ରିପୋର୍ଟ : ଧ୍ରୁବରାଜ ମିଶ୍ର
ସୁବର୍ଣ୍ଣପୁର, (୦୧/୦୪) : ଓଡିଆତ୍ୱର ଚାପ ମଧ୍ୟରେ ପଶ୍ଚିମ ଓଡିଶାବାସୀଙ୍କ ନିଜତ୍ୱ ଲୋପ ପାଇ ଯାଉଛି । କୋଶଲି ଭାଷାର ସାମ୍ବିଧାନିକ ମାନ୍ୟତା ସକାଶେ ସ୍ୱର ତୀବ୍ରତର କରିବାକୁ ହେବ । ପଶ୍ଚିମ ଓଡିଶାବାସୀ ଏକ ଔପନିବେଶିକ ଶାସନ ମଧ୍ୟରେ ଅଣନିଶ୍ଵାସୀ ହୋଇଯାଉଛନ୍ତି ।
ଠିକ୍ ଯେମିତି ଦିନେ ହୋଇଥିଲେ ଓଡିଶାବାସୀ ଯେତେବେଳେ ସେମାନଙ୍କୁ ବଙ୍ଗାଳି ଲୋକ କହୁଥିଲେ ‘ଉଡିଆ ଏକଟା ଭାଷା ନଏ’ । ଆଜି ସେମିତି କେତେକ ହୀନମନ୍ୟ ବ୍ୟକ୍ତି କହୁଛନ୍ତି କୋଶଲି ଭାଷା ଏକ ସ୍ୱତନ୍ତ୍ର ଭାଷା ନୁହେଁ । ଭାଷାବିଦ୍ ମାନଙ୍କ ମତରେ କୋଶଲି ଏକ ସ୍ୱୟଂ ସଂମ୍ପୁର୍ଣ୍ଣ ସ୍ୱତନ୍ତ୍ର ଭାଷା ଏବଂ ଏହା ଓଡିଆ ଭାଷାଠାରୁ ଅଧିକ ପ୍ରାଚୀନ ଏବଂ ଅଧିକ ବୈଜ୍ଞାନିକ ଓ ଲାଳିତ୍ୟପୂର୍ଣ୍ଣ । ଓଡିଆ ଭାଷାର ଲିପି ଏହି ସୁବର୍ଣ୍ଣପୁର ମାଟିରୁ ୧୨୦୦ ଖ୍ରୀ.ଅ.ରେ ସ୍ତମ୍ଭେଶ୍ଵରୀ ଶିଳାଲେଖା ଭାବେ ଉତ୍କୀର୍ଣ୍ଣ ହୋଇଥିଲା । ଏହାର ସାମ୍ବିଧାନିକ ମାନ୍ୟତା ସକାଶେ ଓଡିଶା ସରକରା ୨୦୧୪ ମସିହାରୁ କେନ୍ଦ୍ର ସରକାରଙ୍କ ପାଖକୁ ବିଧିବଦ୍ଧ ପ୍ରସ୍ତାବ ପଠାଇ ସାରିଛନ୍ତି ଯାହା କେନ୍ଦ୍ର ସରକାରଙ୍କ ଶୀତଳ ଭଣ୍ଡାରରେ ସଢୁଛି ।
କୋଶଲି ଭାଷା ସାମ୍ବିଧାନିକ ମାନ୍ୟତା ପାଇ ନ ଥିବାରୁ ପଶ୍ଚିମ ଓଡିଶାର ଶିଶୁମାନେ ସେମାନଙ୍କ ମାତୃଭାଷାରେ ଶିକ୍ଷାଦାନରୁ ବଞ୍ଚିତ ହେଉଛନ୍ତି । ଯେଉଁଥିପାଇଁ ସେମାନଙ୍କ ବୌଦ୍ଧିକ ବିକାଶରେ ବାଧା ଉପୁଜୁଛି । କେନ୍ଦ୍ର ସରକାରଙ୍କ ନୂତନ ଶିକ୍ଷାନୀତି ମତେ ଶିଶୁମାନଙ୍କୁ ସେମାନଙ୍କ ମାତୃଭାଷାରେ ଶିକ୍ଷା ଦିଆଯିବ । ସେହି ଦୃଷ୍ଟିରୁ ପଶ୍ଚିମ ଓଡିଶାବାସୀଙ୍କ ମାତୃଭାଷା କୋଶଳି ଭାଷାକୁ ଯଥାଶୀଘ୍ର ସମ୍ବିଧାନର ଅଷ୍ଟମ ପରିଚ୍ଛେଦରେ ସ୍ଥାନିତ କରିବା ପାଇଁ ଆଜି ଭାଷା ସଂପର୍କିତ ଏକ ସାଧାରଣ ସଭାରେ ସର୍ବସମ୍ମତ ମତ ପ୍ରକାଶ ପାଇଥିଲା । ଏ ସଂପର୍କରେ ସ୍ଵମତ ପ୍ରଦାନ କରି ବକ୍ତବ୍ୟ ରଖିଥିଲେ ସମ୍ମାନିତ ଅତିଥି ପ୍ରଫେସର ଶମ୍ଭୁ ଭୂଷଣ ପଣ୍ଡା, ଡ. ଜ୍ୟୋତି ରଂଜନ ବହିଦାର ଓ ଶିକ୍ଷାବିତ ବ୍ରଜମୋହନ ଦାନୀ ।