ରିପୋର୍ଟ : ଧ୍ରୁବରାଜ ମିଶ୍ର
ସୁବର୍ଣ୍ଣପୁର, (୦୫/୦୪) : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ରେ ଖେଳୁଥିବା ବେଳେ କୂଅରେ ପଡି ଦୁଇ ସମ୍ପର୍କୀୟ ଭଉଣି ଙ୍କ ମୃତ୍ୟୁ ଘଟିଛି ।
ମୃତ ଦୁଇ ଭଉଣି ହେଲେ ବୀରମହାରାଜପୁର ର ସିଦ୍ଧିଶ୍ରୀ ଶତପଥୀ (ଦେଢ ବର୍ଷ) ଓ ଦିଶା ମିଶ୍ର (୩ବର୍ଷ) । ଉଭୟ ମୃତ ଦୁଇ ଶିଶୁ କନ୍ୟା ସମ୍ପର୍କରେ ମାମୁ ଝିଅ ଓ ପିଉସି ଝିଅ ଭଉଣୀ ଅଟନ୍ତି । ଦିଶା ମିଶ୍ର ହେଉଛନ୍ତି କମିରା ସ୍କୁଲରେ କାର୍ଯ୍ୟରତ ଶିକ୍ଷକ ଆଲୋକ ମିଶ୍ର ଙ୍କ ଏକ ମାତ୍ର ଝିଅ ଏବଂ ସିଦ୍ଧିଶ୍ରୀ ହେଉଛନ୍ତି ବୀରମହାରାଜପୁର ଡାକ୍ତରଖାନରେ କାର୍ଯ୍ୟରତ ମହିଳା ସ୍ୱାସ୍ଥ୍ୟକର୍ମୀ ଅଳକା ମିଶ୍ର ଙ୍କ ଏକମାତ୍ର ଝିଅ । ମିଳିଥିବା ସୂଚନା ଅନୁସାରେ ମଙ୍ଗଳବାର ସନ୍ଧ୍ୟାରେ ଉଭୟେ ନିଜ ଘର ପଛପଟେ ଖେଳୁଥିବା ବେଳେ କୂଅରେ ପଡିଯାଇ ଥିଲେ । ଦୀର୍ଘ ସମୟ ଧରି ଉଭୟ ଶିଶି କନ୍ୟାଙ୍କୁ ନ ପାଇବାରୁ ପରିବାର ଲୋକେ ଖୋଜାଖୋଜି କରିଥିଲେ । ଉଭୟ ଶିଶୁ କନ୍ୟା କୂଅରେ ପଡିଥିବାର ଦେଖି ତୁରନ୍ତ ଉଭୟ ଙ୍କୁ ସ୍ଥାନୀୟ ଦମକଳ ବାହିନୀ ର ସହୟତାରେ କୂଅରୁ ଉଦ୍ଧାର କରି ପ୍ରଥମେ ବୀରମହାରାଜପୁର ଡାକ୍ତରଖାନା କୁ ନେଇଥିଲେ । ଉଭୟ ଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ପରେ ସୋନପୁର ଜିଲ୍ଲା ଡାକ୍ତରଖାନା କୁ ନିଆଯାଇଥିଲା ।
ମାତ୍ର ସେଠାରେ ଡାକ୍ତର ଉଭୟ ଶିଶୁ କନ୍ୟାଙ୍କୁ ମୃତ ଘୋଷଣା କରିଥିଲେ । ଉକ୍ତ ଖବର ଜଣା ପଡିବା ପରେ ବୀରମହାରାଜପୁର ଅଂଚଳରେ ଶୋକର ଛାୟା ଖେଳାଇ ଯାଇଛି । ସୂଚନାମତେ ଅଳକା ସମ୍ବଲପୁର ର ସଂଗ୍ରାମ କେଶରୀ ଶତପଥି ଙ୍କୁ ବିଭାହ କରିଥିଲେ ମଧ୍ୟ ବୀରମହାରାଜପୁର ଡାକ୍ତରଖାନାରେ ମହିଳା ସ୍ୱାସ୍ଥ୍ୟକର୍ମୀ ଭାବେ କାର୍ଯ୍ୟ କରୁଥିବାରୁ ନିଜ ବାପା କଲ୍ଲୋଳ ମିଶ୍ରଙ୍କ ଘରେ ରହୁଥିଲେ।ଅଳକା ଓ ତାଙ୍କ ବଡବାପା ଙ୍କ ପୁଅ ଶିକ୍ଷକ ଆଲୋକ ଘର ପାଖା ପାଖି ହୋଇଥିବା ବେଳେ ଉଭୟ ଶିଶୁକନ୍ୟା ପ୍ରାୟତଃ ଏକାଠି ଖେଳାବୁଲା କରନ୍ତି । ଆଜି ଉଭୟ ଶିଶୁ କନ୍ୟାଙ୍କ ମୃତଦେହ ଡାକ୍ତରଖାନାରେ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା । ତା’ପରେ ବୀରାମହାରାଜପୁର ନିକଟସ୍ଥ ହରିହର ଯୋର ଠାରେ ଉଭୟଙ୍କ ଅନ୍ତିମ ସଂସ୍କାର କରାଯାଇଥିଲା ।