡ଼ଃ ପଟ୍ଟନାୟକ ସରକାରଙ୍କର ଦୃଷ୍ଟି ଆକର୍ଷଣ କରିଥିଲେ | ଉପସ୍ଥିତ ମାନ୍ୟଗଣ୍ୟ ବ୍ୟକ୍ତି ମାନଙ୍କ ମଧ୍ୟରେ ପୂର୍ବତନ କେନ୍ଦ୍ର ମନ୍ତ୍ରୀ ଓ ସାଂସଦ ଜୁଏଲ ଓରାମ, ଅମରେନ୍ଦ୍ର ଖଟୁଆ, ନିହାର ସାମନ୍ତରା , ବିଭୁ ତ୍ରିପାଠୀ , ପିତାମ୍ବର ବାରିକ, ଶମ୍ଭୁନାଥ ଦାସ, ମନୋଜ ପାତ୍ର, ଭବାନୀ ଦୀକ୍ଷିତ, ପ୍ରବୋଧ ସାମନ୍ତରା, ଶିବ ମିଶ୍ର, ଆଶୁତୋଷ ଦାସ ଏବଂ ବ୍ରଜ ପଣ୍ଡା ପ୍ରମୁଖ ଅନ୍ତର୍ଭୁକ୍ତ ଥିଲେ | ଡ଼ଃ ଅଭୟ ଦାସ, ପୁଷ୍ପାଞ୍ଜଳି ବାରିକ, ଅଞ୍ଜୁ ଅଗ୍ରୱାଲ ଓ ଗୀତା ଗଂଗୋତ୍ରୀ ପ୍ରମୁଖ କବି ଓ କବୟତ୍ରୀ ମାନେ ସ୍ୱରଚିତ ଦେଶଭକ୍ତି ଗୀତ ଓ ଭକ୍ତି ସଂଗୀତ ଗାନ କରିଥିଲେ | କାର୍ଯ୍ୟକ୍ରମ ର ବିଶେଷ ଆକର୍ଷଣ ଶିଶୁ କବି ସ୍ମିତା ଅନିଲ ଦ୍ୱାରା ବାଜି ରାଉତଙ୍କ କିର୍ତ୍ତୀ ଆଧାରିତ କବିତା ଆବୃତ୍ତି ଥିଲା | ପାଖାପାଖି ୪ ଘଣ୍ଟା ଧରି ଚାଲିଥିବା ଏହି ଇଣ୍ଟରନେଟ ଅଧିବେଶନକୁ ଆୟୋଜନର କର୍ତ୍ତା ବରିଷ୍ଠ ସାମ୍ବାଦିକ ତଥା ବନ୍ଦେ ଉତ୍କଳ ଫାଉଣ୍ଡେସନର ପ୍ରତିଷ୍ଠାତା ଅଧ୍ୟକ୍ଷ କିଶୋର ଦ୍ବିବେଦୀ ଉପସ୍ଥାପନା ଓ ସଂଚାଳନା କରିଥିଲେ | କରୋନା ମହାମାରୀ ନେଇ ଅସୁବିଧା କୁ ଆଶୀର୍ବାଦରେ ପରିଣତ କରି ସାରା ପୃଥିବୀ ର ପ୍ରବାସୀ ଓଡ଼ିଆ ମାନେ ଏହି ୱେବିନାର ରେ ଅପୂର୍ବ ଉତ୍ସାହ ର ସହିତ ସାମିଲ ହୋଇଥିବା ରୁ ଶ୍ରୀ ଦ୍ବିବେଦୀ ପ୍ରସନ୍ନତା ପ୍ରକଟ କରିଥିଲେ | ଦିଲ୍ଲୀ ସ୍ଥିତ ବିଜୟିନୀ ଫାଉଣ୍ଡେସନ ର ଅଧ୍ୟକ୍ଷା ରୀତା ପାତ୍ର ଧନ୍ୟବାଦ ଅର୍ପଣ କରିଥିଲେ |

Odisha News24 Bureauhttp://www.odishanews24.in
A WEB TV Channel Network in Western Odisha

Leave a Reply

This site uses Akismet to reduce spam. Learn how your comment data is processed.

