ରିପୋର୍ଟ : ରାମନାଥ ଗନ୍ତାୟତ
ଭୁବନେଶ୍ୱର, (୦୪/୦୬) : ଶ୍ରୀ ଲିଙ୍ଗରାଜଙ୍କ ଶୀତଳ ଷଷ୍ଠୀ ବିଧିରେ ଦେଖାଦେଇଛି ମହାବିଭ୍ରାଟ । ମନ୍ଦିର ପ୍ରଶାସନ ର ଅବହେଳାକୁ ବିରୋଧ କରି ସେବାୟତମାନେ ଅସହଯୋଗ କରିବାରୁ ହୋଇ ପାରିଲାନି ଦେବଦମ୍ପତି ଙ୍କ ମଙ୍ଗଳକୃତ୍ୟ ବିଧି ସମ୍ପନ୍ନ । ଦିନ ତମାମ୍ ମନ୍ଦିର ନୀତିିରେ ବି ବିଭ୍ରାଟ ଘଟିଥିବା ସୂଚନା ରହିଛି ।
ମନ୍ଦିର ପ୍ରଶାସନ ଓ ସେବାୟତମାନଙ୍କ ମଧ୍ୟରେ ଲାଗି ରହିଥିବା ଛକାପଞ୍ଝା କାରଣରୁ ଶ୍ରୀ ଲିଙ୍ଗରାଜଙ୍କ ବିଧି ବନ୍ଦ ହୋଇଯାଇଥିବାରୁ ଭକ୍ତ ଓ ଶ୍ରଦ୍ଧାଳୁଙ୍କ ମଧ୍ୟରେ ତ୍ରୀବ ପ୍ରତିକ୍ରିୟା ପ୍ରକାଶ ପାଇଛି । ମଙ୍ଗନ ନୀତି ବନ୍ଦ ହୋଇଥିବା ବେଳେ ବାହାଘର ପର୍ବ କିପରି ହେବ ପ୍ରଶ୍ନବାଚୀ ସୃଷ୍ଟି ହୋଇଛି । ଏ ନେଇ ମନ୍ଦିର ପ୍ରଶାସନ ମଧ୍ୟ ନିରବ ରହିଥିବାରୁ ଏକାମ୍ର କ୍ଷେତ୍ରରେ ଚାପା ଉତ୍ତେଜନା ସୃଷ୍ଟି ହୋଇଛି ।
ସୂଚନାନୁଯାୟୀ, ଗତକାଲି ପୂର୍ବାହ୍ନରୁ ସେବାୟତମାନଙ୍କ ଅସହଯୋଗ ଆରମ୍ଭ ହୋଇଥିଲା । ମନ୍ଦିର ପ୍ରଶାସନକୁ ଚେତାଇବାକୁ ମଙ୍ଗଳ ଆଳତି ବେଳରୁ ସେବାୟତ ନିଯୋଗ ପକ୍ଷରୁ ନୀତିରେ ଅସହଯୋଗ କରାଯାଇଥିଲା ଓ ପ୍ରଥମେ ସକାଳୁ ଦୁଇ ଘଣ୍ଟା ନୀତି ବିଳମ୍ବ ହୋଇଥିଲା । ଅବଶ୍ୟ ଏହା ପ୍ରତୀକାତ୍ମକ ଅସହଯୋଗ ଆନ୍ଦୋଳନ ଥିଲା ଓ ୨ ଘଣ୍ଟା ନୀତି ବନ୍ଦ କରାଯିବା ପରେ ପୁଣି ନୀତି ସ୍ୱାଭାବିକ ହୋଇଥିଲା । ତଥାପି ପ୍ରଶାସନ କିଛି ପଦକ୍ଷେପ ନେଇ ନଥିଲା । ଫଳରେ ସନ୍ଧ୍ୟାରେ ପୁଣି ନୀତି ବନ୍ଦ ହୋଇଥିଲା ।
ସନ୍ଧ୍ୟାରେ ବଲ୍ଲଭ ପରେ ଦ୍ୱିପ୍ରହର ଧୂପ ନୀତି ହୋଇଥିଲା ଓ ଏହା ପରେ ଠାକୁରାଣୀଙ୍କ ଦ୍ବିପ୍ରହର ଧୂପ ହୋଇଥିଲା । ସୂଚନାଯୋଗ୍ୟ, ବିଧି ଅନୁସାରେ ଏହି ସମୟରେ ଶଙ୍କୁଡ଼ି ଭୋଗ ପ୍ରସ୍ତୁତି ହୁଏ । ଏହା ପରେ ଶଙ୍କୁଡ଼ି ଭୋଗ ମନ୍ଦିର ବେଢ଼ା ପରିକ୍ରମା କରାଯାଇଥା’ନ୍ତା । ଏହା ପରେ ଲିଙ୍ଗରାଜଙ୍କ ବିବାହ ପାଇଁ ଅଷ୍ଟଚଣ୍ଡୀଙ୍କୁ ନିମନ୍ତ୍ରଣ ହୋଇଥା’ନ୍ତା ଓ ବଡ଼ସିଂହାର ପରେ ପହୁଡ଼ ପଡ଼ିଥାନ୍ତା । କିନ୍ତୁ ପୂର୍ବ ଘୋଷଣା ଅନୁଯାୟୀ ବ୍ରାହ୍ମଣ ନିଯୋଗ ଓ ପୂଜାପଣ୍ଡା ନିଯୋଗ ପକ୍ଷରୁ ନୀତିରେ ଅସହଯୋଗ କରାଗଲା । ଦ୍ୱିପ୍ରହର ଧୂପ ନୀତି ପରେ ସେବାୟତମାନେ ଆଉ କୌଣସି ନୀତିରେ ସାମିଲ ହୋଇନଥିଲେ । ଫଳରେ ଠାକୁରଙ୍କ ବିବାହ ପାଇଁ ମଙ୍ଗନ ବିଧି ଅନୁଷ୍ଠିତ ହୋଇପାରିଲା ନାହିଁ ।
ବଡ଼ କଥା ହେଉଛି, ମନ୍ଦିରର ଦୁଇ ପ୍ରମୁଖ ନିଯୋଗ ବ୍ରାହ୍ମଣ ନିଯୋଗ ଓ ପୂଜାପଣ୍ଡା ନିଯୋଗ ପକ୍ଷରୁ ପୂର୍ବରୁ ଏ ନେଇ ଚେତାବନୀ ଦିଆଯାଇଥିଲା । ମନ୍ଦିର ପ୍ରଶାସନ ପକ୍ଷରୁ ଅନୁଷ୍ଠିତ ବୈଠକରେ ବ୍ରାହ୍ମଣ ନିଯୋଗ ସମ୍ପାଦକ ବିରଞ୍ଚି ପତି ଓ ପୂଜାପଣ୍ଡା ନିଯୋଗ ସମ୍ପାଦକ ସଚ୍ଚିକାନ୍ତ ପୂଜାପଣ୍ଡା ଚଳିତ ବର୍ଷ ଶୀତଳ ଷଷ୍ଠୀ ଯାତ୍ରାରେ ସହଯୋଗ କରିବେ ନାହିଁ ବୋଲି ଲିଖିତ ଜଣାଇଥିଲେ । ହେଲେ ପ୍ରଶାସନ ସେମାନଙ୍କ ଏହି ଚେତାବନୀକୁ ହାଲୁକା ଭାବେ ନେଲା । ଫଳରେ ସେମାନେ ନୀତିରେ ଅସହଯୋଗ କଲେ ବୋଲି ନିଯୋଗ ପକ୍ଷରୁ କୁହାଯାଇଛି ।