ରିପୋର୍ଟ : ଓଡିଶା ନ୍ୟୁଜ ୨୪ ବ୍ୟୁରୋ //
ହାଇଦ୍ରାବାଦ, (୧୨/୦୨) : କଳିଙ୍ଗ ସ୍ୱରାଜ ମହିଳା ୱିଙ୍ଗ୍ ଦ୍ୱାରା ଆୟୋଜିତ ଓଡିଶା ଖାଦ୍ୟ ଏବଂ ହସ୍ତଶିଳ୍ପ ମେଳା ହାଇଦ୍ରାବାଦର ମାଧପୁରର ଶିଲପରାମମ୍ ଠାରେ ଅନୁଷ୍ଠିତ ହୋଇଯାଇଛି ।
କଳିଙ୍ଗ ସ୍ୱରାଜ ମହିଳା ୱିଙ୍ଗ୍ ଦ୍ୱାରା ହାଇଦ୍ରାବାଦ ଠାରେ ହସ୍ତଶିଳ୍ପ ମେଳା କାର୍ଯ୍ୟକ୍ରମରେ ଓଡିଶାର କାରିଗର ଏବଂ ବୁଣାକାର, ପାରମ୍ପାରିକ ଖାଦ୍ୟ, ହସ୍ତତନ୍ତ ଏବଂ ବୁଣା କୌଶଳକୁ ଅଧିକ ଦର୍ଶକଙ୍କ ନିକଟରେ ପ୍ରଦର୍ଶନ କରିବା ପାଇଁ ଏକ ଉତ୍ତମ ପ୍ଲାଟଫର୍ମ ଥିଲା । ଏହି ମେଳା ସହରର ବିଭିନ୍ନ ସ୍ଥାନରୁ ହଜାର ହଜାର ପରିଦର୍ଶକଙ୍କୁ ଆକର୍ଷିତ କରିଥିଲା । ଖାଦ୍ୟ ଷ୍ଟଲ ଗୁଡିକରେ ଲୋକଙ୍କ ପ୍ରବଳ ଭିଡ ଦେଖିବାକୁ ମିଳିଥିଲା ।
ତେଲେଙ୍ଗାନା ସରକାରଙ୍କ ସ୍ୱତନ୍ତ୍ର ମୁଖ୍ୟ ଶାସନ ସଚିବ ଭାବେ କାର୍ଯ୍ୟ କରୁଥିବା ଏକ୍ସ-ଆଇଏସ ବି.ପି. ଆଚାର୍ଯ୍ୟ ଏହି ମେଳାକୁ ଉଦଘାଟନ କରିଥିଲେ । ଏଥିରେ ଉପସ୍ଥିତ ଥିବା ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ୟାଦାଦ୍ରି କଲେକ୍ଟର ଶ୍ରୀମତୀ ପାମେଲା ଶତପଥି ଏବଂ ଡଃ ଦୀପାଙ୍କ ଶତପଥି, ଡଃ ମାନସ ପାଣିଗ୍ରାହି, ଡଃ ଅନୁରାଧା ପଣ୍ଡା ଏବଂ ମଞ୍ଜିରା ଗ୍ରୁପର ସିଏମଡି ଶ୍ରୀ ଗଜାଲା ଯୋଗାନନ୍ଦ ଉପସ୍ଥିତ ଥିଲେ ।
କାରିଗର ଏବଂ ବୁଣାକାରମାନେ ହସ୍ତତନ୍ତ ଏବଂ ବିଭିନ୍ନ ପ୍ରକାରର ବସ୍ତ୍ରର ସମ୍ଭାର ମେଳାରେ ଦେଖିବାକୁ ମିଳିଥିଲା । ଯେଉଁଥିରେ ହ୍ୟାଣ୍ଡଲୁମ୍ ଶାଢ଼ୀ, ପାରମ୍ପାରିକ ଆପ୍ଲିକ୍ କାର୍ଯ୍ୟ, ଚମତ୍କାର ପଟଚିତ୍ର , ପିତ୍ତଳ ଏବଂ କଂସା ବାସନ ଦେଖିବାକୁ ମିଳିଥିଲା । ମେଳାରେ ଥିବା ଖାଦ୍ୟ ଷ୍ଟଲଗୁଡିକ ଲୋକପ୍ରିୟ ଓଡିଆ ଦହିବରା ଆଳୁଦମ୍, ମସଲାଯୁକ୍ତ ଏବଂ ସ୍ୱାଦଯୁକ୍ତ ଚାଟ୍, ଏବଂ ଚାଉଳଚୁନା ମଇଦାରୁ ପ୍ରସ୍ତୁତ ପିଠା ଏବଂ ପ୍ରସିଦ୍ଧ ଓଡିଶା ରସଗୋଲା ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା । ସନ୍ଧ୍ୟାରେ ଏକ ମନଲୋଭା ସାଂସ୍କୃତିକ କାର୍ଯ୍ୟକ୍ରମ ଦ୍ୱାରା କୋରାପୁଟ ବାଲିମେଳାର ଏକ ପ୍ରସିଦ୍ଧ ଆଦିବାସୀ ଦଳ ସଂଗୀତ ଏବଂ ବିଭିନ୍ନ ସୁନ୍ଦର ଲୋକନୃତ୍ୟ ପ୍ରଦର୍ଶିତ କରିଥିଲେ ।