ଜୁଲାଇ ୩୦ରୁ ଅଗଷ୍ଟ ୫ପର୍ଯନ୍ତ ନକ୍ସଲ ନିନ୍ଦା ସପ୍ତାହ ପାଳନ ପାଇଁ ଆହ୍ୱାନ

ରିପୋର୍ଟ: ବିଭୁତି ଲହରିଆ
ବାଲିଗୁଡା(୦୩/୦୮): ଏଏନପିପିଏଫ ପକ୍ଷରୁ ସାଧାରଣ ଜନତାଙ୍କୁ ନକ୍ସଲ ନିନ୍ଦା ସପ୍ତାହ ପାଳନ ପାଇଁ ଅନୁରୋଧ କରାଯାଇଛି | ଅନେକଦିନର ନୀରବତା ପରେ ଫୁଣି ଏଏନପିପିଏଫ ପକ୍ଷରୁ ନକ୍ସଲ ବିରୋଧୀ ପୋଷ୍ଟର ଦେଖିବାକୁ ମିଳିଛି |

ଗୋଟେ ପଟେ ମାଓବାଦୀଙ୍କ ସହୀଦ ସପ୍ତାହ ତ ଆଉ ଗୋଟେ ପକ୍ଷେ ମାଓବାଦୀଙ୍କ ସହୀଦ ସପ୍ତାହକୁ ବିରୋଧ କରି ନକ୍ସଲ ନିନ୍ଦା ସପ୍ତାହର ଆହ୍ୱାନ | ମାଓବାଦୀଙ୍କ ସହିଦ ସପ୍ତାହକୁ ବିରୋଧ କରି କନ୍ଧମାଳ ଜିଲ୍ଲା ବାଲିଗୁଡା ବସ ଷ୍ଟାଣ୍ଡ ବିଶ୍ରାମଗାର ଠାରେ ଲାଗିଛି ମାଓ ବିରୋଧୀ ପୋଷ୍ଟର | ପ୍ରଥମ ଥର କରି ଜୁଲାଇ ୩୦ରୁ ଅଗଷ୍ଟ ୫ ପର୍ଯ୍ୟନ୍ତ ନକ୍ସଲ ନିନ୍ଦା ସପ୍ତାହ ପାଳନ କରିବାକୁ ଦିଆଯାଇଛି ଆହ୍ୱାନ | ପୋଷ୍ଟର ନକ୍ସଲ ବିରୋଧୀ ଏଏନପିପିଏଫ ପକ୍ଷରୁ ଲାଗିଛି | ନକ୍ସଲ ଆନ୍ଦୋଳନ ସହିତ ତାଳ ଦେଇ ନକ୍ସଲ ବିରୋଧୀ ଆନ୍ଦୋଳନକୁ ଆଗକୁ ନେବାର ଦେଖିବାକୁ ମିଳିଛି ଦେଶରେ ପ୍ରଥମ ଥର | ଲାଗିଥିବା ପୋଷ୍ଟରରେ ଆଦିବାସୀ ହତ୍ୟାକାରୀ, ବିକାଶ ବିରୋଧୀ ମାଓବାଦୀଙ୍କ ସହିଦ ସପ୍ତାହ ଆଉ ଚଳିବ ନାହିଁ କି ଆମେ ଏହାକୁ ଆଉ ସଫଳ ହେବାକୁ ଦେବୁ ନାହିଁ | ସେମାନେ ଆମ ପାଇଁ ସହୀଦ ନୁହନ୍ତି ସେମାନେ ଆଦିବାସୀଙ୍କ ହତ୍ୟାକାରୀ | ଆନ୍ଦୋଳନର ଶେଷ ଦ୍ୱାରରେ ଛିଡା ହୋଇଥିବା ବାଘଛାଲ ପିନ୍ଧା କୁକୁର ରୂପକ ମାଓବାଦୀ ତୁମର ସହୀଦ ସପ୍ତାହ ପାଳନ କରିବା ବନ୍ଦ କର | ଏ ଦେଶ ତୁମ ବାପାର ନୁହଁ ତେଣୁ ସାବଧାନ ହୋଇଯାଅ ବୋଲି ଅତି କଟୁଭାଷାରେ ନକ୍ସଲଙ୍କ ବିରୋଧରେ ଲେଖାଯାଇଛି | ତତସହିତ ନକ୍ସଲ ସହୀଦ ସପ୍ତାହରେ କଣ ପାଇଁ ମାଓବାଦୀ ସ୍କୁଲ, କଲେଜ, ରାସ୍ତାଘାଟ, ବସ ଚଳାଚଳ ବନ୍ଦ ରହିବ ? ଏହା ସାଧାରଣ ଲୋକଙ୍କ ଉପରେ ଅତ୍ୟାଚାର ତେଣୁ ତୁମେ ଏହାକୁ ବନ୍ଦ କର |

ସାବଧାନ ମାଓବାଦୀ ପୁନଃ ସହୀଦ ସପ୍ତାହ ପାଲନ ନ କରାଯାଉ ନଚେତ ଜନତା ତୁମକୁ ଘଞ୍ଚ ଜଙ୍ଗଲ ମଧ୍ୟରେ ପସିକି ଗୋଡେଇ ଗୋଡେଇ ପିଟିବେ | ସାଧାରଣ ଜନତାଙ୍କୁ ବିନୀତ ଅନୁରୋଧ କି ସେମାନେ ମାଓବାଦୀଙ୍କ ସହୀଦ ସପ୍ତାହ ପାଳନକୁ ପ୍ରତ୍ୟାଖ୍ୟାନ କରନ୍ତୁ ଏବଂ ଜୁଲାଇ ୩୦ରୁ ଅଗଷ୍ଟ ୫ ପର୍ଯ୍ୟନ୍ତ ନକ୍ସଲ ନିନ୍ଦା ସପ୍ତାହ ପାଳନ କରନ୍ତୁ | ନକ୍ସଲଙ୍କୁ ନ ଡରି ସ୍କୁଲ, କଲେଜ, ରାସ୍ତାଘାଟ ଯାତାୟତ ନକ୍ସଲ ସହୀଦ ସପ୍ତାହ ପୂର୍ବ ଭଳି ସ୍ଥିତି ରହୁ, ଆମେ ସାଧାରଣ ଜନତାଙ୍କ ଶାନ୍ତି ଚାହୁଁଛୁ ନକ୍ସଲଙ୍କ ମିଛ କ୍ରାନ୍ତି ନୁହଁ | ଓଡିଶା ରାଜ୍ୟ ମାଓବାଦୀ ମୁର୍ଦ୍ଧାବାଦ, ବଘୁନା ଡ଼ିଭିଜନାଲ କମିଟି ମୁର୍ଦ୍ଧାବାଦ, ଆଣ୍ଟି ନକ୍ସଲ ପିପୁଲସ ପିସ ଫୋର୍ସ କନ୍ଧମାଳ ଜିଲ୍ଲା କମିଟି ବୋଲି ଏଏନପିପିଏଫ ପକ୍ଷରୁ ଲାଗିଥିବା ପୋଷ୍ଟରରେ ଲେଖା ଯାଇଛି |

Comments are closed.