ରିପୋର୍ଟ : ଦେବଦତ୍ତ ପଣ୍ଡା
କଳାହାଣ୍ଡି, (୩୦/୧୦) : କଳାହାଣ୍ଡି ଜିଲ୍ଲା ଭବାନୀପାଟଣା ଠାରୁ ଥୁଆମୂଳ ରାମପୁର ପୂର୍ତ୍ତ ବିଭାଗ ର ରାଜ୍ୟ ରାଜପଥ ର ୪୪ ନମ୍ବର ରାସ୍ତାରେ ଥିବା ଭାଗିରଥି ପାର୍କ ନିକଟସ୍ଥ ବ୍ରିଜ୍ ଅଚାନକ ଭୁଶୁଡ଼ିବାରୁ ୨ଟି ଚଳନ୍ତା କାର ଭଗ୍ନବ୍ରିଜ୍ ତଳକୁ ଖସିପଡି ଥିଲା ।
ଆଜି ଅପରାହ୍ନ ପ୍ରାୟ ୩ଟା ସମୟରେ ଭବାନୀପାଟଣା ରୁ ଫୁର୍ଲିଝରଣ ପରିଦର୍ଶନରେ ଦୁଇଟି ପରିବାର ଯିବା ସମୟରେ ଏହି ଅଭାବନୀୟ ଘଟଣା ଘଟିଥିବା ଜନାପଡ଼ିଛି । ଘଟଣାସ୍ଥଳରୁ ୭ ଜଣଙ୍କୁ ଉଦ୍ଧାର କରାଯାଇ ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଏହି ଦୁର୍ଘଟଣା ଯୋଗୁଁ ଭବାନୀପାଟଣା ଠାରୁ ଥୁଆମୂଳ ରାମପୁର ରାସ୍ତାରେ ଯାତାୟତ ପ୍ରଭାବିତ ହୋଇଛି ।
ପ୍ରାୟତଃ ୧୯୩୫ ମସିହାରେ ନିର୍ମିତ ଏହି ବ୍ରିଜ୍ ଗତ କିଛି ବର୍ଷ ତଳେ ରାସ୍ତା ମରାମତି ଓ ପ୍ରସାରିତ କରାଯିବା ସମୟରେ ବିଭାଗ ପକ୍ଷରୁ ଅଣଦେଖା କରାଯାଇଥିବାରୁ ଏଭଳି ଅଭାବନୀୟ ଘଟଣା ଘଟିଥିବାର ଆଲୋଚନା ହେଉଛି । ସରକାର କୋଟି କୋଟି ଟଙ୍କା ବ୍ୟୟ ବରାଦ କରି ରାସ୍ତା ନିର୍ମାଣ କରୁଥିବା ବେଳେ ବିଭାଗୀୟ କର୍ତ୍ତୃପକ୍ଷଙ୍କର ଏଭଳି ଅଣଦେଖା ଦାୟିତ୍ୱହୀନତା ର ପରିଚୟ ଦେଉଥିବାର ସ୍ଥାନୀୟ ଲୋକଙ୍କ ଠାରୁ ପ୍ରକାଶ । ଏ ସମ୍ପର୍କରେ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ବିଭାଗୀୟ ଦୋଷ ଲୁଚାଇବାକୁ ଯାଇ ପୁରୁଣା ବ୍ରିଜ ଇଟରେ ତିଆରି ହୋଇଥିବା ହେତୁ ଭୁସିଡି ପଡିଥିବା କହୁଥିବା ବେଳେ ରାସ୍ତା ଉନ୍ନତିକରଣ ସମୟରେ ତଦନ୍ତ ସମ୍ପର୍କରେ ନୀରବ ରହୁଥିବା ଜଣାପଡିଛି ।
ସ୍ଥାନୀୟ ଲୋକଙ୍କର କହିବା ଅନୁସାରେ ଏହାର ଉପଯୁକ୍ତ ମରାମତି ଅଥିବା ବିକଳ୍ପ ରାସ୍ତା ପାଇଁ ପ୍ରଶାସନ ପକ୍ଷରୁ ବ୍ୟବସ୍ଥା କରାଯିବାର ଆବଶ୍ୟକ ଥିଲା । କିନ୍ତୁ ପ୍ରଶାସନ ଏହା କରି ନଥିବାରୁ ଆଜି ଏକ ବଡ଼ ଅଘଟଣ ଘଟିଛି ବୋଲି ସାଧାରଣରେ ଚର୍ଚ୍ଚା ହେଉଛି । ଏହି ଅଘଟଣ ପାଇଁ ପୂର୍ତ୍ତ ବିଭାଗ ର ଅଧିକାରୀ ମାନଙ୍କୁ ସାଧାରଣରେ ସମ୍ପୂର୍ଣ୍ଣ ଭାବରେ ଦାୟୀ କରାଯାଉଛି ।