ରିପୋର୍ଟ : ସନ୍ତୋଷ କୁମାର ନାୟକ
ବଲାଙ୍ଗୀର/ଟିଟିଲାଗଡ଼, ତା (୦୯/୦୯) : ଟିଟିଲାଗଡ଼ ଉପଖଣ୍ଡ ମୁଖ୍ୟ ଚିକିତ୍ସାଳୟରେ ମାତ୍ରାଧିକ ଅବ୍ୟବସ୍ଥା ଯୋଗୁଁ ସରକାରଙ୍କ ସର୍ବନିମ୍ନ ସ୍ୱାସ୍ଥ୍ୟ ସେବା ଯୋଗାଇ ଦେବା ଏକ ପ୍ରକାର ପ୍ରହସନ ପାଲଟିଥିବା ଅଭିଯୋଗ ହୋଇଆସୁଛି ।
ପ୍ରକାଶ ଯେ, ଆଦିବାସୀ ଅଧ୍ୟୁଷିତ ଏହି ଅଞ୍ଚଳ ର ଟିଟିଲାଗଡ଼ ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଆବଶ୍ୟକ କର୍ମଚାରୀ ଓ ଗୁରୁତ୍ଵପୂର୍ଣ୍ଣ ଡାକ୍ତର ପଦବୀ ଖାଲିପଡ଼ିଥିବା ବେଳେ ଦୀର୍ଘ ବର୍ଷ ଧରି ଭାଗ୍ୟ କୁ ଆଦରି ଅନେକ ଗୁରୁତର ରୋଗୀ ଅକାଳ ମୃତ୍ୟୁ ବରଣ କରିବା ସାର ହେଉଛି । ପ୍ରତିଦିନ ବିଭିନ୍ନ ପ୍ରକାର ରୋଗରେ ବିଶେଷ କରି ଝାଡା, ବାନ୍ତି, ମ୍ୟାଲେରିଆ ଆଦିରେ ଆକ୍ରାନ୍ତ ରୋଗୀ ଗୁରୁତର ଅବସ୍ଥାରେ ଆସି ଚିକିତ୍ସା ଅଭାବରୁ ଧାର, କରଜ କରି ଘରୋଇ ଡାକ୍ତଖାନାଗୁଡ଼ିକରେ ଭର୍ତ୍ତି ହେବା ଓ ଚିକିତ୍ସା ଅଭାବରୁ ଅକାଳ ମୃତ୍ୟୁ ବରଣ କରିବା ଅଭିଯୋଗ ହୋଇ ଆସୁଛି ।
ସେହିପରି ଡାକ୍ତରଖାନା ପରିସରରେ ଅନେକ ସଂଖ୍ୟକ ବେଡ ବା ଶଯ୍ୟା ଥାଇ ସୁଦ୍ଧା ପରିତ୍ୟକ୍ତ ଅବସ୍ଥାରେ ତାଲା ବନ୍ଦ କରି ଛାଡି ଦିଆ ଯାଇଛି, ଫଳରେ ବାଧ୍ୟ ହୋଇ ରୋଗୀ ଗୁରୁତର ଅବସ୍ଥାରେ ତଳେ ଗଡି ରହି ଅକଥନୀୟ ଦୁର୍ଦ୍ଦଶା ର ଶିକାର ହେଉଛନ୍ତି । ଏ ସମସ୍ୟା ନେଇ ଇତି ମଧ୍ୟରେ ଡାକ୍ତଖାନା ମୁଖ୍ୟ ଚିକତ୍ସାଧିକାରୀଙ୍କୁ ଜନ ଜାଗରଣ ସଂଘ ପକ୍ଷରୁ ସମାଧାନ ପାଇଁ ନିବେଦନ କରିଥିଲେ ।
ଉକ୍ତ ବନ୍ଦ କୋଠରୀ ଗୁଡିକ ତୁରନ୍ତ ଖୋଲିବାକୁ ଜଣେ କର୍ମଚାରୀ ଙ୍କୁ ନିର୍ଦ୍ଦେଶ ଦେଇଥିଲେ । ହେଲେ କାର୍ଯ୍ୟରତ ନର୍ସ ସିଡି ଚଢି ଉପରକୁ ବାରମ୍ବାର ଯାଇ ପାରିବେନି ବୋଲି ରୋକ୍ ଠୋକ ମନା କରିଦେଇଥିଲେ । ଯଦ୍ୱାରା ଦୂର, ଦୁରାନ୍ତ ରୁ ଆସିଥିବା ଗୁରୁତର ଅବସ୍ଥାରେ ଥିବା ରୋଗୀ ବାଧ୍ୟ ହୋଇ ଅନ୍ୟତ୍ର ଯିବା ଓ ସଠିକ୍ ସମୟରେ ଉପଯୁକ୍ତ ସମୟରେ ଚିକିତ୍ସା ଅଭାବରୁ ଶୋଚନୀୟ ମୃତ୍ୟୁ ର ଶିକାର ହେବା ସାର ହେଉଛି । ଡାକ୍ତରଖାନା ପରିସରରେ ଥିବା ସରକାରୀ ବାସ ଭବନରେ ରୋଗୀ ଙ୍କୁ ଦେୟ ବା ଫିସ ଟଙ୍କା ନେଇ ଦେଖିବା ବେଆଇନ ହୋଇଥିବା ସତ୍ତ୍ଵେ, ଏହି ଡାକ୍ତଖାନା ମୁଖ୍ୟ ଚିକିତ୍ସାଧିକାରୀ ନିଜେ ପ୍ରଥମ ଥର ଦେଢ଼ ସହ ଟଙ୍କା ଓ ବିଭିନ୍ନ ପରୀକ୍ଷା ସବୁ କରେଇ ଆଣିବା ପରେ ପୁନଃ ଦୁଇ ଶହ ଟଙ୍କା ଆଦାୟ କରିବା ଅଭିଯୋଗ ହୋଇଆସୁଛି ।
ଯଦି ଅନ୍ୟ ରୋଗୀ ବାହ୍ୟ ବିଭାଗ କୁ ଆସେ ତେବେ ନାନା ଆଳରେ ବଲାଙ୍ଗୀର ସ୍ଥାନାନ୍ତର କରି ନିଜ ଦାୟିତ୍ୱ ଶେଷ କରି ଦେବା ଅଭିଯୋଗ ହୋଇି ଆସୁଛି । ଏପରି ମନମୁଖୀ ଓ ଖାମ ଖିଆଲ ଅର୍ଥ ଶୋଷଣ ମନୋଭାବ ଯୋଗୁଁ ଗରିବ ଲୋକ ଅକଥନୀୟ ଦୁର୍ଦ୍ଦଶା ର ଶିକାର ହେବା ନେଇ ଜନ ଅସନ୍ତୋଷ ବୃଦ୍ଧି ପାଉଛି । ଏ ନେଇ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବା ପାଇଁ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବା କୁ ବିଭିନ୍ନ ମହଲରେ ଦୃଢ଼ ଦାବି ହେଉଛି ।