ଦୁମଦୁମି ସେବାଶ୍ରମ ସ୍କୁଲରେ ତାଲା ପକାଇଲେ ଛାତ୍ରଛାତ୍ରୀ ଓ ଅଭିଭାବକ

ରିପୋର୍ଟ: ବିମଳେନ୍ଦୁ ସାହୁ //
ଲୋଇସିଂହା(୨୦/୦୨): ଆବଶ୍ୟକ ଶିକ୍ଷକ ନିଯୁକ୍ତି ସାଙ୍ଗକୁ ସ୍କୁଲର ବହୁବିଧ ସମସ୍ୟା ସମାଧାନ ଦାବିରେ ଲୋଇସିଂହା ବ୍ଲକ କୁଟେନପାଲି ପଞ୍ଚାୟତ ସ୍ଥିତ ଦୁମଦୁମି ଗ୍ରାମର ସେବାଶ୍ରମ ସ୍କୁଲରେ ଛାତ୍ରଛାତ୍ରୀ ଓ ଅଭିଭାବକ ଗୁରୁବାର ତାଲା ପକାଇ ଦେଇଥିବା ଜଣାଯାଇଛି ।

ଖବର ମତେ, ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଶିକ୍ଷାଦାନ ବ୍ୟବସ୍ଥା ରହିଥିବା ଏହି ବିଦ୍ୟାଳୟରେ ୨୬୮ ଜଣ ଛାତ୍ରଛାତ୍ରୀ ପାଠ ପଢ଼ନ୍ତି । ଶିକ୍ଷା ଅଧିକାର ଆଇନ ଅନୁସାରେ ଏତେ ସଂଖ୍ୟକ ପିଲାଙ୍କ ପାଇଁ ୯ ଜଣ ଶିକ୍ଷକ ରହିବା କଥା । ମାତ୍ର ଏଠାରେ ୬ ଜଣ ଶିକ୍ଷକ/ଶିକ୍ଷୟିତ୍ରୀ ଅଛନ୍ତି । ତନ୍ମଧ୍ୟରୁ ଗତ ନଭେମ୍ବର ମାସରୁ ଜଣେ ଶିକ୍ଷୟିତ୍ରୀ ପ୍ରସୂତି କାଳୀନ ଛୁଟିରେ ଥିବା ଅଭିଭାବକ ପ୍ରକାଶ କରିଛନ୍ତି । ଏପରିକି ଆଉ ଜଣେ କର୍ମଚାରୀ ଏଠାରୁ ଦରମା ପାଉଥିବା ବେଳେ ଅନ୍ୟତ୍ର ଡେପୁଟେସନ ରେ ଯାଇଥିବା ଯୋଗୁଁ ଶିକ୍ଷା ଦାନରେ ଘୋର ବ୍ୟାଘାତ ସୃଷ୍ଟି ହେଉଥିବା ପରିଚାଳନା କମିଟି ସଭାପତି ରମେଶ ପାତ୍ର ଅଭିଯୋଗ କରିଛନ୍ତି ।

ଏ ନେଇ ବିଭାଗୀୟ ଅଧିକାରୀଙ୍କୁ ପୂର୍ବରୁ ଲିଖିତ ଭାବେ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ନ ମିଳିବାରୁ ଆଜି ଶତାଧିକ ଛାତ୍ରଛାତ୍ରୀ ତଥା ଅଭିଭାବକ ସ୍କୁଲ ଗେଟରେ ତାଲା ମାରି ଦେଇଥିଲେ । ଏଥିସହିତ ସ୍କୁଲ ସମ୍ମୁଖରେ ଧାରଣାରେ ବସିଥିଲେ । ସ୍କୁଲର ପ୍ରଧାନ ଶିକ୍ଷକ ନରସିଂହ ଚରଣ ପଧାନୀ ଏ ବାବଦରେ ବଲାଂଗୀର ଡିଡବ୍ଲୁଓ ଙ୍କୁ ସୂଚନା ଦେବା ପରେ ଲୋଇସିଙ୍ଘା ଡବ୍ଲ୍ୟୁଇଓ ଘଟଣାସ୍ଥଳରେ ପହଂଚି ଛାତ୍ରଛାତ୍ରୀ ଓ ଅଭିଭାବକ ଙ୍କ ସହିତ ଆଲୋଚନା କରିଥିଲେ ।

ଖୁବ ଶୀଘ୍ର ବିଦ୍ୟାଳୟରେ ଆଉ ଜଣେ ଶିକ୍ଷକଙ୍କୁ ନିଯୁକ୍ତି ଦିଆଯିବା ସହିତ ଡେପୁଟେସନ ରେ ଯାଇଥିବା କର୍ମଚାରୀଙ୍କୁ ଫେରାଇ ଅଣା ଯିବ ବୋଲି ପ୍ରତିଶ୍ରୁତି ଦିଆଯିବା ପରେ ଅପରାହ୍ନ ଗୋଟାଏ ରେ ଧାରଣା ପ୍ରତ୍ୟାହୃତ ହୋଇଥିଲା ।

Comments are closed.