ରାସ୍ତାରେ ମୁରୁମ ବଦଳରେ ପଡ଼ିଲା ମାଟି, ଧାନ ରୋଇଲେ ଗ୍ରାମବାସୀ

ରିପୋର୍ଟ: ତ୍ରିନାଥ ଧୁରୁଆ
ଝରୀଗାଁ (୧୫/୦୭): ଗାଁ କୁ ଭଲ ରାସ୍ତାଟିଏ ନିର୍ମାଣ ହୋଇପାରୁନାହିଁ । ବର୍ଷା ଦିନ ହେବା ମାତ୍ରେ ଶୋଚନୀୟ ଅବସ୍ଥାରେ ଥିବା ଗାଁ କାଦୁଅମୟ ହୋଇ ପଡୁଛି । ଏଥି ଯୋଗୁଁ ଯାତାୟତ ସମୟରେ ଗ୍ରାମବାସୀ ବିଭିନ୍ନ ସମସ୍ୟାର ସମ୍ମୁଖିନ ହେଉଛନ୍ତି । ଭଲ ରାସ୍ତା ନିର୍ମାଣ ପାଇଁ ବାରମ୍ବାର ଗୁହାରୀ କରାଯିବା ପରେ ମଧ୍ୟ ପ୍ରଶାସନ କିମ୍ବା ରାଜନେତା ଏ ଦିଗରେ ଦୃଷ୍ଟି ଦେଉ ନାହାନ୍ତି ।

