ରିପୋର୍ଟ : ନରୋତ୍ତମ ପାଢ଼ୀ
ରାୟଗଡା, (୩୧/୦୩) : ଗ୍ରାମବାସୀଙ୍କୁ ଦେଇଥିବା ପ୍ରତିଶୃତି ପାଳନ କଲେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଉପଦେଷ୍ଟା ତଥା ରାୟଗଡା ଜିଲ୍ଲା ବିଜେଡି ସଭାପତି ସୁଧୀର କୁମାର ଦାସ ।
ରାୟଗଡା ଜିଲ୍ଲା ବିଷମକଟକ ବ୍ଲକ ସାହାଡ଼ା ପଞ୍ଚାୟତର ଗଗନମତି ଗ୍ରାମରୁ ଆସିଛି ଏହି ଭଳି ଖବର । ସୂଚନା ଅନୁଯାୟୀ, ଦୀର୍ଘ ଦିନ ଧରି ଗଗନମତି ଗ୍ରାମରେ ପାନୀୟ ଜଳ ସଂକଟ ଲାଗିରହିଥିଲା । ଗାଁ’ରେ ବିଶୁଦ୍ଧ ପାନୀୟ ଜଳର କୌଣସି ଉତ୍ସ ନଥିବାରୁ ଲୋକମାନେ ବିଲ ଓ ଚୁଆରୁ ମଇଳା ପାଣି ସଂଗ୍ରହ କରି ବ୍ୟବହାର କରୁଥିଲେ । ଫଳରେ କିଛିଦିନ ପୂର୍ବେ ଗ୍ରାମବାସୀ ସୁଧୀର କୁମାର ଦାସଙ୍କୁ ସମସ୍ୟା ସମ୍ପର୍କରେ ଜଣାଇଥିଲେ । ଏହା ଜାଣିବା ପରେ ସୁଧୀର ଦାସ ଏକ ମାସ ମଧ୍ୟରେ ସମସ୍ୟାର ସମାଧାନ କରିବାକୁ ପ୍ରତିଶୃତି ଦେଇଥିଲେ । ଆଉ ଧାର୍ଯ୍ୟ ଅବଧି ମଧ୍ୟରେ ଗାଁ’ରେ ଏକ ନଳକୂପ ଖୋଳାଇ ନିଜ ପ୍ରତିଶୃତି ପୂରଣ କରିଛନ୍ତି ଏହି ଲୋକପ୍ରିୟ ଜନ ପ୍ରତିନିଧି । ସୁଧୀର ଦାସଙ୍କ ସହାୟତାରେ ଗାଁ’ରେ ଏକ ନଳକୂପ ଖନନ ହୋଇଛି । ଆଉ ଏହି ମହତ କାର୍ଯ୍ୟପାଇଁ ଗଗନମତି ଗ୍ରାମବାସୀ ତାଙ୍କୁ କୃତଜ୍ଞତା ଜ୍ଞାପନ କରିଛନ୍ତି ।ଖରା ଦିନରେ ଜଳ କଷ୍ଟରୁ ମୁକ୍ତି ମିଳିଥିବାରୁ ସମସ୍ତେ ଖୁସି ପ୍ରକାଶ କରିଛନ୍ତି । ବିଷମକଟକ ବ୍ଲକର ପୂର୍ବତନ ବ୍ଲକ ଉପାଧ୍ୟକ୍ଷ ରମେଶ ପାଲାକା, ପୂର୍ବତନ ସରପଞ୍ଚ ଜୟରାମ କାଡ୍ରାକା, ସମାଜସେବୀ ଅଶୋକ ପାଡ଼ି, ବିଜେଡି ଯୁବନେତା ସୁରେନ୍ଦ୍ର ମାଣ୍ଡିକାଙ୍କୁ ମଧ୍ୟ ଗଗନମତି ଗ୍ରାମବାସୀ ଧନ୍ୟବାଦ ଜଣାଇଛନ୍ତି । ଶ୍ରୀ ଦାସଙ୍କ ଏହିଭଳି ମହାନ କାର୍ଯ୍ୟକୁ ବିଭିନ୍ନ ମହଲରେ ପ୍ରସଂଶା କରାଯାଇଛି ।