ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ରାୟଗଡ଼ା, (୦୧/୦୮) : ଚଳିତ ମାସ ୩୧/୭/୨୦୨୨ ତାରିଖ ରବିବାର ଦିନ ଗୁଣପୁର ସହରରେ ସଂଯୁକ୍ତ କିଷାନ ମୋର୍ଚ୍ଚା ର ଆହ୍ଵାନ କ୍ରମେ ଅଖିଳ ଭାରତ କୃଷକ ମହାସଭା ତରଫରୁ ନୂଆ ବସଷ୍ଟାଣ୍ଡ ଠାରୁ ଏକ ବିଶାଳ ଶୋଭାଯାତ୍ରା ବାହାରି ଗୁଣପୁର ବାଇପାସ୍ ଛକ ନିକଟରେ ଥିବା ନାଗଭୂଷଣ ପଟ୍ଟନାୟକଙ୍କ ପ୍ରତିମୂର୍ତ୍ତି ନିକଟରେ ରାସ୍ତା ଅବରୋଧ କରାଯାଇଥିଲା ।
ଭାରତରେ ଚାଲିଥିବା ଅନ୍ୟାୟ, ଅତ୍ୟାଚାର, ଅବିଚାର, କୃଷକ ଗଣହତ୍ୟା, କୃଷକ ଶ୍ରମିକ ବିରୋଧୀ ଆଇନ, ମୂଲ୍ୟ ବୃଦ୍ଧି, କ୍ରମ ବର୍ଦ୍ଧିଷ୍ଣୁ ବେକାରୀ ସମସ୍ୟା, ଆଦିବାସୀ ଦଳିତ ସଂଖ୍ୟାଲଘୁ ଏବଂ ମହିଳା ମାନଙ୍କ ବିରୁଦ୍ଧରେ ହିଂସ୍ର ଆକ୍ରମଣ ଇତ୍ୟାଦି ପାଇଁ ପ୍ରଧାନମନ୍ତ୍ରୀ ଓ ସ୍ଵରାଷ୍ଟ୍ର ମନ୍ତ୍ରୀ ସମ୍ପୂର୍ଣ୍ଣ ଦାୟୀ । ଏମାନେ ହେଉଛନ୍ତି ଦେଶ ଓ ଦେଶବାସୀଙ୍କ ପାଇଁ ଅଶୁଭ ଶକ୍ତି । ତେଣୁ ଆଜି ଏହାର ପ୍ରତିବାଦରେ ଅଖିଳ ଭାରତ କୃଷକ ମହାସଭା ତରଫରୁ ଚାରୋଟି ଦାବି ଉପସ୍ଥାପନ କରାଯାଇଛି ।
ସେଗୁଡିକ ହେଲା ଚାଷୀ ଉତ୍ପାଦନ କରୁଥିବା ସମସ୍ତ ଫସଲ ର ଏମ୍,ଏସ୍,ପି (ସର୍ବ ନିମ୍ନ ମୂଲ୍ୟ) ପାଇଁ ଆଇନ ଗତ ବ୍ୟବସ୍ଥା କରିବା, ଲକ୍ଷ୍ମୀପୁର ଖେରୀ ନରସଂହାର ଘଟଣାରେ ସଂପୃକ୍ତ ଅପରାଧି ମାନଙ୍କୁ ଦୃଷ୍ଟାନ୍ତ ମୂଳକ ଶାସ୍ତି ଦେବା, କୃଷକ ମାନଙ୍କ ଉପରେ ହୋଇଥିବା ସମସ୍ତ ମୋକଦ୍ଦମା ପ୍ରତ୍ୟାହାର କରିବା ଓ ଜନବିରୋଧୀ ବିଦ୍ୟୁତ ବିଲ ୨୦୨୦ ତୁରନ୍ତ ପ୍ରତ୍ୟାହାର କରି ବିଦ୍ୟୁତ ଉପଭୋକ୍ତା ମାନଙ୍କୁ ଉଚିତ୍ ନ୍ୟାୟ ପ୍ରଦାନ କରିବା ।
ଆଜିର ଏହି ଚାରିଦଫା ଦାବିନେଇ ଅଖିଳ ଭାରତ କୃଷକ ମହାସଭା ରାୟଗଡ଼ା ଜିଲ୍ଲା କମିଟି ର ସଦସ୍ୟ ତ୍ରୀପତି ଗମାଙ୍ଗ କେନ୍ଦ୍ର ସରକାରଙ୍କ ଅପାରଗତା ସମ୍ପର୍କରେ ନିଜ ଅଭିଭାଷଣରେ କହିଥିବା ବେଳେ ଅନାସିମ ଶବର, କୈଳାସ ଶବର, ମଜେସ ଶବର, ସଞ୍ଜୀବ ଶବର, ରାଇନା ଶବର, ଦାନିଏଲ ଶବର, ରାଜେନ୍ଦ୍ର ମାଝୀ, ଭିମ ମାଝୀ ପ୍ରମୁଖ ସହଯୋଗ କରିଥିଲେ ।