ରିପୋର୍ଟ : ଧ୍ରୁବରାଜ ମିଶ୍ର
ସୁବର୍ଣ୍ଣପୁର, (୧୪/୦୫) : ବହୁ ସମସ୍ୟା ମଧ୍ୟରେ ଜିଲ୍ଲା ମୁଖ୍ୟ ଚିକିତ୍ସାଳୟର ସ୍ୱାସ୍ଥ୍ୟ ଅସୁସ୍ଥ ହୋଇ ପଡିଥିବା ଅଭିଯୋଗ ହୋଇଛି । ନୂତନ ଭାବେ ନିର୍ମିତ ଜିଲ୍ଲା ଶିଶୁ ଓ ମାତୃ ସ୍ୱାସ୍ଥ୍ୟ କେନ୍ଦ୍ରରେ ଅନେକ ଲୋକ ମହୁମାଛି ଆକ୍ରମଣର ଶିକାର ହୋଇଥିବା ଅଭିଯୋଗ ହୋଇଛି ।
ସ୍ୱାସ୍ଥ୍ୟ କେନ୍ଦ୍ରର ତୃତୀୟ ମହଲାରେ ଥିବା ଏକ ମହୁଫେଣାକୁ କେହି ଜଣେ ଭାଙ୍ଗି ଦେବାର ପ୍ରୟାସ କରିବାରୁ ମହୁଫେଣାରେ ଥିବା ମହୁମାଛି ବିକ୍ଷିପ୍ତ ହୋଇ ପଡିଛନ୍ତି । ବହୁ ସମସ୍ୟା ମଧ୍ୟରେ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟ । କି ରୋଗୀ କି ରୋଗୀଙ୍କ ସମ୍ପର୍କୀୟ ସଭିଏଁ ଚିକିତ୍ସାଳୟର କବାଟ ଦେଇ ରହୁଛନ୍ତି । ଅସହ୍ୟ ଗରମରେ ନୂତନ ଭାବେ ତିଆରି ଚିକିତ୍ସାଳୟର ପଙ୍ଖା, କୁଲର ଓ ଏସି ଆବଶ୍ୟକ ଅନୁଯାୟୀ କାର୍ଯ୍ୟ କରୁ ନ ଥିବାରୁ ରୋଗୀଙ୍କ ସମ୍ପର୍କୀୟ ମାନେ ନିଜ ନିଜ ଘରୁ ପଙ୍ଖା ଆଣି ଚିକିତ୍ସାଳୟକୁ ଆସୁଥିବା ଅଭିଯୋଗ ହେଉଛି । ତେବେ ପ୍ରଚଣ୍ଡ ଖରା ଓ ତାତି ବେଳାରେ ମହୁମାଛିଙ୍କ ଆକ୍ରମଣ ଭୟରେ ପ୍ରସୂତି ମହିଳା, ନବଜାତ ଶିଶୁ ମାନଙ୍କୁ କବାଟ ଦେଇ ରଖିବାକୁ ହୋଇଛି ।
ନୂତନ ଚିକିତ୍ସାଳୟ କାର୍ଯ୍ୟକ୍ଷମ ହେବା ପୂର୍ବରୁ ମହୁଘରାଟି ତିଆରି ହୋଇଥିବା ବେଳେ ଚିକିତ୍ସାଳୟ କର୍ତ୍ତୃପକ୍ଷ ତାକୁ ହଟେଇବାକୁ କୌଣସି ପଦକ୍ଷେପ ନେଲେ ନାହିଁ । ଫଳରେ ଦିନକୁ ଦିନ ମହୁମାଛି ଅଧିକରୁ ଅଧିକ ଜନ୍ମ ନେଇ ମହୁଘରାଟିରେ ବାସ କରୁଥିଲେ । ତେବେ କେହି ଜଣେ ଆଜି ପାହାନ୍ତିଆରେ ମହୁଫେଣାଟିକୁ ଭାଂଗିବାର ପ୍ରଚେଷ୍ଟା କରିବାକୁ ମହୁମାଛି ମାନେ ବିକ୍ଷିପ୍ତ ଅବସ୍ଥାରେ ଚିକିତ୍ସାଳୟର ଏଣେ ତେଣେ ଉଡି ଲୋକଙ୍କୁ ଆକ୍ରମଣ କରିଛନ୍ତି । ଏହିପରି ଗତ ରାତି (ଶନିବାର) ର ପ୍ରାୟ ୩ଟା ସମୟରୁ ଶିଶୁ ଓ ମାତୃ ସ୍ୱାସ୍ଥ୍ୟ କେନ୍ଦ୍ରରେ ପାଣିର ଅଭାବ ଦେଖା ଦେଇଛି । ରୋଗୀଙ୍କ ସେବା ଯତ୍ନ କରିବାକୁ ଆସିଥିବା ରୋଗୀଙ୍କ ସମ୍ପର୍କୀୟ ମାନେ ଆଜି ମହାନଦୀର ବିଭିନ୍ନ ଘାଟରେ ନିଜର ସ୍ନାନ ଶୌଚ କରିବାକୁ ପଡିଥିବା ଅଭିଯୋଗ ହୋଇଛି ।
