ଖୁଣ୍ଟପାଲି ବାଲିଯାତ୍ରାରେ ବାଲିଯାତ୍ରା ପୁସ୍ତକ ଉନ୍ମୋଚିତ

ବରଗଡ(୧୨/୧୧): ସୋମବାର ଦିନ ସନ୍ଧ୍ୟାରେ ଖୁଣ୍ଟପାଲି ବରଗଡ ଗ୍ରାମରେ ଅନୁଷ୍ଠିତ ବାଲିଯାତ୍ରା ମହୋତ୍ସବ ଅବସରରେ ଆୟୋଜିତ ଜଳନ୍ଧର ଦରବାର ଠାରେ ଖୁଣ୍ଟପାଲି ବାଲିଯାତ୍ରା ଶୀର୍ଷକ ଏକ ପୁସ୍ତକ ଉନ୍ମୋଚିତ ହୋଇଯାଇଛି । ପୁସ୍ତକଟିକୁ ରଚନା କରିଛନ୍ତି ଅଧ୍ୟାପକ ଗୋପାଳ କୃଷ୍ଣ ମିଶ୍ର । ଉନ୍ମୋଚନ କରିଛନ୍ତି ବରଗଡ ବିଧାୟକ ତଥା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ଦେବେଶ ଆଚାର୍ଯ୍ୟ, ପୂର୍ବତନ ବିଧାୟକ ସାଧୁ ଚରଣ ନେପାଳ, ଯୁବ ନେତା ଉମେଶ ପଣ୍ଡା, ଜଳନ୍ଧର ମହାରାଜ ଭୁବନେଶ୍ବର ପ୍ରଧାନ, ପୂର୍ବତନ ସରପଞ୍ଚ ତଥା ମଞ୍ଚ ପରିଚାଳକ ଦୁର୍ବାଦଳ ମେହେର, ଜଗନ୍ନାଥ ଦାସ ଏବଂ ନରୋତ୍ତମ କୁମ୍ଭାର ।

ଶହ ଶହ ବର୍ଷରୁ ଅନୁଷ୍ଠିତ ହୋଇ ଆସୁଥିବା ଐତିହ୍ଯ ସମ୍ପନ୍ନ ଯାତ୍ରାଟିଏ ହୋଇ ଥିଲେ ମଧ୍ୟ ଯାତ୍ରା ସମ୍ପର୍କରେ ଅଦ୍ୟାପି କୌଣସି ସ୍ବତନ୍ତ୍ର ପୁସ୍ତକ ପ୍ରକାଶିତ ହୋଇ ନ ଥିବା ରୁ ଏବଂ ଯାତ୍ରାର ପ୍ରତ୍ୟେକ ଦିଗ ପ୍ରତି ଆଲୋକପାତ କରିବାକୁ ଧ୍ୟାନ ଦିଆଯାଇଥିବାରୁ ପ୍ରକାଶିତ ପୁସ୍ତକଟି ଅତ୍ୟନ୍ତ ମୂଲ୍ୟବାନ ସାବ୍ୟସ୍ତ ହେବ ନୂତନ ପୁସ୍ତକ ରଚନା ପାଇଁ ସହାୟକ ହେବ ବୋଲି ଲେଖକ ମଞ୍ଚରେ ନିଜର ବକ୍ତବ୍ୟ ରଖିଥିଲେ । ଉକ୍ତ ସାରସ୍ବତ ଉପହାର ପାଇଁ ଯାତ୍ରା କମିଟୀ ତରଫରୁ ସଭାପତି ରୋହିତ କୁମ୍ଭାର ସଂପାଦକ ଅଶ୍ନୀନି ପାତ୍ର ଏବଂ କୋଷାଧ୍ୟକ୍ଷ ବେଲାଲ ମେହେର, ଲେଖକ ଗୋପାଳ କୃଷ୍ଣ ମିଶ୍ରଙ୍କୁ ଉପଢୌକନ ମାନପତ୍ର ଏବଂ ସ୍ମୃତି ଫଳକ ଦେଇ ସମ୍ମାନିତ କରିଥିଲେ । ପରିଶେଷରେ ଜଳନ୍ଧର ମହାରାଜ ଭୁବନେଶ୍ବର ପ୍ରଧାନ ଧନ୍ୟବାଦ ଅର୍ପଣ କରିଥିଲେ । ଅତିଥି ଅଭିଭାଷଣ ପରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ରିପୋର୍ଟ: ନିରୋଜ ପାଣି

Comments are closed.