Related Contents

ପୁଣି ଥରେ ବୁହା ହେଲେ ଗର୍ଭବତୀ, ଗାଁରେ ପହଞ୍ଚି ପାରିଲାନି ଆମ୍ବୁଲାନ୍ସ

ରିପୋର୍ଟ: ତ୍ରିନାଥ ଧୁରୁଆ
ଝରିଗାଁ(୨୩.୦୯.୨୦୧୯): ପୁଣିଥରେ ହାତରେ ବୁହି ଆଣିଲେ ଗର୍ଭବତୀଙ୍କୁ । ଆମ୍ବୁଲାନ୍ସ ଆସିଲା କିନ୍ତୁ କାଦୁଅ ରାସ୍ତା ଯୋଗୁଁ ଗାଁକୁ ପହଞ୍ଚି ପାରିଲାନାହିଁ ଆମ୍ବୁଲାନ୍ସ । ଏହିପରି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ତାରାଯୋଡି ଗ୍ରାମରେ ଏହି ଗ୍ରାମର ମୋହନ ହରିଜନଙ୍କ ସ୍ତ୍ରୀ ସୁନାମଣି ହରିଜନଙ୍କୁ ଗର୍ଭ ଯନ୍ତ୍ରଣା ହେବାରୁ ପରିବାର ଲୋକେ ୧୦୮ ଆମ୍ବୁଲାନ୍ସକୁ ଫୋନ କରିଥିଲେ ହେଲେ ଆମ୍ବୁଲାନ୍ସ ଆସି ଗାଁରୁ ଦୀର୍ଘ ତିନି କିଲୋମିଟର ଦୂରରେ କାଦୁଅରେ ଥିବା ଶିର୍ଷିଆ ଗୁଡା ନିକଟରେ କାଦୁଅରେ ଲାଗି ଯାଇଥିଲା ।

ଗ୍ରାମକୁ ଆମ୍ବୁଲାନ୍ସ ଆସି ନ ପାରିବା ଶୁଣି ଗ୍ରାମବାସୀ ଓ ପରିବାର ଏକ ଅଟୋରେ ଦୁଇ କିଲୋମିଟର ଆସିଲେ କିନ୍ତୁ ରାସ୍ତା ଏତେ ଖରାପ ଯେ ଅଟୋ ମଧ୍ୟ ଯାଇ ପାରିଲା ନାହିଁ । ଶେଷରେ ବାଧ୍ୟ ହୋଇ ପରିବାର ଲୋକ ହାତରେ ବୋହି ପ୍ରାୟ ଏକ କିଲୋମିଟର ଶିର୍ଷିଆ ଗୁଡା ଛକ ନିକଟରେ ଅଟକି ଯାଇଥିବା ଆମ୍ବୁଲାନ୍ସ ନିକଟରେ ପହଞ୍ଚି ଥିଲେ । ଏହା ପରେ କାଦୁଅରେ ଲାଗି ଯାଇଥିବା ଆମ୍ବୁଲାନ୍ସ କୁ ଠେଲି ପକ୍କା ରାସ୍ତାକୁ କାଢିଥିଲେ ଏବଂ ଝରିଗାଁ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ ।

ଗ୍ରାମବାସୀଙ୍କ କହିବା ଅନୁସାରେ ପ୍ରତି ବର୍ଷ ଗ୍ରାମର ରାସ୍ତା ପାଇଁ ଅଭିଯୋଗ କଲେ ମଧ୍ୟ କେବଳ ମୁରୁମ ନା ରେ ମାଟି ପଖାଇ ଦେଇ ରାସ୍ତା କାମ ସାରି ଦିଅନ୍ତି । ବର୍ଷା ଦିନ ଆସିଲେ ରାସ୍ତା ପୁଣି କାଦୁଅ ହୋଇଯାଏ । ଏହି କାଦୁଅ ରାସ୍ତାରେ ଗର୍ଭବତୀ କିମ୍ବା ଯେକୌଣସି ରୋଗୀଙ୍କୁ କଟିଆ କିମ୍ବା ହାତରେ ବୋହିଆଣୁଛନ୍ତି ବୋଲି ଗ୍ରାମବାସୀ ବାସୀ ଅଭିଯୋଗ କରିଛନ୍ତି ।

Comments are closed.