ଗୁଣିଗାରେଡ଼ି ସନ୍ଦେହରେ ହତ୍ୟା ମାମଲା, ୪ ଜଣଙ୍କୁ ଗିରଫ କଲା ଏମଭି୭୯ ପୋଲିସ

ରିପୋର୍ଟ: ନୟମି ଖରା //
ପଡିଆ,୦୭/୦୨: ମାଲକାନଗିରି ଜିଲ୍ଲା ସୀମାନ୍ତ ପଡିଆ ବ୍ଲକ ଅନ୍ତର୍ଗତ ଶିମିଳିବାଞ୍ଛା ଗ୍ରାମରେ ଗୁଣିଗାରେଡ଼ି ସନ୍ଦେହରେ ଗତ ମଙ୍ଗଳବାର ଦିନ ଜଗା କୁରାମ ନାମକ ଜଣେ ବୃଦ୍ଧାଙ୍କୁ ଲାଠିରେ ପିଟି ହତ୍ୟା କରି ହତ୍ୟାକାରୀ ମାନେ ଖସିଯିବାକୁ ଚେଷ୍ଟା କରିଥିଲେ । ତେବେ ଏ ସମ୍ପର୍କରେ ସୂଚନା ପାଇ ମୃତକର ପୁଅ ରାମା କୁରାମ ଗତକାଲି ଏମଭି୭୯ ଥାନାରେ ଲିଖିତ ଅଭିଯୋଗ କରିଥିଲେ ।

ରାମାର ଅଭିଯୋଗକୁ ଭିତ୍ତି କରି ପୋଲିସ ଗତକାଲି ସେହି ଗ୍ରାମରେ ପହଂଚି ଶବ ଜବତ ଓ ବ୍ୟବଚ୍ଛେଦ ସହ ତଦନ୍ତ ଆରମ୍ଭ କରିଥିଲା । ଆଜି ବିଭିନ୍ନ ଦିଗରୁ ଘଟଣାର ତଦନ୍ତ କରି ଏମ୍ ଭି ୭୯ ଥାନା ଭାରପ୍ରାପ୍ତ ଅଧିକାରୀ ହରିଶ୍ଚନ୍ଦ୍ର ଗୋଲୋରୀଙ୍କ ନେତୃତ୍ବରେ ଏକ ଟିମ ଶିମିଳିବାଞ୍ଛା ଗ୍ରାମରେ ପହଂଚି ଏହି ହତ୍ୟାକାଣ୍ଡରେ ସାମିଲ ଥିବା ଲାଚ୍ଛା ବେଟୀ, ମୂକା କୁରାମୀ, କାନା ମାଢ଼ି ଓ ଏରା କୁରାମୀ ୪ଜଣ ଅଭିଯୁକ୍ତଙ୍କୁ ନାଟକୀୟ ଉପାୟରେ କାବୁ କରିବାରେ ସଫଳ ହୋଇଥିଲେ । ଏହାପରେ ସନ୍ଧ୍ୟାରେ ଅଭିଯୁକ୍ତଙ୍କୁ ଥାନାକୁ ଆଣି ପଚରାଉଚରା କରାଯିବା ପରେ କୋର୍ଟ ଚାଲାଣ କରାଯିବ ବୋଲି ପୋଲିସ ପକ୍ଷରୁ କୁହାଯାଇଛି। ଘଟଣା ମୁତାବକ ଗତ ୪ ତାରିଖ ସକାଳେ ଏହି ଚାରି ଜଣ ଗ୍ରାମରେ ଗୁଣିଗାରେଡ଼ି କରି ଲୋକଙ୍କୁ ମାରୁଥିବା ସନ୍ଦେହ କରି ଜଗା କୁରାମୀକୁ ତାର ଚାଷ ଜମିରେ ଥିବା ଲାଡି ଘରେ ଶୋଇଥିବା ବେଳେ ଲାଠିରେ ପିଟି ପିଟି ହତ୍ୟା କରିଥିଲେ । ଏହା ପରେ ମୃତ ଶରୀର କୁ ପୋତିଦେଇ ଘଟଣାକୁ ଚାପି ଦେବାକୁ ଚେଷ୍ଟା କରିଥିଲେ । ତେବେ ମୃତକର ପୁଅ ରାମାର ଅଭିଯୋଗ ପାଇ ପୋଲିସ ପକ୍ଷରୁ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଇ ହତ୍ୟାକାରୀଙ୍କୁ ୨୪ ଘଣ୍ଟା ମଧ୍ୟରେ କାବୁ କରାଯାଇଥିଲା ।

Comments are closed.