Related Contents

ପ୍ରଧାନ ଶିକ୍ଷକଙ୍କ ନିର୍ବାଚନୀ ସଭା, କାର୍ଯ୍ୟାନୁଷ୍ଠାନ ନେଇନି ଜିଲ୍ଲା ପ୍ରଶାସନ

ବିଜେପୁର(ଜଗବନ୍ଧୁ ସାହୁ): ନିର୍ବାଚନ ସମୟରେ ଆଦର୍ଶ ଆଚରଣ ବିଧି ଅବମାନନା କରିବା ଏକ ଦଣ୍ଡନୀୟ ଅପରାଧ । ଏଥିନିମନ୍ତେ ପ୍ରତ୍ୟେକ ସରକାରୀ କର୍ମଚାରୀ ମାନଙ୍କୁ ନିର୍ବାଚନ ପ୍ରଚାରରୁ ନିବୃତ୍ତ ରହିବାକୁ ସୂଚନା ଦିଆଯାଇଥାଏ ପ୍ରଶାସନ ପକ୍ଷରୁ । କିନ୍ତୁ ପ୍ରଶାସନର ନିର୍ଦ୍ଦେଶକୁ ବେଖାତିର କରି ବରଗଡ଼ ଜିଲ୍ଲା ବିଜେପୁର ବ୍ଲକ ଅନ୍ତର୍ଗତ ଯୋଖିପାଲି ସ୍ଥିତ ପଞ୍ଚାୟତ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ଶ୍ରୀଯୁକ୍ତ ଧର୍ମରାଜ ମହାପାତ୍ର ଏକ ନିର୍ଦ୍ଦିଷ୍ଟ ଦଳ ପାଇଁ ନିର୍ବାଚନୀ ସଭାରେ ଭାଷଣ ମାରି ଭୋଟ ମାଗୁଥିବାର ଏକ ଭିଡିଓ ସୋସିଆଲ ମିଡିଆରେ ଘୁରିବୁଲୁଛି ।

ଯାହାକି ଜଣେ ଶିକ୍ଷକ ହୋଇ ପ୍ରତ୍ୟକ୍ଷ ଭାବେ ନିର୍ବାଚନ ପ୍ରଚାର କରିବା ନିର୍ବାଚନ କମିଶନଙ୍କ ଆଦର୍ଶ ଆଚରଣବିଧି ଉପରେ ଅଙ୍ଗୁଳି ନିର୍ଦ୍ଦେଶ କରୁଛି । ଠିକ୍ ଏହିଭଳି ଗଞ୍ଜାମ ଜିଲ୍ଲାର ହିଞ୍ଜିଳି ବ୍ଲକ ଅନ୍ତର୍ଗତ ଆଲପୁର ଉଚ୍ଚ ବିଦ୍ୟାଳୟର ଶିକ୍ଷକ କୈଳାସପତି ଦାଶ ସୋସିଆଲ ମିଡିଆରେ ଏକ ନିର୍ଦ୍ଦିଷ୍ଟ ଦଳର ପ୍ରଚାର କରିଥିଲେ । ଯାହାକି ଗଞ୍ଜାମ ଜିଲ୍ଲାର ଜିଲ୍ଲାପାଳ ଏହା ଖବର ପାଇ ଅବିଳମ୍ବେ ଶିକ୍ଷକଙ୍କୁ ନିଲମ୍ବିତ କରିଥିଲେ ଏବଂ ଅନ୍ୟ କୌଣସି କର୍ମଚାରୀ ମଧ୍ୟ ନିର୍ବାଚନ ଆଚରଣବିଧି ବ୍ୟବସ୍ଥାକୁ ଅବମାନନା କଲେ ତାଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ପକ୍ଷରୁ ସତର୍କ କରିଥିଲେ । କିନ୍ତୁ ବରଗଡ଼ ଜିଲ୍ଲାରେ ଖୋଲାଖୋଲି ଭାବେ ଉକ୍ତ ଶିକ୍ଷକ ଜଣକ ନିର୍ବାଚନୀ ସଭାରେ ଯୋଗଦେଇ ଲୋକମାନଙ୍କୁ ଏକ ନିର୍ଦ୍ଦିଷ୍ଟ ଦଳକୁ ଭୋଟ ଦେବା ପାଇଁ କହି ଭାଷଣ ମାରୁଥିବା ଦୃଶ୍ୟ ସୋସିଆଲ ମିଡିଆରେ ଘୁରି ବୁଲୁଥିବା ତଥା ଏହାକୁ ଟ୍ବିଟର୍ ମାଧ୍ୟମରେ ନିର୍ବାଚନ କମିଶନ ଓ ଜିଲ୍ଲାପାଳ ବରଗଡ଼ଙ୍କୁ କିଛି ଯୁବକମାନେ ଜଣାଇ ଅଭିଯୋଗ କରିଥିଲେ ହେଁ ସମ୍ପୃକ୍ତ ଶିକ୍ଷକଙ୍କ ବିରୁଦ୍ଧରେ ଏପର୍ଯ୍ୟନ୍ତ କିଛି କାର୍ଯ୍ୟାନୁଷ୍ଠାନ ନିଆ ନଯିବା ଏକ ଚିନ୍ତାର ବିଷୟ ହୋଇଥିବା ବେଳେ ଦଳୀୟ ଚାପରେ ନିର୍ବାଚନ କମିଶନ ଓ ଜିଲ୍ଲା ପ୍ରଶାସନ ପକ୍ଷରୁ କିଛି କାର୍ଯ୍ୟାନୁଷ୍ଠାନ ହେଇ ନଥିବା ଜୋର ଚର୍ଚ୍ଚା ଚଲିଛି ।

ବୁଦ୍ଧିଜିବୀ ମହଲରେ ଏହାର ତୀବ୍ର ନିନ୍ଦା ପ୍ରକାଶ କରାଯାଇଛି । ଗଣତନ୍ତ୍ର ଶାସନରେ ଆଇନ ସମସ୍ତଙ୍କ ପାଇଁ ସମାନ ରହିବା ତଥା ଦୋଷୀ ଦଣ୍ଡ ପାଇବା ବ୍ୟବସ୍ଥାକୁ ବଳବତ୍ତର ରଖିବା ନିମିତ୍ତ ବିଦ୍ୟାଳୟ ଓ ଗଣଶିକ୍ଷା ବିଭାଗ / ନିର୍ବାଚନ କମିଶନ/ ଜିଲ୍ଲା ପ୍ରଶାସନ ଏହି ଘଟଣାର ତଦନ୍ତ କରି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବୀ ହେଉଛି ।

Comments are closed.