ରିପୋର୍ଟ : ବିରଞ୍ଚି ପ୍ରସାଦ ଶତପଥୀ //
ଗୁଣପୁର, ତା (୩୧/୮) : ଆଜି ରାୟଗଡ଼ା ଜିଲ୍ଲା ଗୁଣପୁର ପୌର ପରିଷଦ କାର୍ଯ୍ୟାଳୟରେ ସ୍ୱାୟତ୍ତ ଶାସନ ଦିବସ ୨୦୨୨ ମହାଆଡମ୍ବରରେ ପାଳିତ ହୋଇଯାଇଛି ।
ଗୁଣପୁର ପୌର ପରିଷଦ କାର୍ଯ୍ୟାଳୟରେ ଆୟୋଜିତ ସଭାରେ ମାନ୍ୟବର ଗୁଣପୁର ବିଧାୟକ ଶ୍ରୀ ରଘୁନାଥ ଗମାଙ୍ଗ ମୂଖ୍ୟ ଅତିଥି ଭାବେ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବେ ପୌର ଅଧ୍ୟକ୍ଷା ଶ୍ରୀମତୀ ମମତା ଗୌଡ଼, ଉପାଧ୍ୟକ୍ଷ ଶିବ ପ୍ରସାଦ ଗୌଡ଼ ଓ ପୌର ପରିଷଦ ର କାର୍ଯ୍ୟ ନିର୍ବାହୀ ଅଧିକାରୀ ଉମା ପ୍ରସାଦ ଦାସ ପ୍ରମୁଖ ଉପସ୍ଥିତ ରହି ମଞ୍ଚାସିନ ହୋଇଥିଲେ । ବିଧାୟକ ରଘୁନାଥ ଗମାଙ୍ଗ ନିଜ ଅଭିଭାଷଣରେ ଗୁଣପୁର ପୌର ପରିଷଦ ର ଉନ୍ନତି କାମନା କରିଥିବା ବେଳେ ଅଧ୍ୟକ୍ଷା ମମତା ଗୌଡ଼ ଗୁଣପୁର ବିକାଶକୁ ଆଗେଇ ନେବାର ଯେଉଁ ସ୍ୱପ୍ନ ଦେଖିଛନ୍ତି ସେଗୁଡିକ ସାକାର କରିବା ପାଇଁ ପରିଷଦ ର ସମସ୍ତ କାଉନସିଲର ଓ କର୍ମଚାରୀ ମାନଙ୍କ ସହଯୋଗ କାମନା କରିଥିଲେ ।
ଗୁଣପୁର ପରିମଳ ବ୍ୟବସ୍ଥା ସୁଧାରିବା, ମଶା ଉପଦ୍ରବରୁ ସହରକୁ ରକ୍ଷା କରିବା, ଦେବାଳୟ ପରିବେଶ ସ୍ୱଚ୍ଛ ରଖିବା, ପାର୍କ ଗୁଡିକର ପୁନୋରୁଦ୍ଧାର କରିବା ଆଦି କାର୍ଯ୍ୟ ଶିଘ୍ର ଶେଷ କରିବା ପାଇଁ ପଦକ୍ଷେପ ନିଆଯାଉଛି ବୋଲି ସୂଚନା ଦେଇଛନ୍ତି । ଉପାଧ୍ୟକ୍ଷ ଶ୍ରୀ ଶିବ ପ୍ରସାଦ ଗୌଡ଼ ନିଜ ଅଭିଭାଷଣରେ କହିଥିଲେ ଯେ, ଗୁଣପୁରର ଉନ୍ନତି ନିମନ୍ତେ ୫ କୋଟି ୩୦ ଲକ୍ଷ ଟଙ୍କା ଅଟକଳରେ ୪୮ ଗୋଟି ରାସ୍ତା ଓ ଡ୍ରେନ ନିର୍ମାଣ କାର୍ଯ୍ୟ ହାତକୁ ନିଆଯାଇଛି ଏବଂ ମାନ୍ୟବର ପୂର୍ବତନ ରାଜ୍ୟସଭା ସାଂସଦ ଶ୍ରୀଯୁକ୍ତ ଏନ୍ ଭାସ୍କର ରାଓଙ୍କ ପାଣ୍ଠିରୁ ୧ କୋଟି ୨୪ ଲକ୍ଷ ୫୦ ହଜାର ଟଙ୍କା ବ୍ୟୟରେ ସହର ର ବିଭିନ୍ନ ସ୍ଥାନରେ ଅନେକ ପ୍ରକଳ୍ପ ର ଅନୁମୋଦନ ହୋଇ କାର୍ଯ୍ୟ ଚାଲୁ ରହିଛି ।
ଏହି ଅବସରରେ ପରିଷଦ ର ଯୋଗ୍ୟ ହିତାଧିକାରୀଙ୍କ ପାଇଁ ୭୩୯ ଟି ଆବାସ ଯୋଜନା, ୪୮ ଜଣଙ୍କୁ ଦିଵ୍ୟାଙ୍ଗ ଭତ୍ତା, ବିଧବା ଭତ୍ତା ପ୍ରଦାନ, ୫ ଟି ସ୍ବୟଂ ସହାୟକ ଗୋଷ୍ଠୀକୁ ୧୬ ଲକ୍ଷ ୨୦ ହଜାର ଟଙ୍କା ଋଣ ପ୍ରଦାନ, ୩୦ ଟି ଉଠା ଦୋକାନୀଙ୍କୁ ପ୍ରମାଣ ପତ୍ର ସହ ୧୧ ଜଣଙ୍କୁ ୧ ଲକ୍ଷ ୫୦ ହଜାର ଟଙ୍କା ଋଣ ପ୍ରଦାନ କରାଯାଇଥିଲା । ଶେଷରେ ଉପାଧ୍ୟକ୍ଷ ଶ୍ରୀ ଶିବ ପ୍ରସାଦ ଗୌଡ଼ ସମସ୍ତ ସହରବାସୀଙ୍କୁ ମିଳିମିଶି ଗୁଣପୁର ସହର ର ସର୍ବାଙ୍ଗିନ ଉନ୍ନତି ପାଇଁ କାମ କରି ପୂର୍ବ ଥର ଭଳି ରାଜ୍ୟରେ ଗୁଣପୁର ପୌର ପରିଷଦକୁ ପ୍ରଥମ ସ୍ଥାନରେ ରଖିବାକୁ ଅନୁରୋଧ କରିଥିଲେ ।