ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୨୩/୦୨) : ବିକଳାଙ୍ଗ ଭତ୍ତା ପାଇଁ ଖଲି ନାୟକଙ୍କ ସଂଘର୍ଷ । ଭାରତ ସ୍ୱାଧୀନ ହେଲା ସତ, ଶାସକ ବଦଳିଲେ କିନ୍ତୁ ମନେ ହେଉଛି ଆଜିବି ଚାଲିଛି ଇଂରେଜ ଶାସନ ।
ସରକାରଙ୍କ ଯୋଜନା ମାଳ ମାଳ, କିନ୍ତୁ ଏହି ଯୋଜନା ସବୁ କାହା ପାଇଁ ଆଜିବି ଏହା ପ୍ରଶ୍ନବାଚୀ ସୃଷ୍ଟି କରିଛି ? ଏକଥା ଆମେ କରୁନାହୁଁ, ଏପରି ଏକ ଘଟଣା ଦେଖିବାକୁ ମିଳିଛି ରାୟଗଡ଼ା ଜିଲ୍ଲା ପଦ୍ମପୁର ବ୍ଲକ ଅନ୍ତର୍ଗତ ଆଖୁସିଙ୍ଗ ଗ୍ରାମରେ । ବିକଳାଙ୍ଗ ଭତ୍ତା ପାଇଁ ଦୀର୍ଘ ଚାରି ବର୍ଷର ସଂଘର୍ଷ କଥା ବଖାଣିଛନ୍ତି ଆଖୁସିଙ୍ଗ ଗ୍ରାମ ୱ।ଡ ନମ୍ବର ୩ ର ଖଲି ନାୟକ । ବିଧବା ମାଁ, ବିକଳାଙ୍ଗ ସ୍ତ୍ରୀ ଓ ଦୁଇ ପୁଅଙ୍କ ସହ ଆଖୁସିଙ୍ଗ ଗ୍ରାମର ୱ।ଡ ନମ୍ବର ୩ ରେ ବାସ କରନ୍ତି ଖଲି ନାୟକ । ଡ୍ରାଇଭର କାମ କରି ଯାହା ରୋଜଗାର କରୁଥିଲେ ପାଞ୍ଚ ପ୍ରାଣୀ କୁଟୁମ୍ବ ଦୁଃଖେ ସୁଖେ ଚଳି ଯାଉଥିଲେ । କିନ୍ତୁ ଦଇବ ଦାଉ ସାଧିଲା, ଏକ ବିବାହ ଉତ୍ସବରେ ବାଣ ଧରିଥିବା ସମୟରେ ହଠାତ୍ ତାହା ବିସ୍ଫୋରଣ ଘଟିଲା । ଫଳରେ ଖଲି ନାୟକଙ୍କ ବାମହାତ କାଟିବାକୁ ପଡ଼ିଲା । ବର୍ତ୍ତମାନ ଖଲି ନାୟକ କୌଣସି କାମ କରି ପାରୁନାହାନ୍ତି । ସେ ଏବେ ନିଜ ବିକଳାଙ୍ଗ ସ୍ତ୍ରୀ ଉପରେ ନିର୍ଭରଶୀଳ ।
ସରକାରଙ୍କ ତରଫରୁ ବିକଳାଙ୍ଗ ପ୍ରମାଣପତ୍ର ମିଳିଛି । କିନ୍ତୁ ଚାରିବର୍ଷ ହେଲା ବିକଳାଙ୍ଗ ଭତ୍ତା ପାଇଁ ପଞ୍ଚାୟତ ଠାରୁ ଆରମ୍ଭ କରି ବ୍ଲକ, ଜିଲ୍ଲାପାଳଙ୍କ ଠାରୁ ରାଜନେତା ସମସ୍ତଙ୍କୁ ଗୁହାରି କରି ଶେଷରେ ନିରାଶ ହେବାକୁ ପଡ଼ିଛି । ଦୀର୍ଘ ୩୦ ବର୍ଷ ହେଲା ଭଙ୍ଗା ଦଦରା ଝୁପୁଡି ଘରେ ଖଲି ନାୟକଙ୍କ ପରିବାର ବାସ କରୁଥିଲେ ମଧ୍ୟ ଆଜି ପର୍ଯ୍ୟନ୍ତ ଆବାସ ଯୋଜନାରେ ସାମିଲ ହୋଇ ପାରିନାହାନ୍ତି । ସରକାରଙ୍କ ଖାଦ୍ୟ ସୁରକ୍ଷା ଯୋଜନାରେ ମିଳୁଥିବା ୧୫ କେଜି ଚାଉଳ ଛଡ଼ା ଅନ୍ୟ କିଛି ଯୋଜନାରେ ସାମିଲ ହୋଇ ପାରିନାହାନ୍ତି ଖଲି ନାୟକଙ୍କ ପରିବାର । ବିଧବା ମାଁ ସ୍ୱାମୀଙ୍କ ମୃତ୍ୟୁର ଚାରି ବର୍ଷ ପରେ ଏବେ ଭତ୍ତା ପାଉଛନ୍ତି ।
ଘରଟିଏ ପାଇଁ ପଞ୍ଚାୟତ, ବ୍ଲକ, ଜିଲ୍ଲାପାଳ, ସରପଞ୍ଚ ଠାରୁ ଆରମ୍ଭ କରି ସ୍ଥାନୀୟ ନେତା ମନ୍ତ୍ରୀ ସମସ୍ତଙ୍କୁ ଗୁହାରି କରିଛନ୍ତି, କିନ୍ତୁ ଖଲି ନାୟକଙ୍କ ପାଇଁ ଆବାସ ଯୋଜନା ସାତ ସପନ ପାଲଟିଛି । ଭୋଟ ସମୟରେ ନେତା ମନ୍ତ୍ରୀ ମାନେ ପ୍ରତିଶ୍ରୁତିରେ ପୋତି ପକାନ୍ତି ନିର୍ବାଚନ ସରିଗଲେ କାହାର ଦେଖା ମିଳୁଥିବା ଖଲି ନାୟକ ଅଭିଯୋଗ କରିଛନ୍ତି । ବର୍ଷାଦିନେ ଘରେ ରହିବା କଷ୍ଟକର ହୋଇପଡେ, ପଲିଥିନ ଚିରି ଯାଇଥିବାରୁ ଘର ସାରା ପାଣି ଭର୍ତ୍ତି ହୋଇଯାଏ । ଫଳରେ ଲୋକଙ୍କ ବାରଣ୍ଡାରେ ପରିବାର ଲୋକେ ଆଶ୍ରୟ ନେଇଥାନ୍ତି । ତେବେ କେବେ ସରକାରଙ୍କ ଏହି ଅବହେଳିତ ପରିବାର ପ୍ରତି ଦୃଷ୍ଟି ପଡୁଛି ଓ ଖଲି ନାୟକଙ୍କୁ ବିକଳାଙ୍ଗ ଭତ୍ତା ସହ ତାଙ୍କ ପରିବାର ଆବାସ ଯୋଜନାରେ ସାମିଲ ହୋଇ ସରକାରୀ ଘର ଖଣ୍ଡିଏ ପାଇବାର ସ୍ଵପ୍ନ ପୂରଣ ହେଉଛି ଦେଖିବାକୁ ବାକି ରହିଲା ।