ଶେଷରେ ଗ୍ରାମବାସୀ ପ୍ରତିବାଦ ସ୍ୱରୂପ ଏହି କାଦୁଅ ମୟ ରାସ୍ତାରେ ଧାନ ଗଛ ରୋଇଛନ୍ତି । ଏଭଳି ଅଭିନବ ଉପାୟ ଆପଣାଇଛନ୍ତି ନବରଙ୍ଗପୁରଜିଲ୍ଲା ଝରିଗାଁ ବ୍ଲକ ଚଚା ପଞ୍ଚାୟତ ଥାଟବେଡ଼ା ଗ୍ରାମବାସୀ । ସୂଚନା ଅନୁଯାୟୀ ଥାଟବେଡ଼ା, ବନ୍ଦଗୁଡା ଚୁଇମାଟି ଗୁଡା ଗ୍ରାମବାସୀଙ୍କ ନୀତିଦିନ କାର୍ଯ୍ୟ ଏହି ରାସ୍ତା ଉପରେ ନିର୍ଭରଶୀଳ । ଏହି ୩ଟି ଗାଁରେ ୧୭୦ଟି ପରିବାର ରହୁଥିବା ବେଳେ ଜନ ସଂଖ୍ୟା ୮୦୦ରୁ ଉର୍ଦ୍ଧ । ଥାଟବେଡ଼ାରୁ ମୁଖ୍ୟ ଚଚା ରାସ୍ତାକୁ ସଂଯୋଗ କରୁଥିବା ଏହି ରାସ୍ତା ଶୋଚନୀୟ ହୋଇ ପଡ଼ିଥିବା ବେଳେ ବର୍ଷା ଦିନେ ରାସ୍ତା ଅବସ୍ଥା ଅତନ୍ତ୍ୟ ଶୋଚନୀୟ ହୋଇପଡୁଛି । ରାସ୍ତାସାରା କାଦୁଅମୟ ହେଉଥିବାରୁ ବାଇକରେ କିମ୍ବା ଚାଲି ଯିବା ମଧ୍ୟ ଅସମ୍ଭବ ହୋଇଥାଏ । ରାସ୍ତା ସାରା କାଦୁଅ ହୋଇ ରହିଥିବାରୁ ସ୍କୁଲ ଯିବା ସମୟରେ ଛାତ୍ର ଛାତ୍ରୀ ବହୁ ହୋଇରାଣ ହେଉଛନ୍ତି । ଗାଁ କୁ ଆମ୍ବୁଲାନ୍ସ ପହଞ୍ଚି ପାରିନଥିବାରୁ ରୋଗୀଙ୍କୁ ସ୍ୱାସ୍ଥ୍ୟ କେନ୍ଦ୍ର ନେବା ସମୟରେ ବିଭିନ୍ନ ସମସ୍ୟାର ସମ୍ମୁଖିନ ହେଉଛନ୍ତି । ରାସ୍ତା ଅବସ୍ଥା ଦେଖି କୁନି ପିଲାଙ୍କୁ ଛାଡିବାକୁ ଅଭିଭାବକ ବିପଦ ମଣୁଛନ୍ତି ।
ଏହି ରାସ୍ତାର ସୁଧାର ଆଣିବା ପାଇଁ ଚଳିତବର୍ଷ ସମନ୍ବିତ ଆଦିବାସୀ ଉନୟନ ସଂସ୍ଥା (ITDA)ତରଫରୁ ୨ଲକ୍ଷ ଟଙ୍କା ମୁରୁମ କାମ ପାଇଁ ଅନୁଦାନ ଆସିଥିଲା ଏବଂ କାମଟି ୨ମାସ ତଳେ କାର୍ଯ୍ୟ ମଧ୍ୟ ଶେଷ ହୋଇଥିବା ଦେଖିବାକୁ ମିଳିଛି | କିନ୍ତୁ ବିଭାଗୀୟ ଅଧିକାରୀ ଏବଂ ଠିକାଦାରଙ୍କ ମଧୁଚନ୍ଦ୍ରିକା ଯୋଗୁଁ ରାସ୍ତାରେ ମୁରୁମ ବଦଳରେ ମାଟି ପଡିଥିବା ଅଭିଯୋଗ କରିଛନ୍ତି ଗ୍ରାମବାସୀ । କାର୍ଯ୍ୟ କରୁଥିବା ବେଳେ ବିଭାଗୀୟ ଅଧିକାରୀଙ୍କ ଅନୁପସ୍ଥିତ ଏବଂ କାର୍ଯ୍ୟ ତଦାରଖ କରୁନଥିବା ଯୋଗୁଁ ଏଭଳି ସରକାରୀ ଯୋଜନା ସଫଳ ରୂପାୟନ ହେଉନଥିବା ଦେଖିବାକୁ ମିଳିଛି ।
ଏହି ସମ୍ପର୍କରେ ବିଭାଗୀୟ ଯନ୍ତ୍ରୀ ଶରତ କୁମାର ମାଝୀଙ୍କୁ ଯୋଗାଯୋଗ କରିବାରୁ ଏହି କାମଟି ଵିଲ ହୋଇ ନ ଥିବା କହିଥିବା ବେଳେ ରାସ୍ତାର କାର୍ଯ୍ୟ ତଦନ୍ତ କରାଯିବ ବୋଲି କହିଛନ୍ତି । ଏନେଇ ଝରିଗାଁ ଗୋଷ୍ଟି ଉନୟନ ଅଧିକାରୀ ଦେବେନ୍ଦ୍ର ବହାଦୁରସିଂ ଧୁରୁଆଙ୍କୁ ଯୋଗାଯୋଗ କରିବାରୁ ଯଥା ଶୀଘ୍ର ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ବାରମ୍ବାର ଗୁହାରୀ କରିବା ପରେ କେହି ନ ଶୁଣିବାରୁ ଶେଷରେ ଗ୍ରାମବାସୀ ଅଭିନବ ଉପାୟରେ ପ୍ରତିବାଦ କରିଛନ୍ତି । ଆଜି ଗ୍ରାମର ମହିଳା ପୁରୁଷ ଏହି କାଦୁଅ ରାସ୍ତା ଧାନ ଗଛ ରୋଇଲେ । ଯଦି ଏହା ପରେ ମଧ୍ୟ ପ୍ରଶାସନ ରାସ୍ତା ନିର୍ମାଣ ନିମନ୍ତେ ଦୃଷ୍ଟି ନ ଦିଏ ତେବେ ଗ୍ରାମବାସୀ ଧାରଣା ଦେବାକୁ ଚେତାବନୀ ଦେଇଛନ୍ତି ।

Comments are closed.