ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣପୁର, (୧୬/୯) : ପୁଣି ଅକାଳରେ ମଉଳି ଯାଇଛି ଏକ କୋମଳମତି ଛାତ୍ରୀଙ୍କ ଜୀବନ । ସ୍କୁଲ ପାଚେରୀ ସହ ଫାଟକ ପଡ଼ି ୫ମ ଶ୍ରେଣୀ ପଢୁଥିବା ୧୧ ବର୍ଷିୟ ଆହୁତି ଶବର ର ମୃତ୍ୟୁ ଘଟିଛି ।
ଏଭଳି ଏକ ଅଭାବନୀୟ ଘଟଣା ଘଟିଛି ରାୟଗଡ଼ା ଜିଲ୍ଲା ପଦ୍ମପୁର ବ୍ଲକ ବିଚିକୋଟ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ । ସରକାର ଗୋଟିଏ ପଟେ 5T ସ୍କୁଲ ନିର୍ମାଣ କରି ପ୍ରଶଂସା ସାଉଁଟୁଥିବା ବେଳେ ଅପରପକ୍ଷରେ ରାୟଗଡ଼ା ଜିଲ୍ଲାରେ ବାରମ୍ବାର ଏପରି ଛାତ୍ର ଛାତ୍ରୀ ମୃତ ଘଟଣା ଶିକ୍ଷା ବିଭାଗ ର ପାରିବା ପଣିଆକୁ ପଦାରେ ପକାଇ ଦେଇଛି । ସୂଚନା ମୁତାବକ ଆଜି ଦିନ ପ୍ରାୟ ୧୨ଟା ସମୟରେ ଛାତ୍ରୀ ଜଣକ ଶୌଚାଳୟ ଯିବା ସମୟରେ ସ୍କୁଲ ପାଚେରୀ ସହ ଗେଟ୍ ଟି ଭାଙ୍ଗି ଛାତ୍ରୀଙ୍କ ମୁଣ୍ଡରେ ପଡ଼ିଯାଇଥିଲା । ଗୁରୁତର ଆହତ ଛାତ୍ରୀଙ୍କୁ ୧୦୮ ଆମ୍ବୁଲାନ୍ସ ଯୋଗେ ପ୍ରଥମେ ପଦ୍ମପୁର ମେଡ଼ିକାଲକୁ ନିଆଯାଇଥିଲା, ସେଠାରେ ଛାତ୍ରୀଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ସଙ୍ଗେ ସଙ୍ଗେ ଗୁଣପୁର ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା । ଚିକିତ୍ସିତ ଅବସ୍ଥାରେ ଛାତ୍ରୀଙ୍କ ମୃତ୍ୟୁ ଘଟିଥିବା ଡାକ୍ତର ସୂଚନା ଦେଇଛନ୍ତି ।
ପ୍ରକାଶ ଯୋଗ୍ୟ ଯେ ,ଏପରି ବିପଦ ସଙ୍କୁଳ ଅବସ୍ଥାରେ ଥିବା ପାଚେରୀ ଓ ଗେଟ ର ମରାମତି ପାଇଁ ବହୁବାର ଦାବି ହେଉଥିଲେ ମଧ୍ୟ ସ୍କୁଲ କର୍ତ୍ତୃପକ୍ଷ କି ଶିକ୍ଷା ବିଭାଗ କେହି ଦୃଷ୍ଟି ଦେଇ ନଥିବା ଗ୍ରାମବାସୀ ଅଭିଯୋଗ କରିଛନ୍ତି । ଆଜି ଶିକ୍ଷା ବିଭାଗ ର ଅବହେଳା ଯୋଗୁଁ ଜଣେ ନିଷ୍ଠାପ ଛାତ୍ରୀଙ୍କ ମୃତ୍ୟୁ ଘଟିବା କେତେଦୂର ଯୁକ୍ତିଯୁକ୍ତ ଆପଣ ବିଚାର କରିବେ ।
ଏହି ଅଘଟଣ ଘଟିବା ପରେ ଗୋଷ୍ଠୀ ଶିକ୍ଷା ଅଧିକାରୀ ପଦ୍ମପୁର ସୁବାସ ଶବର ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ଘଟଣାସ୍ଥଳରେ ପଦ୍ମପୁର ଥାନା ଅଧିକାରୀ ପହଞ୍ଚି ତଦନ୍ତ କରୁଥିବା ସୂଚନା ମିଳିଛି ।
ତେବେ ଏଠାରେ ପ୍ରଶ୍ନ ଉଠୁଛି ଯେ, ଏଭଳି ଛାତ୍ରୀଙ୍କ ମୃତ୍ୟୁ ପାଇଁ ଦାୟୀ କିଏ ? ସ୍କୁଲ କର୍ତ୍ତୃପକ୍ଷ, ଶିକ୍ଷା ବିଭାଗ ନା ଖୋଦ ମୁଖ୍ୟମନ୍ତ୍ରୀ ? ଆଉ କେତେଜଣ ଛାତ୍ରଛାତ୍ରୀଙ୍କ ଜୀବନ ଗଲାପରେ ଶିକ୍ଷା ବିଭାଗ ର ନିଦ ଭାଙ୍ଗିବ ଏହା ସମୟ କହିବ ।