ରୋଗୀମାନେ ଆଜି ପ୍ରାୟ ୧୧ଟା ପର୍ଯ୍ୟନ୍ତ ନିଜ ନିଜର ନିତ୍ୟକର୍ମ କରି ନାହାନ୍ତି । ସେହିପରି ରୋଗୀ ଓ ରୋଗୀଙ୍କ ସଂପର୍କିୟମାନଙ୍କୁ ବାହାର ବଜାରରୁ ପାଣି କିଣିବାକୁ ପଡିଛି । ତେବେ ବିଧାୟକ ତଥା ସ୍ୱାସ୍ଥ୍ୟ ମନ୍ତ୍ରୀଙ୍କ ନିଜ ଜିଲ୍ଲା ଓ ନିଜ ନିର୍ବାଚନ ମଣ୍ଡଳୀର ଜିଲ୍ଲା ମୁଖ୍ୟ ଚିକିତ୍ସାଳୟର ଏହି ଅବସ୍ଥା ପାଇଁ ଜନସାଧାରଣରେ ଅସନ୍ତୋଷ ପ୍ରକାଶ ପାଉଛି । ଯଦି ସ୍ୱାସ୍ଥ୍ୟ ମନ୍ତ୍ରୀଙ୍କ ଜିଲ୍ଲା ମୁଖ୍ୟ ଚିକିତ୍ସାଳୟର ପ୍ରସୂତି ଓ ଶିଶୁ ସ୍ବାସ୍ଥ୍ୟ କେନ୍ଦ୍ର ଏପରି ଅବ୍ୟବସ୍ଥା ଘେରରେ ରହିଛି ତେବେ ରାଜ୍ୟର ଉପାନ୍ତ ଅଞ୍ଚଳରେ ଥିବା ସ୍ୱାସ୍ଥ୍ୟ କେନ୍ଦ୍ର ଗୁଡିକ କିଭଳି ପରିଚାଳିତ ହେଉଥିବ ସେନେଇ ଜନସାଧାରଣ ପ୍ରଶ୍ନ କରିଛନ୍ତି । ତେବେ ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷ ତୁରନ୍ତ ଚିକିତ୍ସାଳୟକୁ ପାଣି ଯୋଗାଇ ଦେବା ସହିତ ମହୁଘରାଟିକୁ କାଢି ନେବା ପାଇଁ ରୋଗୀଙ୍କ ସମ୍ପର୍କୀୟ ଦାବି କରିଛନ୍ତି ।
ଗଣମାଧ୍ୟମ ପ୍ରତିନିଧିମାନେ ଚିକିତ୍ସାଳୟରେ ଥିବା ପ୍ରସୂତି, ଶିଶୁ ଓ ରୋଗୀଙ୍କ ସମ୍ପର୍କୀୟଙ୍କ ସମସ୍ୟା ହୃଦବୋଧ କରି ଚିକିତ୍ସାଳୟ କର୍ତ୍ତୃପକ୍ଷଙ୍କ ପ୍ରତିକ୍ରିୟା ନେବା ପାଇଁ ଚେଷ୍ଟା କରିଥିଲେ । ହେଲେ ଆଜି ରବିବାର ସାପ୍ତାହିକ ଅବକାଶ ଥିବାରୁ ଚିକିତ୍ସାଳୟ କର୍ତ୍ତୃପକ୍ଷଙ୍କୁ ଦେଖା କରି ପାରି ନ ଥିଲେ । ତେବେ ଏହି ଚିକିତ୍ସାଳୟର ସମସ୍ୟା ଆଉ କେତେ ସମୟ ପରେ ସମାଧାନ ହେବ ତାହା ସମୟ ହିଁ କହିବ l
[…] : ସନ୍ତୋଷ କୁମାର ନାୟକ ସୁବର୍ଣ୍ଣପୁର, (୨୬/୦୫) : ଆଜି ସୋନପୁର ଶୋଭା କେୟାର […]
[…] : ସନ୍ତୋଷ କୁମାର ନାୟକ ସୁବର୍ଣ୍ଣପୁର, (୨୭/୦୫) : ଏକକୋଟି ରୁ ଉର୍ଦ୍ଧ୍ବ ମୂଲ୍ୟ ର […]
[…] : ଧ୍ରୁବରାଜ ମିଶ୍ର ସୁବର୍ଣ୍ଣପୁର, (୨୮/୦୫) : ଓଡ଼ିଶା ଲଲିତ କଳା ଏକାଡେମୀ, ଓଡିଆ […]
Comments are closed.