ରିପୋର୍ଟ : ଧ୍ରୁବରାଜ ମିଶ୍ର
ସୁବର୍ଣ୍ଣପୁର, (୧୯/୬) : ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ଥାନା ସମ୍ମୁଖରେ ବଜ୍ରକାପ୍ତା ବିକ୍ରି ପାଇଁ ଡ଼ିଲ ସମୟରେ ଦୁଇ ଦଲାଲଙ୍କୁ ଧରିଛି ଏସଟିଏଫ ଟିମ । ଏଥିସହ ଜୀବନ୍ତ ବଜ୍ରକାପ୍ତାକୁ ଉଦ୍ଧାର କରି ବିନିକା ବନ ବିଭାଗ କାର୍ଯ୍ୟାଳୟକୁ ଅଣାଯାଇଛି ।
ଗିରଫ ଅଭିଯୁକ୍ତ ହେଲେ ବଲାଙ୍ଗୀର ଜିଲ୍ଲା ଲୋଇସିଂହା ଥାନା ସଙ୍କୁଆ ଗ୍ରାମ ର ଅଶୋକ ବିଶି (୪୨) ଏବଂ ଜୟ କୁମାର ପଟେଲ (୩୭) । ସୂଚନା ଅନୁସାରେ ଲୋଇସିଂହା ନିକଟସ୍ଥ ଛେଲିଆ ଜଙ୍ଗଳରୁ ଉକ୍ତ ବ୍ୟକ୍ତି ଦ୍ୱୟ ବଜ୍ରକାପ୍ତାକୁ ବସ୍ତାରେ ଭର୍ତ୍ତିକରି ଆଣି ଡୁଙ୍ଗୁରିପାଲି ଥାନା ସମ୍ମୁଖରେ ଗତକାଲି ରାତି ପ୍ରାୟ ୮ ଟା ସମୟରେ ବଜ୍ରକାପ୍ତା ବିକ୍ରି ପାଇଁ ଡ଼ିଲ ହେଉଥିବା ବେଳେ ଏସଟିଫ ଟିମ ଉକ୍ତ ବ୍ୟକ୍ତି ଦ୍ୱୟ ଙ୍କୁ ଧରି ବଜ୍ରକାପ୍ତା କୁ ଉଦ୍ଧାର କରିଥିଲା ।
ପରେ ବିନିକା ବନ ବିଭାଗ କୁ ଖବର ଦେବାପରେ ବନ ବିଭାଗ କର୍ମଚାରୀ ପହଞ୍ଚି ବଜ୍ରକାପ୍ତା ଓ ଉକ୍ତ ଅଭିଯୁକ୍ତ ଦ୍ୱୟକୁ ବିନିକା ବନ ବିଭାଗ କାର୍ଯ୍ୟାଳୟ କୁ ଆଣିଥିଲେ । ପରେ କାର୍ଯ୍ୟାଳୟରେ ଏକ ମାମଲା ରୁଜୁ କରାଯାଇଛି । ବଜ୍ରକାପ୍ତା ର ଓଜନ ୮ କେଜି ୯୦୦ ଗ୍ରାମ୍ ରହିଥିବା ବେଳେ ତାହାର ସ୍ୱାସ୍ଥ୍ୟ ପରୀକ୍ଷା କରାଯାଇଛି । ଆସନ୍ତାକାଲି ଅଭିଯୁକ୍ତ ଅଶୋକ ଏବଂ ଜୟକୁମାର କୁ କୋର୍ଟରେ ହାଜର କରାଯିବା ସହିତ ଏହାର ଅଧିକ ତଦନ୍ତ ଜାରି ରହିଥିବା ବିନିକା ବନ ବିଭାଗ ଅଧିକାରୀ ଡମ୍ବରୁଧର ପ୍ରଧାନ ପ୍ରକାଶ କରିଛନ୍ତି ।
ଏହି ଚଢ଼ାଉରେ ଏସଟିଏଫ ଟିମ ସହ ସୋନପୁର ଏସସିଏଫ ପ୍ରଫୁଲ୍ଲ କୁମାର ଧରୁଆ, ବିନିକା ରେଞ୍ଜର ଶ୍ରୀ ପ୍ରଧାନ, ଡୁଙ୍ଗୁରିପାଲି ଫରେଷ୍ଟର ଜୟକୃଷ୍ଣ ପଟ୍ଟନାୟକ, ବିନିକା ଫରେଷ୍ଟର ଜନାର୍ଦ୍ଧନ ସ୍ୱାଇଁ, ସିଂଘିଯୁବା ଫରେଷ୍ଟର ଲିଙ୍ଗରାଜ ନାଏକ ପ୍ରମୁଖ ସାମିଲ ଥିଲେ ।