ରିପୋର୍ଟ : ରବିଶଙ୍କର ମହାପାତ୍ର
ଭୁବନେଶ୍ବର, (୩/୫) : ଭୁବନେଶ୍ୱର ଜୟଦେବ ଭବନ ଠାରେ ଆଜି ଓଡିଶା ସାମ୍ବାଦିକସଂଘ (OJU) ତରଫରୁ ବିଶ୍ୱ ପ୍ରେସ ସ୍ବାଧୀନତା ଦିବସ ପାଳନ କରାଯାଇଛି ।
ଓଡିଶା ସାମ୍ବାଦିକସଂଘ ର ରାଜ୍ୟ ସଭାପତି ଶ୍ରୀ ଶସିଭୁଷଣ ପ୍ରହରାଜଙ୍କ ନେତୃତ୍ବରେ ଆୟୋଜିତ ଏହି ଉତ୍ସବରେ ମାନ୍ୟବର ପୂର୍ବତନ ମନ୍ତ୍ରୀ ଓ ସାଂସଦ ଶ୍ରୀ ପ୍ରସନ୍ନ କୁମାର ପାଟ୍ଟଶାଣୀ ମୂଖ୍ୟ ଅତିଥି ଭାବେ ଯୋଗଦେଇ ଥିବା ବେଳେ ମାନ୍ୟବର ପୂର୍ବତନ ମନ୍ତ୍ରୀ ତଥା ଜଟଣୀ ବିଧାୟକ ଶ୍ରୀ ସୁରେଶ କୁମାର ରାଉତରାୟ ଅନ୍ୟତମ ଅତିଥି ଭାବେ ଯୋଗଦାନ କରିଥିଲେ । ସୂଚନା ଓ ଲୋକସମ୍ପର୍କ ନିର୍ଦ୍ଦେଶକ ଶ୍ରୀ ସରୋଜ କୁମାର ସାମଲ ଉପସ୍ଥିତ ରହି ସାମ୍ବାଦିକତା ଉପରେ ନିଜର ମତ ପ୍ରକାଶ କରିଥିଲେ । ବହୁ ବରିଷ୍ଠ ସାମ୍ବାଦିକଙ୍କ ସହ ଓଡିଶାର କୋଣ ଅନୁକୋଣରୁ ସାମ୍ବାଦିକ ସଂଘ ସଭ୍ୟ ତଥା ପ୍ରତିନିଧି ମାନେ, ଉପସ୍ଥିତ ରହିଥିଲେ । ରାଜ୍ୟ ଉପ ସଭାପତି ଶ୍ରୀ ରମଣି ରଞ୍ଜନ ଦାଶ, ଶ୍ରୀ ଦୀପକ କୁମାର ନାୟକ, ଦୂର୍ଯ୍ୟୋଧନ ମହାରଣାଙ୍କ ସମେତ ବିଭିନ୍ନ ଖବର କାଗଜ ସମ୍ପାଦକ ତଥା ଗଣମାଧ୍ୟମ ପ୍ରତିନିଧି ମାନେ ଉପସ୍ଥିତ ଥିଲେ । ସୁରେଶ ରାଉତରାୟ ସାମ୍ବାଦିକ ସୁରକ୍ଷା ସମ୍ପର୍କରେ ସରକାରଙ୍କ କଡା ସମାଲୋଚନା କରିବା ସହ ଦିବଙ୍ଗତ ସାମ୍ବାଦିକ ପରିବାରକୁ ବିନା ସରକାରୀ ସହାୟତାରେ ଭତ୍ତା ପ୍ରଦାନ କରି ଆସୁଥିବାରୁ ରାଜ୍ୟ ସଭାପତି ଶସିଭୁଷଣ ପ୍ରହରାଜଙ୍କ ଉଦ୍ୟମକୁ ପ୍ରଶଂସା କରିଥିଲେ ।
ସରକାରଙ୍କ ଦ୍ୱାରା ସାମ୍ବାଦିକଙ୍କ ସ୍ୱାର୍ଥ ସମ୍ବଳିତ ଯେକୌଣସି ବିଷୟ ଉପସ୍ଥାପନା ପାଇଁ ସାମ୍ବାଦିକଙ୍କ ମଧ୍ୟରେ ଏକତା ନିହାତି ଆବଶ୍ୟକ ବୋଲି ଶ୍ରୀ ରାଉତରାୟ ମତ ପ୍ରକାଶ କରିଥିଲେ । ଦୁଃସ୍ଥ ସାମ୍ବାଦିକଙ୍କୁ ଘର ଡିହ, କ୍ବାର୍ଟର,ଅବସର କାଳୀନ ଭତ୍ତା ଇତ୍ୟାଦି ପ୍ରଦାନ ପାଇଁ ସରକାର ନିହାତି ଭାବେ ପଦକ୍ଷେପ ନେବା ଦରକାର ବୋଲି ମତ ପ୍ରକାଶ କରିଥିଲେ । କୋରାପୁଟରୁ ସାଧାରଣ ସମ୍ପାଦକ ହରିଶ କୁମାର ପଟ୍ଟନାୟକ, ଉପ ସଭାପତି ତଥା ଭାରତୀୟ ସାମ୍ବାଦିକ ସଙ୍ଘ (IJU) ସଭ୍ୟ ରବିଶଙ୍କର ମହାପାତ୍ରଙ୍କ ସମେତ ରାଜ୍ୟର ଶତାଧିକ ସାମ୍ବାଦିକ ଏକତ୍ରିତ ହୋଇଥିବା ଜଣାପଡିଛି ।