ରିପୋର୍ଟ : ବିରଞ୍ଚି ପ୍ରସାଦ ଶତପଥୀ
ଗୁଣୁପୁର, (୪/୬) : ସ୍ଥାନୀୟ ଜି ଆଇ ଇ ଟି ବିଶ୍ୱବିଦ୍ୟାଳୟ ଗୁଣୁପୁର ପରିସରରେ ସ୍କୁଲ ଅଫ ଇଂଜିନିୟରିଂ ଆଣ୍ଡ୍ ଟେକ୍ନୋଲୋଜି ର ବେସିକ ସାଇନ୍ସ ଆଣ୍ଡ୍ ହ୍ୟୁମାନିଟିସ୍ ଏବଂ ସ୍କୁଲ ଅଫ ସାଇନ୍ସ ଆନୁକୂଲ୍ୟରେ ଓଡିଶା ଫିଜିକଲ୍ ସୋସାଇଟି ର ସୁବର୍ଣ୍ଣ ଜୟନ୍ତୀ ଉତ୍ସବ ପାଳିତ ଅବସରରେ ଦୁଇ ଦିନିଆ ଜାତୀୟ ଆଲୋଚନା ଚକ୍ର ଏବଂ ୩୮ ତମ ସମ୍ମିଳନୀ “ସ୍ଥାୟୀ ବିକାଶରେ ପଦାର୍ଥ ବିଜ୍ଞାନ” ସମ୍ପର୍କୀୟ ଆଲୋଚନା ଚକ୍ର ଉଦଘାଟିତ ହୋଇଯାଇଛି ।
ଏହି ଆଲୋଚନା ଚକ୍ର ୪ ଓ ୫ ତାରିଖ ପର୍ଯ୍ୟନ୍ତ ହେବ । ଏହି ଉଦଘାଟନ ଉତ୍ସବରେ ମୁଖ୍ୟ ଅତିଥି ଭାବେ ଭୁବନେଶ୍ୱର ସ୍ଥିତ ଆଇ ଓ ପି ର ନିର୍ଦ୍ଦେଶକ ଡଃ କେ କେ ନନ୍ଦ ଯୋଗଦେଇ ସ୍ଥାୟୀ ବିକାଶରେ ପଦାର୍ଥ ବିଜ୍ଞାନର ଭୂମିକା ବିଷୟରେ ଆଲୋକପାତ କରିଥିଲେ । ସମ୍ମାନୀୟ ଅତିଥି ଭାବେ ଜି ଆଇ ଇ ଟି ବିଶ୍ୱବିଦ୍ୟାଳୟ ର ଉପସଭାପତି ଡଃ ଚନ୍ଦ୍ରଧ୍ୱଜ ପଣ୍ଡା ଯୋଗଦେଇ ପଦାର୍ଥ ବିଜ୍ଞାନ ଓ ବୈଷୟିକ କ୍ଷେତ୍ରରେ ବିକାଶ ଓ ଦୈନନ୍ଦିନ ପ୍ରୟୋଗ ସହ ଜ୍ଞାନର ସଦୁପଯୋଗ ବିଷୟରେ କହିଥିଲେ ।
ବିଶ୍ୱବିଦ୍ୟାଳୟ ର ରେଜିଷ୍ଟ୍ରାର ଡଃ ଏନ୍ ଭି ଜେ ରାଓ ପଦାର୍ଥ ବିଜ୍ଞାନରେ ନୂତନ ଗବେଷଣା ବିଷୟ ରେ କହିଥିଲେ । ଓପିଏସ୍ ର ସଭାପତି ଡଃ ଦୁର୍ଗା ପ୍ରସାଦ ମହାପାତ୍ର ଶିକ୍ଷା ଓ ଗବେଷଣା କ୍ଷେତ୍ରରେ ଗୁଣାତ୍ମକ ବିକାଶ ବିଷୟରେ କହିଥିଲେ । ସମ୍ପାଦକ ମିହିର ହୋତା ବାର୍ଷିକ ସମ୍ପାଦକୀୟ ବିବରଣୀ ପାଠ କରିଥିଲେ । ସମ୍ମିଳନୀ ର ଆବାହକ ଡଃ ଦିଲ୍ଲିପ କୁମାର ପଟ୍ଟନାୟକ ସ୍ୱାଗତ ଭାଷଣ ଦେଇଥିଲେ ।
ଏହି ସମ୍ମିଳନୀରେ ପ୍ରଫେସର ଏସ ଏନ ବେହେରା ମେମୋରିଆଲ୍ ପ୍ରବକ୍ତା, ଆମନ୍ତ୍ରିତ ପ୍ରବକ୍ତା, ବି ବି ଦେଓ ମେମୋରିଆଲ୍ ପ୍ରବକ୍ତାମାନ ଯଥାକ୍ରମେ ଧାନବାଦ୍ ସ୍ଥିତ ଆଇ ଆଇ ଟି (ଆଇ ଏସ ଏମ) ପ୍ରଫେସର ଉମାକାନ୍ତ ତ୍ରିପାଠୀ, ଦିଲ୍ଲୀ ବିଶ୍ୱବିଦ୍ୟାଳୟ ର ପ୍ରଫେସର ଦୟାଶଙ୍କର କୁଳଶ୍ରେଷ୍ଠଙ୍କ ଦ୍ୱାରା ଆଲୋଚନା କରାଯାଇଥିଲା ।
ରାଉରକେଲା ସ୍ଥିତ ଏନ ଆଇ ଟି ର ପ୍ରଫେସର ସିମାଞ୍ଚଳ ପାଣିଗ୍ରାହୀ, ପ୍ରଫେସର ଡଃ ଏଲ ପି ସିଂ ବକ୍ତାଭାବେ ଯୋଗଦେଇ ପଦାର୍ଥ ବିଜ୍ଞାନ ଓ ପ୍ରଯୁକ୍ତି ବିଜ୍ଞାନର ଆଧୁନିକ ଗବେଷଣା ଓ ବିକାଶ ସମ୍ପର୍କରେ ଆଲୋକପାତ କରିଥିଲେ । ଏହି ଅବସରରେ ଯୁବ ବୈଜ୍ଞାନିକ ଓ ପଦାର୍ଥ ବିଜ୍ଞାନରେ ମହତ୍ୱ ପୂର୍ଣ୍ଣ ଯୋଗଦାନ ପାଇଁ ସମ୍ମାନିତ କରାଯାଇଥିଲା ।
ବିଶ୍ୱବିଦ୍ୟାଳୟ ର ପଦାର୍ଥ ବିଜ୍ଞାନ ଏବଂ ସମସ୍ତ ବିଜ୍ଞାନ ବିଭାଗ ର ପ୍ରଫେସର ବୃନ୍ଦ ଓ ଓଡିଶା ର ବିଭିନ୍ନ ମହାବିଦ୍ୟାଳୟ, ବିଶ୍ୱବିଦ୍ୟାଳୟ ଓ ଗବେଷଣା କେନ୍ଦ୍ର ର ପ୍ରଫେସର ବୃନ୍ଦ ଯୋଗ ଦେଇଥିଲେ । ବିଭାଗ ର ଛାତ୍ରଛାତ୍ରୀମାନଙ୍କ ଦ୍ୱାରା ସାଂସ୍କୃତିକ କାର୍ଯକ୍ରମ ପରିବେଷଣ କରାଯାଇଥିଲା । ଏହି ସମ୍ମିଳନୀରେ ଅନୁଷ୍ଠାନ ର ଅଧ୍ୟାପକ, ଅଧ୍ୟାପିକା, ଛାତ୍ରଛାତ୍ରୀ ଯୋଗଦେଇଥିଲେ ।
ଇଂରାଜୀ ଅଧ୍ୟାପିକା ବର୍ଷା ଦାଶ ମଞ୍ଚ ପରିଚାଳନା କରିଥିଲେ । ପରିଶେଷରେ ସହ ଆବାହକ ଡଃ ହରିଶଙ୍କର ମହାନ୍ତି ଧନ୍ୟବାଦ ଅର୍ପଣ କରିଥିଲେ ଏବଂ ଅଧ୍ୟାପିକା ବିଜୟଲକ୍ଷ୍ମୀ କୁଁଅର, ଡଃ ତପନ ପଟ୍ଟନାୟକ, ରବୀନ୍ଦ୍ର ମିଶ୍ର, ଡଃ ବିଶ୍ୱଜିତ ଦଳାଇ ପ୍ରମୁଖ ପରିଚାଳନା କରିଥିଲେ ।