Most Popular

ଅଲୋଡ଼ା ଶିଶୁକନ୍ୟା କୁ ଅପଣେଇଲେ ବେଙ୍ଗାଲୁରର ଏକ ଦମ୍ପତି

ରିପୋର୍ଟ: ସନ୍ତୋଷ କୁମାର ନାୟକ // ବଲାଙ୍ଗୀର, ତା୨୨-୧୦): ବଲାଙ୍ଗୀର ଆୟୁର୍ବେଦିକ କଲେଜ ନିକଟରୁ ଉଦ୍ଧାର ହୋଇଥିବା ଅଲୋଡ଼ା ଶିଶୁକନ୍ୟା ଏବେ ବେଙ୍ଗାଲୁରର ଏକ ଦମ୍ପତି ଆସି ପୋଷ୍ୟ ସନ୍ତାନ ଭାବରେ ଗ୍ରହଣ କରିଛନ୍ତି...

କାଲରାତ୍ରୀ ବେଶରେ ଦେଉଛନ୍ତି ଦର୍ଶନ, ଏହି ବେଶ ସବୁଠାରୁ ମହତ୍ତ୍ୱପୂର୍ଣ

ରିପୋର୍ଟ: ସନ୍ତୋଷ କୁମାର ନାୟକ // ବଲାଙ୍ଗୀର (ତା୨୨-୧୦): ଆଜି ମା’ଙ୍କ କାଳରାତ୍ରୀ ବେଶ । ସହରର ସମଲେଶ୍ୱରୀ ମନ୍ଦିର, ପାଟଣେଶ୍ୱରୀ ମନ୍ଦିର, ଦୁର୍ଗା ମନ୍ଦିର ତଥା ଅନ୍ୟାନ୍ୟ ଦେବୀ ପୀଠରେ ଆଜି କାଳରାତ୍ରି...

ସ୍ଵାମୀ ଆକ୍ରମଣରେ ସ୍ତ୍ରୀ ଗୁରୁତର ଆହତ,ହତ୍ୟା ଉଦ୍ୟମ ଅଭିଯୋଗ

ରିପୋର୍ଟ: ସନ୍ତୋଷ କୁମାର ନାୟକ // ବଲାଙ୍ଗୀର,ତା୨୧-୧୦): ବଲାଙ୍ଗୀର ଜିଲ୍ଲାର ବଙ୍ଗୋମୁଣ୍ଡା ଥାନା ଅନ୍ତର୍ଗତ ଜଏରପଡା ଗାଁର ଘଟିଛି ଏକ ଅଭାବନୀୟ ଘଟଣା । ନିଜ ସ୍ତ୍ରୀକୁ ଏକ ଧାରୁଆ ଅସ୍ତ୍ରରେ ହତ୍ୟା ଉଦ୍ୟମ...

ବନ୍ଦ୍ରୀ ଠାରୁ କଡିଙ୍ଗଗଡ଼ାପା ରାସ୍ତା ନିର୍ମାଣ ବିଳମ୍ବକୁ ନେଇ ଜନ ଅଶନ୍ତୋଷ

ରିପୋର୍ଟ: କୈଳାସ ମାଳବିଶୋୟୀ // ଚନ୍ଦ୍ରପୁର ତା୨୨-୧୦): ରାୟଗଡା ଜିଲ୍ଲା ଚନ୍ଦ୍ରପୁର ବ୍ଲକ ବନ୍ଦୀରି ଗ୍ରାମରୁ କଡିଙ୍ଗଗାଡ଼ପା ପର୍ଯ୍ୟନ୍ତ ଲମ୍ବିଥିବା ରାସ୍ତା ମରଣ ଯନ୍ତାରେ ପରିଣତ।ଗଲା ଏକ ବର୍ଷ ପୂର୍ବେ ଜନସାଧାରଣଙ୍କ ଦାବିକୁ ଲକ୍ଷରେ...

Recent Comments

%d bloggers like this: