ସରକାରୀ ଜାଗାରେ ୮୦ ଲକ୍ଷ ବ୍ୟୟରେ ଦୋକାନ ଘର ନିର୍ମାଣକୁ ନେଇ ବିବାଦ, ଉତ୍ୟକ୍ତ ଲୋକେ ତାଲା ପକାଇଲେ

ରିପୋର୍ଟ: ଗୋପୀନାଥ ଗୌଡ଼
ରାୟଗଡ଼ା(୧୦/୧୦): ରାୟଗଡ଼ା ସହରରେ ସରକାରୀ ଜାଗାରେ ଦୋକାନ ଘର ନିର୍ମାଣକୁ ନେଇ ଉତ୍ତେଜନା | ସ୍ଥାନୀୟ କପିଳାସ ରୋଡ୍‌ ସ୍ଥିତ ଷ୍ଟାଇଲ ବଜାର ନିକଟରେ କିଛିଦିନ ହେବ ବେଆଇନ ଭାବେ ସରକାରୀ ଜାଗାରେ ୮୦ ଲକ୍ଷ ବ୍ୟୟରେ ଏକ ଦୋକାନ ଗୃହ ନିର୍ମାଣ କରାଯାଇଛି। ଗୁରୁବାର ଏହାର ଶୁଭାରମ୍ଭ ପାଇଁ ପ୍ରସ୍ତୁତି ଚାଲିଥିବା ବେଳେ କଂଗ୍ରେସ କର୍ମୀ ଏବଂ କେତେକ ଲୋକ ଯାଇ ମାଲିକଙ୍କୁ ଦୋକାନର କାଗଜପତ୍ର ମାଗିଥିଲେ।

ମାତ୍ର ସେ ଦେଇ ନ ପାରିବାରୁ ଉଭୟ ଦୋକାନୀ ଏବଂ କଂଗ୍ରେସ କର୍ମୀଙ୍କ ମଧ୍ୟରେ ପାଟିତୁଣ୍ଡ ଉଗ୍ର ରୂପ ନେଇ ହାତାହାତି ପର୍ଯ୍ୟନ୍ତ କଥା ପହଞ୍ଚିଥିଲା । କଂଗ୍ରେସ କର୍ମୀଙ୍କ କହିବା ଅନୁଯାୟୀ, କାଗଜପତ୍ର ମାଗିବାରୁ ମାଲିକଙ୍କ ପୁଅ ଦୁର୍ବ୍ୟବହାର କରିବା ସହ ମାରିବାରୁ ଏହାର ପ୍ରତିବଦଳରେ ସାଧାରଣ ଜନତା ମଧ୍ୟ ମାରପିଟ୍‌ କରିବା ସହ ଦୋକାନରେ ତାଲା ପକାଇ ଦେଇଥିଲେ। କଂଗ୍ରେସ ଜିଲ୍ଲା ସଭାପତି ଦୁର୍ଗା ପଣ୍ଡା କହିଛନ୍ତି, ସରକାରୀ ଜାଗାରେ ଥିବା ନିରୀହ ଲୋକଙ୍କୁ ଉଚ୍ଛେଦ କାରାଯାଇ ରାଜରାସ୍ତାରେ ରଖାଯାଉଛି। ଧନିମାନେ ସରକାରୀ ଅଫିସରମାନଙ୍କୁ ଲାଞ୍ଚ ଦେଇ ବେଆଇନ ଭାବେ କୋଠା ନିର୍ମାଣ କରୁଛନ୍ତି। ଏଥିରେ ପ୍ରଶାସନ ଚୁପ୍‌ ବସିଛି। ଅନ୍ୟପକ୍ଷରେ ଦୋକାନୀ ତଥା ମାଲିକ ନୀଳ କଣ୍ଠେଶ୍ୱର ରାଓ କହିଛନ୍ତି, ବିଶାଖାପାଟଣାରେ ଜରୁରୀ କାଗଜପତ୍ର ଛାଡ଼ି ଆସିଛନ୍ତି। ଦୁଇ ଦିନ ସମୟ ଦେଲେ ସମସ୍ତ କାଗଜପତ୍ର ଦେଖାଇପାରିବେ | ଏହି ଘଟଣାକୁ ନେଇ ସଂପୃକ୍ତ ଅଞ୍ଚଳରେ କୀଛ ସମୟ ପାଇଁ ଉତ୍ତେଜନା ପରିସ୍ଥିତି ଦେଖା ଦେଇଥିଲା |

Comments are closed.